ބުރު ސްޕޯޓްސް ކްލަބް އަތުން 4-1 އިން ކުރިހޯދައި، އޮޑި ސްޕޯޓްސް ކްލަބުން މި ފަހަރުގެ ދިރާގު ދިވެހި ޕްރިމިއާ ލީގުގައި ފުރަތަމަ މޮޅު ހޯދައިފި އެވެ.
މިދިޔަ ސީޒަނުގައި ލީގުގެ ދެ ވަނަ ހޯދައި، ޕްރެޒިޑެންޓްސް ކަޕްގެ ޗެމްޕިއަންކަަން ހޯދި އޮޑިން މި ސީޒަނުގައި މިހާތަނަށް ކާމިޔާބުކުރި ދެ މެޗުން ވެސް މޮޅުވީ ބުރު އަތުންނެވެ. އެ ގޮތުން، މި ސީޒަނުގެ ފުރަތަމަ މުބާރާތް، ކަޕް ވިނާސް ކަޕްގައި އޮޑިން ވަނީ 2-0 އިން ބުރު ބަލިކޮށްފަ އެވެ. ކަޕް ވިނާސް ކަޕްގައި ނިއު ރޭޑިއަންޓް ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން އަތުން އޮޑި ބަލިވިއިރު، ލީގުގައި ވެސް ވަނީ މާޒިޔާ އަތުން ބަލިވެފަ އެވެ.
އަނެއްކޮޅުން، ބުރުން މި ސީޒަނުގައި ކުޅުނު ފުރަތަމަ ފަސް މެޗުން ވެސް މި ވަނީ ބަލިވެފަ އެވެ. އެއީ، ކަޕް ވިނާސް ކަޕްގެ ތިން މެޗާއި ޕްރިމިއާ ލީގުގެ ދެ މެޗުންނެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗު ފަށައިގެން ބުރުން ރަނގަޅު ފުރުސަތެއް ހޯދި އެވެ. އެ ގޮތުން، އޮޑީގެ ޑިފެންސް ފަހަތުން ޖާގައެއް ހޯދައިގެން ކުރިއަށް އެރި ބުރަށް ކުޅޭ ކޮލަމްބިއާގެ ހަރޯލްޑް ޔޯޝުއޯ ފޮނުވާލި ހަމަލާ އޮޑީގެ ކީޕަރު، މުހައްމަަދު އަޝްވާން ވަނީ މަތަކޮށްފަ އެވެ.
އޮޑިން ވަނީ މެޗުގެ އަށް ވަނަ މިނިޓްގައި ލީޑުނަގައިފަ އެވެ. މިއީ، ކޯނަރަކުން އަހުޒަމް ރަޝީދު (އަހު) ނެގި ހުރަަހަކަށް އަރައި މުޒްދާން ހަސަން ބޮލުން ޖެހި ގޯލެކެވެ.
އޮޑި އަށް ލީޑުފުޅާކުރަން އަހު ނަަގައިިދިން ބޯޅައަކަށް އަރައި، އަޔާޒް އަހުމަދު (އަޔާ) ބޮލުން ފޮނުވާލި ހަމަލާ ދަނޑިކައިރިން ދިޔައިރު، އަހު އޭރިއާބޭރުން ޖެހި ޝޮޓެއް ބުރުގެ ކީޕަރު، ހަސަން އަލީފް އިބްރާހިމް ވަނީ މަތަކޮށްފަ އެވެ. އަދި، މުޒްދާން އަށް ބުރުގެ އޭރިއާތެރެއިން ހުސްކޮށް ލިބުނު ބޯޅައެއް ފޮނުވާލިއިރު، ދިޔައީ ހުރަސް ދަނޑިމަތިންނެވެ.
ބުރުން އެޓޭކަށް ޖެހިިގެން ކުޅެމުން ދިޔަ ދަނޑިވަޅުތަކުގައި ފުރުސަތުތަކެއް ހޯދި އެވެ. އެ ގޮތުން، އެ ޓީމުގެ އަބްދުﷲ ޔާމީން (ޔާނު) ޖެހި ޝޮޓެއް އޮޑީގެ ކީޕަރު އަޝްވާން ވަނީ މަތަކޮށްފަ އެވެ. އެކަމަކު، ފުރަތަމަ ހާފުގެ އިތުރު ވަގުތުގައި ބުރުގެ އާޖެންޓީނާ ފޯވާޑް، ޖުއާން އެޑުއާޑޯ ލެސްކާނޯ ވަަނީ ލަނޑު ޖަަހައިފަ އެވެ. މިއީ، އޮޑީގެ އަރީން އަބްދުﷲ އިބްރާހިމް ނެގި ކޯނަރަކުން އެޑުއާޑޯ ބޮލުން ގޯލަށް ބޯޅަ ފޮނުވާލައިގެން ޖެހި ގޯލެކެވެ.
ދެ ވަނަ ހާފުގައި އޮޑިން ކުރިއަށް ޖެހި ފޮނުވާލި ހަމަލާތައް ބުރުގެ ކީޕަރު އަލީފް ދިޔައީ މަތަކުރަމުންނެވެ. އެ ގޮތުން، މުޒްދާން އާއި އިބްރާހިމް ވަހީދު ހަސަން (އިއްބެ) ޖެހި ޝޮޓްތަކުގެ އިތުރުން، އަހުމަދު އައިހަމް (އައިހު) ހިލޭ ޖެހުމަކުން ފޮނުވާލި ބޯޅަ ވެސް ހުއްޓުވީ ކީޕަރު އަލީފް އެވެ.
އެކަމަކު، މެޗުގެ 75 ވަނަ މިނިޓްގައި، އޮޑީގެ މުހައްމަދު ސަހާއު (ބޭލް) ފޮނުވާލި ބޯޅަ އަލީފަށް މަތަނުކުރެވުނެވެ. ދެ ވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުތް ސަހާއު ފޮނުވާލި ބޯޅަ ގޯލުގެ ކައިރީ ކަނަށް އަމާޒުވިއިރު، އަލީފަށް މާ ބޮޑު ކަމެއް ނުކުރެވުނެވެ.
ބުރުގެ ފޯވާޑް، އެޑުއާޑޯ، އޭރިއާތެރެއިން އެ ޓީމުގެ ކުޅުންތެރިއަކު އަރާނެ ކަަމަށް ނަަގައިދިން ހުރަހަކަށް އަރާނެ ކުޅުންތެރިއަކު ނެތުމުން، ފުރުސަތު ގެއްލުނީ އެވެ.
އޮޑިން މެޗުގެ ތިން ޕޮއިންޓް ޔަގީންކުރި ލަނޑު ޖެހީ، މެޗުގެ 90 ވަނަ މިނިޓްގައި އަހު އެވެ. ބުރުގެ އޭރިއާތެރެއިން އަހު ޖެހި ބޯޅަ ގޯލަށް ވަނީ ކީޕަރު، އަލީފް އަތުގައި ޖެހިފަ އެވެ. އޭގެ ފަހުން، އިއްބެ އަށް އިތުރު ލަނޑެއް އޮޑި އަށް ކާމިޔާބު ކޮށްދޭން ލިބުނު ފުރަތަަ ފުރުަސަތުގައި ފޮނުވާލި ޝޮޓް ވަނީ ބްލޮކްވެފަ އެވެ. އެކަމަކު، އޭގެ އިރުކޮޅެއް ފަހުން، އިއްބެ އަށް ލިބުނު ބޯޅަ ވަނީ ގޯލަށް ވައްދާލައިފަ އެވެ. މިއީ، ގޯލު ކުރިމައްޗަށް އައި ހުރަހަކުން އިއްބެ ބޮލުން ޖެހި ގޯލެކެވެ.
ކަޕް ވިނާސް ކަޕްގެ ތިން ވަނަ މެޗުން ފެށިގެން، އޮޑީގެ ކޯޗުކަމާ ހަވާލުވި ޕޯޗުގީސް ކޯޗު، ރުއީ ގްރެގޯރިއޯގެ ބަދަލުގައި މިއަދުގެ މެޗުގައި އެ ޓީމަށް އިރުޝާދުދިނީ އެސިސްޓަންޓް ކޯޗު، އަހުމަދު ފައްރާހު (ފައްރަ) އެވެ.
