ސައުދީ އަރަބިއްޔާގެ ތެޔޮ ހޮޅިއަކަށް ދިން ހަމަލާއަކާ އެކު، ދުނިޔޭގެ ހަކަތައިގެ ސަޕްލައިއަށް ބޮޑެތި ބުރޫތަކެއް އަރާފާނެ ކަމުގެ ބިރު ހީވެފައި ވަނިކޮށް، އާދީއްތަ ދުވަހު ސައުދީ އަރަބިއްޔާއަށާއި ގަލްފުގެ ކަނޑުގެ ސަރަހައްދުގައި އޮތް އުޅަނދުތަކަށް އަނެއްކާވެސް ހަމަލާތައް ދީފި އެވެ.
ދުނިޔޭގައި އެންމެ ގިނައިން ތެޔޮ އެކްސްޕޯޓްކުރާ ސައުދީ އަރަބިއްޔާގެ ސަޕްލައިއަށް މި ހަފުތާ ބަންދުގައި ކުރިމަތިވި ހުރަސްތަކާ ގުޅިގެން، ދުނިޔޭގެ ބާޒާރުގައި އަނެއްކާވެސް ތެލުގެ އަގު އުފުލޭނެ ކަމަށް ވިޔަފާރިވެރިން މިހާރު އަންނަނީ ލަފާކުރަމުންނެވެ.
ގަލްފު ސަރަހައްދުގައި ހިނގި އެންމެ ފަހުގެ ހާދިސާތަކަށް ބަލާއިރު، ހޮރްމޫޒް ކަނޑުއޮޅިން ދަތުރުކުރި އުޅަނދަކަށް ހަމަލާއެއް އަމާޒުވެ، އެ އުޅަނދުގައި ރޯވުމުގެ ސަބަބުން ފަޅުވެރިން ބާލަން ޖެހިފައިވާ ކަމަށް އިނގިރޭސިވިލާތުގެ މެރިޓައިމް ސެކިއުރިޓީ އެޖެންސީ (ޔޫކޭއެމްޓީއޯ) އިން އާދީއްތަ ދުވަހު ވަނީ ބުނެފަ އެވެ.
މީގެ އިތުރުން، އީރާނުގެ އައްސޭރިފަށުން ދަތުރުކުރި އެ ގައުމުގެ ވިޔަފާރި އުޅަނދަކަށް ދިން ހަމަލާއެއްގައި އެކަކު މަރުވެ، ހަތަރު ފަޅުވެރިއަކު ޒަހަމްވެފައިވާ ކަމަށް އީރާނުން ވަނީ ހާމަކޮށްފަ އެވެ.
ސައުދީ އަރަބިއްޔާގެ ދެކުނުން ޖާޒާން ޕްރޮވިންސަށް ހޫތީން ދިން ކަމަށް ބުނާ ހަމަލާތަކުގައި އެ ސަރަހައްދުގެ ގެދޮރަށާއި މިސްކިތަކަށް ލިބިފައިވާ ގެއްލުންތައް ދައްކުވައިދޭ ވީޑިއޯތައް އެ ގައުމުގެ ދައުލަތުގެ މީޑިއާއިން ވަނީ އާންމުކޮށްފަ އެވެ.
މީގެ އިތުރުން، ޖާޒާންއާ އިންވެގެން އޮތް ޕްރޮވިންސެއްގައި ހުންނަ ސައުދީގެ އަސްކަރީ މަރުކަޒަކަށް ވެސް ހަމަލާދީފައިވާނެ ކަމަށް ހޫތީންގެ ބަޔާނެއްގައި ބުންޏެވެ.
ސައުދީގެ ދެކުނުގެ ސިޓީތަކަށް މިދިޔަ ހަފުތާއިން ފެށިގެން މެދުނުކެނޑި ހަމަލާތަކުގެ އިންޒާރު ލިބެމުންދާއިރު، މިދިޔަ ހުކުރު ދުވަހު ޑްރޯން ބޭނުންކޮށްގެން ދިން ހަމަލާތަކެއްގައި ވަނީ އަރަބި ކަނޑުއޮޅި ހުރަސްކޮށް 1،200 ކިލޯމީޓަރަށް ދެމިގެންވާ އީސްޓް-ވެސްޓް ޕައިޕްލައިންގެ މަސައްކަތް ހުއްޓުވާލާފަ އެވެ.
މިއީ ހޮރްމޫޒް ކަނޑުއޮޅި ބޭނުންނުކޮށް، މެދުއިރުމަތީގެ ތެޔޮ ދުނިޔޭގެ ބާޒާރަށް ފޯރުކޮށްދިނުމަށް ބޭނުންކުރާ މައިގަނޑު މަގެވެ.
ހަމަ އެ ދުވަހު، ރަތްކަނޑުގެ ދޮރާށީގެ ގޮތުގައި ބެލެވޭ ބާބުލް މަންދަބް ކަނޑުއޮޅީގެ މެދުގައި އޮންނަ ޕެރިމް އައިލެންޑް ވެސް ހޫތީންގެ ބާރުގެ ދަށަށް ވަނީ ގެންގޮސްފަ އެވެ.
