ސަރަހައްދީ ކަނޑުގެ ދަތުރުފަތުރުތަކަށް ކުރިމަތިވަމުންދާ ނުރައްކާތަކާ މެދު ކަންބޮޑުވުން އިތުރުވެފައިވާ ދަނޑިވަޅެއްގައި، ޔަމަނުގެ ހޫޘީންނާ ގުޅޭ ޖާސޫސީ މައުލޫމާތު އެމެރިކާ މެދުވެރިކޮށް އިސްރާއީލުން ސައުދީ އަރަބިއްޔާއަށް ފޯރުކޮށްދޭން ފަށާފައިވާ ކަމަށް ރިޕޯޓުތައް ބުނެފި އެވެ.
އިސްރާއީލުގެ ދައުލަތުގެ މީޑިއާ، "ކާން" އިން އަންގާރަ ދުވަހު ރިޕޯޓުކޮށްފައިވާ ގޮތުގައި، މި ޖާސޫސީ މައުލޫމާތު ހިއްސާކުރުމުގެ އިންތިޒާމު ހަމަޖެހިގެން ދިޔައީ އެމެރިކާގެ އެހީތެރިކަމަށް ސައުދީ އަރަބިއްޔާއިން އެދުމާ ގުޅިގެންނެވެ. އެ މީޑިއާއިން މި މައުލޫމާތު ހާމަކޮށްފައިވަނީ މިކަމާ ގުޅޭ މައުލޫމާތު އެނގޭ ސަރަހައްދީ ޑިޕްލޮމެޓަކާ ހަވާލާދީ އެވެ.
އެ ރިޕޯޓުގައިވާ ގޮތުން، ސައުދީގެ އެދުމާ ގުޅިގެން ވޮޝިންޓަނުން އިސްރާއީލުގެ އޮފިޝަލުންނާ މަޝްވަރާކުރި އެވެ. އަދި ހޫޘީންނަކީ މުޅި ސަރަހައްދީ ސަލާމަތަށް އޮތް ނުރައްކަލެއް ކަމަށް ބަލައި، އެ ގްރޫޕާ ގުޅޭ ޖާސޫސީ މައުލޫމާތު ފޯރުކޮށްދިނުމަށް އިސްރާއީލުން ވަނީ އެއްބަސްވެފަ އެވެ.
މި ދެ ގައުމުގެ މެދުގައި ޖާސޫސީ މައުލޫމާތު ހިއްސާކުރަން ފަށާފައި މިވަނީ، އިސްރާއީލާއި ސައުދީ އަރަބިއްޔާއާ ދެމެދު ރަސްމީ ހާރިޖީ ގުޅުމެއް ގާއިމުކޮށްފައި ނުވަނީހެވެ.
މީގެ އިތުރުން، ސައުދީގެ ވަލީއަހުދު މުހައްމަދު ބިން ސަލްމާން އާއި މިސްރުގެ ރައީސް އަބްދުލް ފައްތާހު އަލް ސީސީ ގާހިރާގައި ބޭއްވެވި ބައްދަލުވުމުގެ ހަވާސާގައި ކުރިއަށްދިޔަ ސަލާމަތީ މަޝްވަރާތަކުގައި، އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ މަންދޫބުން ވެސް ބައިވެރިވެފައިވާ ކަމަށް ރިޕޯޓުތައް ބުނެ އެވެ.
އެ މަޝްވަރާތަކުގައި އެމެރިކާގެ އޮފިޝަލުން ވަނީ ހޫޘީންގެ ހަމަލާތަކަށް ގުޅިގެން ރައްދު ދިނުމުގެ ގާބިލުކަން ވަރުގަދަކުރުމަށްޓަކައި، ސަރަހައްދީ ކޮމާންޑް އޮނިގަނޑަކާއި މައުލޫމާތު ބަދަލުކުރާނެ ނިޒާމެއް ގާއިމުކުރުމަށް ހުށަހަޅާފަ އެވެ.
މި މަޝްވަރާތަކުގެ މައުލޫމާތު އެނގޭ އޮފިޝަލަކު ވިދާޅުވި ގޮތުގައި، ހޫޘީންނާ ދެކޮޅަށް އިސްރާއީލުން ކުރަމުންދާ އަސްކަރީ ކުރިމަތިލުންތަކުގެ ތެރެއިން އެ ގްރޫޕުގެ ލަޝްކަރުތަކާއި އިންފްރާސްޓްރަކްޗާއާ ބެހޭ މުހިންމު ޖާސޫސީ މައުލޫމާތުތަކެއް އިސްރާއީލަށް ލިބިފައިވާ ކަމަށް އެމެރިކާގެ މަންދޫބުން ބައްދަލުވުމުގެ ބައިވެރިންނަށް ކިޔައިދީފައިވެ އެވެ.
މިގޮތަށް ޖާސޫސީ މައުލޫމާތު ހިއްސާކުރުމުގެ މައިގަނޑު މަގުސަދަކީ، ރަތް ކަނޑާއި އަދަން ކަނޑުއޮޅި ގުޅުވައިދޭ މުހިންމު ސަރަހައްދެއް ކަމަށްވާ ބާބުލް މަންދަބު ކަނޑުއޮޅިން ދަތުރުކުރާ އުޅަނދުފަހަރަށް މިނިވަންކަމާއެކު ދަތުރުކުރުމުގެ ފުރުސަތު ހޯދައިދިނުމެވެ.
ޖާސޫސީ މައުލޫމާތު ހިއްސާކުރުމަށް އެއްބަސްވެފައިވާ ކަމަށް ބުނާ ރިޕޯޓުތަކާ ގުޅޭގޮތުން ސައުދީ އަރަބިއްޔާ ނުވަތަ އިސްރާއީލުގެ ސަރުކާރުން މިހާތަނަށް ރަސްމީކޮށް އެއްޗެއް ބުނެފައެއް ނުވެ އެވެ.
