މިހާރު ކުރިއަށްދާ 50 ވަނަ ގައުމީ ބެޑްމިންޓަން މުބާރާތުން ފެށިގެން ރާއްޖޭގެ ޖޫނިއާ އުމުރުފުރާތަކުގެ ކުޅުންތެރިންނަށް، އެ އުމުރުފުރާތަކުން ގައުމީ ޗެމްޕިއަނަކަށް ވުމުގެ ޝަރަފް ހޯދުމުގެ ފުރުސަތު ލިބޭނެ ކަމަށް ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އިން ބުނެފި އެވެ.
ބެޑްމިންޓަން އެސޯސިއޭޝަނުން އެންމެ ފަހުން ގައުމީ ބެޑްމިންޓަން މުބާރާތް ބާއްވާފައިވަނީ، 2023 ވަނަ އަހަރުގެ ޖުލައި މަހު އެވެ. އެއީ، 49 ވަނަ އެޑިޝަން އެވެ. އޭގެ ތިން އަހަރު ފަހުން، ގައުމީ ބެޑްމިންޓަން މުބާރާތް މިދިޔަ ހުކުރު ދުވަހުން ފެށިގެން މި މަހު 20 ވަނަ ދުވަހުގެ ނިޔަލަށް ކުޅިވަރު އެކުވެނި ބެޑްމިންޓަން ކޯޓުގައި ކުރިއަށްދާނެ އެވެ.
މުބާރާތާ ގުޅޭގޮތުން، "އަދަދު ސްޕޯޓްސް" އަށް ބެޑްމިންޓަން އެސޯސިއޭޝަންގެ ރައީސް، އިޝްފާން މުހައްމަދު (އިއްޕަ) ވިދާޅުވީ، ގައުމީ މުބާރާތުގެ ޖޫނިއާ އާއި ސީނިއާ ކެޓަގަރީތަކަށް ބަލާއިރު، 445 އެންޓްރީސް ހަދާފަައިވާ ކަމަށެވެ. އަދި، މި ފަހަރުގެ މުބާރާތް، އެކި ގޮތްގޮތުން ވިސްނާފައި ބަދަލުތަކެއް ގެނެސްގެން ކުރިއަށްގެންދާކަން އިއްޕަ ފާހަގަކުރެއްވި އެވެ.
"ސީނިއާ ކެޓަގަރީން ވެސް އަލަށް އެ ކުޅެނީ ހެނދުނު. މިދިޔަ 20 ވަރަކަށް އަހަރު، ގައުމީ މުބާރާތުގެ ފުރަތަމަ ޑިވިޝަނުގެ މެޗެއް ހެނދުނަކު ނުއެއް ކުޅޭ. ފުރަތަމަ ޑިވިޝަނުގައި ފިިރިހެން އަށް ޓީމު އޮވެގެން މުބާރާތެއް ކުޅެފައި އޮތް ހެނެއް ހިއެއްނުވޭ. މިހާރު އެބައޮތް އަށް ޓީމު، އަންހެން ތިން ޓީމު، ދެ ވަނަ ޑިވިޝަނުގައި ފިރިހެން ހަތަރު ޓީމު، އަންހެން ފަސް ޓީމު،" މުބާރާތާ ގުޅޭ މުހިންމު ބަދަލުތަކާއި ތަފާސްހިސާބުތަކަށް އަލިއަޅުވާލައްވައި، އިއްޕަ ވިދާޅުވި އެވެ.
މި ފަހަރުގެ ގައުމީ މުބާރާތުގެ ޖޫނިއާ އިވެންޓްތަކުގައި 226 ކުޅުންތެރިން ވާދަކުރާއިރު، ސީނިއާ ކެޓަގަރީގެ ފުރަތަމަ ޑިވިޝަނާއި ދެ ވަނަ ޑިވިޝަނުގައި ޖުމްލަ އެކު، 214 ކުޅުންތެރިން ފެނިގެންދެ އެވެ. އިންޑިވިޖުއަލް އިވެންޓްތަކުގެ ޖުމްލަ އަދަދަކީ 35 އިވެންޓެވެ. ޓީމު އިވެންޓްގައި، ހަތަރު އިވެންޓްގައި ޖުމްލަ އެކު، 20 ޓީމު ވާދަކުރެ އެވެ.
މި ފަހަރުގެ ގައުމީ ބެޑްމިންޓަން މުބާރާތުގެ އެންމެ ބޮޑު ބަދަލަކީ، މި މުބާރާތުން ޒުވާން އުމުރުފުރާތަކުގެ ކުޅުންތެރިންނަށް ދިން ފުރުސަތުތަކެވެ. އަދި، އެކި އެކި އުމުރުފުރާތަކުން ގައުމީ ޗެމްޕިއަނުން ކަނޑައެޅުމަކީ، ކުޅުންތެރިއެއްގެ މުސްތަގުބަލަށް ވެސް ފައިދާކުރާނެ ކަމެއްގެ ގޮތުގައި ބެޑްމިންޓަން އެސޯސިއޭޝަނުން ގަބޫލުކުރެ އެވެ.
އިއްޕަ ވިދާޅުވީ، ގައުމީ މުބާރާތުގައި މި ގޮތަށް ޖޫނިއާ ކެޓަގަރީތައް ހިމަަނަން ވިސްނި މައިގަނޑު އެއް ސަބަބަކީ، ޖޫނިއާ ލެވަލްގައި އެހެން ގައުމުތަކުގައި ވެސް ގައުމީ ޗެމްޕިއަނުން ކަނޑައަޅައި އެ ޝަރަފް ކުޅުންތެރިންނަށް ދޭ ކަމަށެވެ.
"ދެން، އަސްލު ސީނިއާ ޗެމްޕިއަނަަކަށްވާއިރުގައި ޖޫނިއާ އެ އުމުރުފުރާތަކެއްގައި ގައުމީ ޗެމްޕިއަން ދީފައި، ގައުމީ މުބާރާތެއްގައި އެ ޝަރަަފް ދީފައި އިނީމަ. އެ މީހުންގެ ކެރިއަރަށް ވެސް ފައިދާ ކުރޭ، އިންޓަނޭޝަނަލް ލެވަލަށްދާއިރުގައި. ދެން، އެހެންވެ، ރަނގަޅު ބަދަލަކަށް 50 ވަނަ ގައުމީ މުބާރާތުގެ އަހަރުގައި އެ ބަދަލު ގެނައީ. އެއީ އެންމެ ބޮޑު މަގުސަދަކީ، އެ މީހުންނަށް ވެސް ގައުމީ ޗެމްޕިއަނެކޭ ބުނުމުގެ އެ ޝަރަފް ދިނުމުގެ ގޮތުން މި ފެށީ،"
މީގެ ކުރިން، ގަައުމީ ބެޑްމިންޓަން މުބާރާތް ކުރިއަށްދަނީ އަތޮޅު ލީގު ބެޑްމިންޓަން މުބާރާތާ ވެސް އެކީގަ އެވެ. އެކަމަކު، މިހާރު އޮތް ވިސްނުމަކީ، ދެ މުބާރާތް ވަކިން ކުރިއަށް ގެންގޮސް ވީހާވެސް ގިނަ ފުރުސަތުތަކެއް ޓީމުތަކާއި ކުޅުންތެރިންނަށް ލިބޭ ގޮތަށް ކަންކަން ރޭވުން ކަމަށް އިއްޕަ ފާހަގަކުރެއްވި އެވެ.
"މިހާރު އަތޮޅު ލީގު، އަތޮޅު ތެރޭގައި ނޫނީ މާލޭގައި ވަކި މުބާރާތެއްގެ ގޮތުގައި ދާނީ. މީގެ އަތޮޅު ތެރޭގެ ޑިވެލޮޕްމަންޓަށް މަސައްކަތް ކުރާ ހަމަ ސީރިއަސް ހުރިހާ އެންމެން ގާތްގަނޑަކަށް ޓީމު ރެޑީކޮށްފައި މި ހުރީ 15 އަހަރާއި 19 އަހަރާ ދޭތެރޭގެ ކުދިން ލައިގެން، އެކްސްޕީރިއަންސް ގެއިން ކުރަން ވެގެން ފުރަތަމަ ޑިވިޝަނަށް ޓީމު އިވެންޓް ވެސް އެ ކުޅެނީ. ހަމަ ސީރިއަސްކޮށް މިކަން ކުރާ މީހުންނަށް މި ދެ މުބާރާތުގެ ތަޖުރިބާ ވަކިން ވެސް އެބަ މުހިންމުވޭ،" އިއްޕަ ވިދާޅުވި އެވެ.
ގައުމީ ބެޑްމިންޓަން މުބާރާތުގައި މިހާރު ކުރިއަށްދަނީ، ޖޫނިއާ އުމުރުފުރާގެ އިވެންޓްތަކެވެ. މިއަދު، ފުރަތަމަ ޑިވިޝަންގެ ބައެއް މެޗުތައް ވެސް ފަށާނެ އެވެ.
އެންމެ ފަހުން، 2022 ވަނަ އަހަރު، ބޭއްވި ގައުމީ ބެޑްމިންޓަން މުބާރާތުގެ ސިންގަލްސް ބައިގެ ޗެމްޕިއަންކަން ހޯދީ ޒަޔާން ޒަކީ އާއި އާމިނަތު ނަބީހާ (ނަބީ) އެެވެ.
