ރޭގެ ވަގުތެއްގައި ނަގިލި ކަހާލައިގެން ގޮސް ސިނަމާލެ ބްރިޖުގެ ތަނބަކަށް އުރުނު ދެ ބޯޓު ދިޔަވެ އަޑިއަށް ހިނގައްޖެ ކަމަށް މޯލްޑިވްސް ނޭޝަނަލް ޑިފެންސް ފޯސްއިން ބުނެފި އެވެ.
މީޑިއާތަކަށް އެމްއެންޑީއެފުން ފޮނުވި މެސެޖެއްގައި ބުނީ އެ ދެ ބޯޓު އަޑިއަށް ގޮސްފައި ވަނީ ރާޢްޖޭގެ ސަރަހައްދުން 30 ނޯޓިކަލް މޭލު ބޭރަށް ކަމަށެވެ.
"ތެޔޮއުފުލާ މި 2 ބޯޓަކީ ވަރަށް ބައުވެފައިވާ 2 ބޯޓަށް ވުމާއިއެކު، މި 2 ބޯޓުވަނީ ދިޔަވެ، މާލެ އަތޮޅުގެ އިރުން، ރާއްޖޭގެ ސަރަހައްދުން 30 ނޯޓިކަލްމޭލު ބޭރަށް މިރޭގެ ވަގުތެއްގައި އަޑިއަށް ގޮސްފައެވެ،" އެމްއެންޑީއެފުން ފޮނުވި މެސެޖުގައި ބުންޏެވެ.
އެ ދެ ބޯޓު އޮޔާ ގޮސް ފުރަތަމަ އުރުނީ މާލޭގެ އިރުމަތީ ފަރާތު ފަރަށެވެ. އޭގެފަހުން، ސިނަމާލެ ބްރިޖުގެ ތަނބަކަށް ގޮސް އުރުނީ އޭގެ ފަހުންނެވެ. އޭރު އޭގައި ނުވަ މީހުން ތިބި ކަމަށް ސިފައިން ބުންޏެވެ. ނަމަވެސް، ރޭގެ ވަގުތެއްގައި އެ ހުރިހާ އެންމެން ސިފައިން ވަނީ ސަލާމަތްކޮށްފަ އެވެ.
ބްރިޖަށް އުރުނު ދެ ބޯޓުގެ ހާލަތާއި ނުރައްކާތެރި ހާދިސާއެއް ހިނގާފާނެކަން ދޮޅުމަސްކުރިން ސަރުކާރަށް އެނގޭ
ސިނަމާލެ ބްރިޖަށް އުރުނު ދެ ބޯޓަކީ ހުއްދަނެތި ރާއްޖެއަށް ވަދެފައިވާ، އަދި ނުރައްކަލެއް ދިމާވެދާނެތީ ތިލަފުށްޓަށް ބަދަލުކުރަން މީގެ ދޮޅުމަސް ކުރިން ނިންމާފައިވާ ދެ ބޯޓެވެ. މި ބޯޓުތަކުގައި ނެވިގޭޝަން ލައިޓާއި ނަގިލި ފަދަ ވަސީލަތްތައް މަދުވުމުގެ ޝަކުވާ ލިބިފައިވާއިރު، ބޯޓުތައް ބަދަލުކުރުމުގެ ހުއްދަ އެޗްޑީސީން އޮތީ ޖުލައި މަހު ދީފައެވެ.
އެ ހާދިސާ ހިނގާފައި ވަނީ އެފަދަ ހާދިސާއެއް ހިނގައިފާނެ ކަމުގެ ބިރަށް އެ ދެ ބޯޓު ރައްކާތެރި ތަނަކަށް ގެންގޮސް ބަނދަރުޖަހަން މީގެ ދޮޅު މަސްކުރިން ނިންމާފައި އޮއްވަ އެވެ.
އެކަން ކުރަން ނިންމާފައި އޮތީ ސިފައިންނާއި އެމްޕީއެލްގެ ބެލުމުގެ ދަށުން ކަމަށާއި، އެކަމުގައި ފުލުހުންގެ އެހީތެރިކަން ބޭނުންވާ ނަމަ، ފުލުހުންގެ އެހީތެރިކަން ހޯދަން ވެސް އޭރު އޮތީ ނިންމައިފަ އެވެ.
އިތުބާރު ހުރި މަސްދަރުތަކުން މި ނޫހަށް އެނގިފައިވާގޮތުން، އެ ދެ ބޯޓު ތިލަފުށްޓަށް ބަދަލުކުރަން ނިންމާފައި އޮތީ ޖުލައި 16، ގަ އެވެ. ތިލަފުށީގައި އެ ދެ ބޯޓު ބަނދަރުޖެހުމުގެ ހުއްދަ އެޗްޑީސީން ވެސް އޮތީ ދީފަ އެވެ.
ނަމަވެސް، އެ ދެ ބޯޓު ތިލަފުށްޓަށް ނުގެންގޮސް މާލެ ކައިރީގައި އަޅާފައި އޮތް ސަބަބެއް ނޭނގެ އެވެ.
އެ ދެ ބޯޓުގައި ވެސް ދަތުރުކުރާއިރު ދިއްލަން ލާޒިމުކުރާ ނެވިގޭޝަން ލައިޓުތައް ނުދިއްލޭ ކަމަށާއި އޭގެ ސަބަބުން އެ ސަރަހައްދުން ދަތުރުކުރާ ފަރާތްތަކުން އެކަމުގެ ޝަކުވާ ކުރަމުންދިޔަކަމަށް ވެސް މި ނޫހަށް އެނގިފައިވެ އެވެ.
ބްރިޖަށް އުރުނު ދެ ބޯޓުން ރާއްޖެއަށް އެއްޗެއް އެތެރެކުރިކަމުގެ ހެއްކެއް ނެތް ކަމަށް ބުނެ ދިނީ ޖޫރިމަނާގެ އަދަބު އެކަނި
ހައިޓީގައި ރަޖިސްޓްރީކޮށްފައިވާ މި ދެ ބޯޓުން ކުރެ ކޮންމެ ބޯޓެއް 310,000 ރުފިޔާއިން ޖޫރިމަނާކޮށްފައިވީ ނަމަވެސް، ކަނޑައެޅި މުއްދަތު ހަމަވިއިރުވެސް އެ ފައިސާ ދައްކާފައެއް ނުވެއެވެ.
އަދި، އެ ދެ ބޯޓުގެ ތެރެއިން އެއް ބޯޓުގައި ނަގިއްޔެއް ނެތްކަމަށާއި، އިންޖީނު ވެސް މަސައްކަތް ކުރަނީ އެންމެ ބޯޓެއްގައިކަމަށް މި ނޫހަށް މައުލޫމާތު ވަނީ ލިބިފަ އެވެ.
އިތުބާރު ހިފޭ މަސްދަރުތަކުން އަދަދު އަށް ކަށަވަރުކޮށްދިން ގޮތުގައި، އެ ދެ ބޯޓަކީ އެއްވެސް ހުއްދައަކާ ނުލައި އޭޕްރިލް 26، ގައި ރާއްޖެއަށް ވަތް ދެ ބޯޓެވެ. ނަމަވެސް، އެ ދެ ބޯޓުގެ މައުލޫމާތު ސަލާމަތީ ބާރުތަކަށް އެނގުނީ އޭގެ ހަފުތާއެއް ފަހުން، މާލެ ކައިރީގައި އެ ބޯޓުތައް އަޅާފައި އޮއްވަ އެވެ.
ދެ ބޯޓަކީ އެމްޓީ ކޭޖީ 1 އަދި އޭއެލް 1 ނަމަކަށް ކިޔާ ދެ ބޯޓެވެ. އެ ދެ ބޯޓަކީ ވެސް ރިޕަބްލިކް އޮފް ހައިޓީގެ ރެޖިސްޓްރީގައި އޮތް، އެހެންނަމަވެސް، ވެރިފަރާތް ކަށަވަރު ނުކުރެވޭ ދެ ބޯޓުކަމަށް މި ނޫހަށް މައުލޫމާތު ދިން ފަރާތްތަކުން ބުންޏެވެ.
