ދެ ބޯޓުގެ މައްސަލަ: ގެއްލުމުގެ ބަދަލު ހޯދުމަށާއި، އިދާރާތަކުގެ އިހުމާލު ތަހުގީގުކުރަން ސިޓީ ކައުންސިލުން ގޮވާލައިފި

Sep 14, 2026, 7:30 AM
ނަގިލި ކަހާލައިގެން ގޮސް ބޯޓު ބުރިޖަށް އުރިފައި. -- ފޮޓޯ: ސޯޝަލް މީޑިއާ

ނަގިލި ކަހާލައިގެން ގޮސް ބޯޓު ބުރިޖަށް އުރިފައި. -- ފޮޓޯ: ސޯޝަލް މީޑިއާ

ރާއްޖޭގެ ސަރަހައްދަށް ގާނޫނާ ހިލާފަށް އެތެރެވި ބޭރުގެ ދެ ބޯޓެއްގެ ނަގިލި ކަހާލައިގެން، މާލޭގެ އިރުމަތީ ފަރާތު ފަރަށާއި ސިނަމާލެ ބްރިޖަށް އުރުނު މައްސަލައިގައި، ދައުލަތުގެ އިދާރާތަކުގެ އިހުމާލު އޮތްތޯ ތަހުގީގުކޮށް، ހާދިސާގެ ސަބަބުން ލިބުނު ގެއްލުމުގެ ބަދަލު ހޯދުމަށް މާލެ ސިޓީ ކައުންސިލުން ގޮވާލައިފި އެވެ.

އެމްޓީ ކޭޖީ 1 އަދި އޭއެލް 1 ނަމަކަށް ކިޔާ މި ދެ ބޯޓު އެފްރިކާއިން ފުރައިގެން ރާއްޖޭގެ ސަރަހައްދަށް ވަގަށް ވަދެފައިވަނީ އޭޕްރީލް 26، ގަ އެވެ. ނަމަވެސް އެ ދެ ބޯޓު ވަގަށް ވަދެފައިވާކަން ކަމާބެހޭ އިދާރާތަކަށް އެނގުނީ މާލެއާ ކައިރީގައި ބަނދަރުކޮށްގެން އޮންނަތާ ހަފުތާއެއް ފަހުންނެވެ.

މި ދެ ބޯޓު މައްސަލަ ހައްލުކުރަން ދިގުލައިގެން ދިޔައިރު، މި މަހުގެ 10 ވަނަ ދުވަހުގެ ރޭ  ދެ ބޯޓުގެ ނަގިލި ކަހާލައިގެން އޮޔާގޮސް، މާލޭ ފަރަށާއި ސިނަމާލެ ބްރިޖަށް އުރުނެވެ. 

މި ހާދިސާއާ ގުޅިގެން ކައުންސިލުން އިއްޔެ ނެރުނު ބަޔާނެއްގައި ވަނީ، މިކަމުގައި ކަމާބެހޭ އިދާރާތަކުގެ އިހުމާލު އޮތް ކަމަށް ތުހުމަތުކޮށް، އެކަންކަން މިނިވަންކަމާއެކު ބެލުމަށް އިލްތިމާސްކޮށްފަ އެވެ. މި އުޅަނދުތައް ކަސްޓަމްސްގެ ބެލުމުގެ ދަށުގައި މާލޭ ބަނދަރުގައި އޮތްއިރު، އެކަށީގެންވާ ސަލާމަތީ ފިޔަވަޅުތައް އަޅާފައި ނުވާކަން ވެސް ކައުންސިލުން ވަނީ ފާހަގަކޮށްފަ އެވެ. 

މި ހާދިސާ ހިނގައިދިޔަ ގޮތުގެ ސައްހަ މައުލޫމާތު ދައުލަތުގެ އިދާރާތަކުން މިހާތަނަށް ރައްޔިތުންނަށް ހާމަކޮށްފައި ނުވާތީއާއި، މިއީ މުއައްސަސާތަކުން ގާނޫނީ ޒިންމާ އަދާނުކުރުމުގެ ސަބަބުން ހިނގި ކަމެއް ކަމަށް ތުހުމަތު ކުރަމުންދާތީ ކައުންސިލުން ވަނީ އިންތިހާއަށް ކަންބޮޑުވުން ފާޅުކޮށްފަ އެވެ.

ލާމަރުކަޒީ ގާނޫނުގެ ދަށުން މާލެ ސިޓީގެ އިހުތިސާސްގައިވާ ތިމާވެއްޓާއި، ފަރުތަކާއި، އުމްރާނީ ވަސީލަތްތައް ރައްކާތެރިކުރުމަކީ ކައުންސިލްގެ ޒިންމާއެއްކަން ފާހަގަކުރަމުން، ކައުންސިލުން ވަނީ މައިގަނޑު ތިން ކަމަކަށް ގޮވާލާފަ އެވެ.

އެއީ މި އުޅަނދުތައް ރާއްޖެއަށް އެތެރެވި ގޮތާއި، ކަސްޓަމްސްގެ ބެލުމުގެ ދަށުގައި އޮއްވައި މި ހާދިސާ ހިނގަން މެދުވެރިވި ސަބަބު ބަލައި، އިހުމާލުވި ފަރާތްތައް ކަށަވަރު ކުރުމަށް މިނިވަން ޕަބްލިކް އިންކުއަރީއެއް ހިންގައި އޭގެ ރިޕޯޓު އާންމުކުރުމެވެ.

ދެވަނަ ކަމެއްގެ ގޮތުގައި ކައުންސިލުން އެދިފައިވަނީ، އެންވަޔަރަންމަންޓަލް ރެގިއުލޭޓަރީ އޮތޯރިޓީ މެދުވެރިކޮށް ފަރަށް ލިބުނު ގެއްލުން ވަޒަންކޮށް، ބްރިޖަށް ލިބުނު ގެއްލުމުގެ މާލީ ބަދަލު ހޯދުމަށެވެ. އަދި ތިންވަނަ ކަމެއްގެ ގޮތުގައި، ދެ އުޅަނދު ޖެހުމުގެ ސަބަބުން ސިނަމާލެ ބްރިޖުގެ މައި ތަނބުތަކަށާއި ޕްލެޓްފޯމަށް ލިބުނު ގެއްލުންތައް އިންޖީނިއަރިންގ އޮޑިޓަކުން ކަށަވަރުކޮށް، ބްރިޖުގެ ރައްކާތެރިކަން އާންމުންނަށް ޔަގީންކޮށްދިނުމަށް ވަނީ ގޮވާލާފައެވެ.

މި ދެ ބޯޓު ރާއްޖޭގެ ސަރަހައްދުގެ 30 މޭލް ބޭރަށް އަޑިއަށް ގޮސްފައިވާ ކަމަށް އެމްއެންޑީއެފުން ބުނެފައިވެ އެވެ. ނަމަވެސް އޭގެ އެއްވެސް ފުޓޭޖެއް ހާމަކޮށްފައެއް ނެތެވެ. 

ކޮމެންޓް

ފަހުގެ ޚަބަރު

އިހަވަންދިއްޕޮޅުގައި ވިޔަފާރި ބަނދަރު ހަދަން ސޮއިކޮށްފި

އިހަވަންދިއްޕޮޅުގައި ބައިނަލްއަގުވާމީ ވިޔަފާރި ބަނދަރަކާއި މެރިޓައިމް އަދި ސިނާއީ މަސައްކަތްތަކަށް ބޭނުންވާ ވަސީލަތްތައް ގާއިމުކުރުމަށް ޔޫއޭއީގެ ސަހު ގްރޫޕާއެކު ސަރުކާރުން މިއަދު ސޮއިކޮށްފިއެވެ. މި މަޝްރޫއުގެ ދަށުން އެ ސަރަހައްދުގައި ޓޫރިޒަމް ތަރައްގީކުރުން ވެސް ހިމެނޭއިރު، މިއީ ރާއްޖޭގެ އެންމެ އުތުރުގައި އިގްތިސާދީ ހަރަކާތްތައް ފުޅާކުރުމަށް ކުރިއަށްގެންދާ މުހިންމު މަސައްކަތެކެވެ.

މާދަމާރޭގެ ޖަލްސާއަށް ދާން ސަރުކާރު މުވައްޒަފުންނަށް އަންގައިފި

މާދަމާރޭ ބާއްވާ ޖަލްސާއަށް، ސަރުކާރުގެ ހުރިހާ މުވައްޒަފުން އެމީހުންގެ އަނބިން ނުވަތަ ފިރިންނާއެކު ބައިވެރިވުމަށް ރައީސުލްޖުމްހޫރިއްޔާ ވަނީ ދައުވަތު އަރުވާފައެވެ. މި ޖަލްސާއަށް ދާ މުވައްޒަފުންނާއި އެމީހުންގެ އަނބިފިރިންގެ މައުލޫމާތު މިއަދު މެންދުރުގެ ކުރިން ރައީސް އޮފީހަށް އެންގުމަށް ވުޒާރާތަކަށް ވަނީ އަންގާފައެވެ.

އަދާލަތުން ސަރުކާރަށް ތާއީދުކުރުމުން އަލީ ޒާހިރު ފާޑުވިދާޅުވެއްޖެ

އޭނާ ވިދާޅުވީ މިއީ ގިނަ ބައެއްގެ އުއްމީދުތަކާއި ބުރަ މަސައްކަތް ފޮހެވިގެންދާނެ ހިތާމަވެރި ނިންމުމެއް ކަމަށެވެ. އަދާލަތުން މި ނިންމުން ނިންމާފައިވަނީ 2028 ވަނަ އަހަރުގެ ރިޔާސީ އިންތިޚާބުގައި ރައީސް މުޢިއްޒަށް ތާއީދުކުރުމުގެ ގޮތުންނެވެ.

ބަޖެޓު ރާވާފައި ވަނީ މުވައްޒަފުން ނުނަގާ ހިންގޭ ގޮތަށް: ފިނޭންސް

މަޖިލީހަށް މައުލޫމާތު ދެމުން ފިނޭންސުން ބުނީ އަންނަ އަހަރުގެ ބަޖެޓު ރާވާފައި ވަނީ އާ މުވައްޒަފުން ނުނަގާ ދައުލަތް ހިންގޭ ގޮތަށް ކަމަށް. އަދި މުސާރަ ކަނޑައެޅުމުގައި ބަލަނީ ދައުލަތުގެ ފޯރުންތެރިކަން ހުރި މިންވަރަށް ކަމަށް.

ޕެންޝަން އޮފީހުގެ ސީއޯއޯގެ މަގާމުން ޝިއުނާ ވަކިކޮށްފި

ޕެންޝަން އޮފީހުގެ ސީއޯއޯގެ މަގާމުން މަރިޔަމް ޝިއުނާ ވަކިކޮށްފައިވަނީ، އެ އޮފީހުގެ ޗެއާޕާސަނާ ގުޅޭ މައްސަލަތަކެއް ކަމާބެހޭ އިދާރާތަކަށް ހުށަހެޅުމާއި ސަރުކާރުން ފައިސާ ޗާޕުކުރި މުއާމަލާތާ ދެކޮޅު ހެދުމުންނެވެ. މިދިޔަ ސެޕްޓެމްބަރު މަހުން ފެށިގެން ސަސްޕެންޝަނުގައި ހުރި ޝިއުނާ އެ މަގާމުން ވަކިކުރިއިރު، އޭނާއަކީ މީގެ ކުރިން އޭސީސީގެ ރައީސްކަންވެސް ކުރައްވާފައިވާ ބޭފުޅެކެވެ.

ރަސްމާލެ ވިއްކާލުމާ ދެކޮޅަށް އިހުތިޖާޖަށް ނުކުންނަން ގޮވާލައިފި

ބޭރުގެ ބަޔަކަށް 99 އަހަރަށް ރަސްމާލެ ވިއްކާލުމާ ދެކޮޅަށް އެމްޑީޕީން އެކަތިގަނޑެއްގެ ގޮތުގައި އިހުތިޖާޖަށް ނުކުތުމަށް މެންބަރު މީކާއިލް ގޮވާލައްވައިފިއެވެ. މި މަޝްރޫއާ މެދު ރައްޔިތުންގެ ފެންނަނުފެންނަ ވޯޓެއް ނެގުމަށް އެމްޑީޕީން ގަރާރެއް ހުށަހަޅާފައިވާއިރު، އެކަމުގައި ޕާޓީގެ ޒިންމާ ބޮޑުކަމަށް މީކާއިލް ފާހަގަކުރެއްވިއެވެ.

ޕީއެންސީއާއެކު އަދާލަތުން ކޯލިޝަން ހަދައިފި

މި އެއްބަސްވުމުގެ ދަށުން ސަރުކާރުގެ އިސް މަގާމުތައް އަދާލަތު ޕާޓީގެ މެންބަރުންނަށް ދިނުމަށް ވަނީ ހަމަޖެހިފައެވެ. އަދާލަތު ޕާޓީއަކީ މީގެ ކުރިން އެމްޑީޕީ އަދި ޕީޕީއެމްގެ ސަރުކާރުތަކުގައިވެސް ކޯލިޝަން ބައިވެރިއެކެވެ.

Newsletter

Get the latest news delivered straight to your inbox