ސައުދީ އަރަބިއްޔާގެ އިރުމައްޗާއި ހުޅަނގު ގުޅުވައިދޭ މައި ތެޔޮ ހޮޅިއަށް ދިން ވައިގެ ހަމަލާގެ ޒިންމާ އުފުލަންޖެހޭނީ އީރާނުން ކަމަށް ބެލެވޭ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހޮނިހިރު ދުވަހު ވިދާޅުވެއްޖެ އެވެ.
މި ހަމަލާއާ ގުޅިގެން، ހޮރްމޫޒް ކަނޑުއޮޅީގެ ބަދަލުގައި ސައުދީން ސާފުނުކުރާ ތެޔޮ ބޭރުކުރުމަށް ބޭނުންކުރާ އެންމެ މައި އެއް މަގު ކަމަށްވާ މި ހޮޅިން ތެޔޮ ފޮނުވުން ވަނީ މެދުކަނޑާލަން ޖެހިފަ އެވެ.
އަޔަލޭންޑްގެ ޑަބްލިންގައި ނޫސްވެރިންނާ ވާހަކަދައްކަވަމުން، ސައުދީގެ ތެޔޮ ހޮޅިއަށް ދިން ހަމަލާގެ ފަހަތުގައި ވަނީ އީރާންތޯ ސުވާލުކުރުމުން ޓްރަމްޕް ވިދާޅުވީ، އެކަމުގެ ޒިންމާ އުފުލަންޖެހޭނީ އީރާނުން ކަމަށް ވަރަށް ބޮޑަށް ގަބޫލުކުރެއްވޭ ކަމަށެވެ.
މީގެ އިތުރުން، ސައުދީގެ ވަލީއަހުދު މުހައްމަދު ބިން ސަލްމާނާ ވާހަކަފުޅު ދެއްކެވި ކަމަށާއި، ވަލީއަހުދަކީ އެމަނިކުފާނުގެ "ގާތް އެކުވެރިއެއް" ކަމަށް ވެސް އެމެރިކާގެ ރައީސް ވިދާޅުވި އެވެ.
ޓްރަމްޕް އިތުރަށް ވިދާޅުވީ، ޔަމަނުގައި ހަރަކާތްތެރިވާ އީރާނަށް ތާއީދުކުރާ ހޫޘީން އެމަނިކުފާނުގެ ސަރުކާރަށް ގުޅާފައިވާ ކަމަށެވެ. އަދި މި ހަމަނުޖެހުމުގެ ތެރެއަށް އެމެރިކާ ސީދާގޮތުން ވަންނަން އެ ޖަމާއަތުން ބޭނުންނުވާކަން ހާމަކޮށްފައިވާ ކަމަށް ވެސް ޓްރަމްޕް ވިދާޅުވި އެވެ.
"އެމެރިކާ މިކަމުގެ ތެރެއަށް ވަންނާކަށް އެމީހުން (ހޫޘީން) ބޭނުމެއް ނުވޭ. އަދި ގިނަ އުޅަނދުފަހަރު ދަތުރުކުރުމުގެ ފުރުސަތު އެމީހުން ދޭ. އެމީހުން ހިތްހަމަނުޖެހޭ އެންމެ ގައުމެއް އެބައޮތް، އެކަން އަހަރެމެން ހައްލުކުރާނަން،" ޓްރަމްޕް ވިދާޅުވި އެވެ.
