ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުގައި ގދ. ގައްދޫ ފުޓްބޯޅަ ޓީމު އަތުން 4-2 އިން ޓީސީ ސްޕޯޓްސް ކްލަބް މޮޅުވެއްޖެ އެވެ.
މިއީ، މި ފަހަރުގެ ސީޒަނުގައި ޓީސީން މޮޅުވި ފުރަތަމަ މެޗެވެ. ޓީސީން ކުޅުނު ފުރަތަމަ މެޗުގައި ވިކްޓަރީ ސްޕޯޓްސް ކްލަބް އަތުން 5-1 އިން ވީ ބައްޔެވެ. އަނެއްކޮޅުން، ހޯމް އެންޑް އަވޭ ފޯމެޓަށް ކުޅޭ މި ފަހަރުގެ ލީގުގައި ގައްދޫން އަމިއްލަ ދަނޑުގައި ކުޅުނު ފުރަތަމަ މެޗުން ނިއު ރޭޑިއަންޓް ސްޕޯޓްސް ކްލަބް އަތަުން ވަނީ 2-0 އިން ބަލިވެފަ އެވެ.
ގައްދޫ ފުޓްބޯޅަ ދަނޑުގައި މިއަދު ހަވީރު ކުޅުނު މެޗުގައި ޓީސީން މެޗު ފަށައިގެން ފުރަތަމަ 12 މިނިޓް ތެރޭގައި ދެ ގޯލުގެ ލީޑެއް ނެގި އެވެ. އެ ގޮތުން، އަށް ވަނަ މިނިޓްގައި ޓީސީން ލީޑުނެގީ މިސްރުގެ މަހުމޫދު މުސްތަފާ ޖެހި ގޯލަކުންނެވެ. އަދި، އޭގެ ހަތަރު މިނިޓް ފަހުން، މުސްތަފާ ވަނީ ދެ ވަނަ ލަނޑެއް ޖަހައި ޓީސީ އަށް ލީޑުފުޅާކޮށްދީފަ އެވެ.
މެޗުގެ 21 ވަނަ މިނިޓްގައި ޓީސީން ވަނީ ތިން ވަނަ ލަނޑެއް ޖަހައިފަ އެެވެ. މިއީ، ޓީސީ އަށް ކުޅޭ ބްރެޒިލްގެ މިޑްފީލްޑަރު، މަގްސަން ޑުރާޑޯ ޕެނަލްޓީ އަކުން ކާމިޔާބުކުރި ގޯލެކެވެ.
ފުރަތަމަ މެޗުގައި ވެސް ގައްދޫ ކޮޅަށް ފުރަތަމަ ނިއު އިން ދެ ލަނޑު ޖެހުމާ އެކު، އެ ޓީމުން ކުޅުން ރަނގަޅުކުރި އެވެ. އެ ގޮތުން، މިއަދުގެ މެޗުގައި ޓީސީން ލީޑުނެގި ފަހުން ގައްދޫން ކުޅުން ރަނގަޅުކޮށް ފުރަތަމަ ހާފު ނިމުމުގެ ކުރިން ލަނޑެއް ޖަހައި އުންމީދެއް ހޯދި އެވެ. ގައްދޫ އަށް ލިބުނު ޕެނަލްޓީ އަކުން މި ލަނޑު ޖެހީ އެ ޓީމަށް ކުޅޭ ސާބިއާގެ ފޯވާޑް، އުރޯސް ޖެމޯވިޗް އެވެ.
ގައްދޫން ދެ ވަނަ ހާފުގައި ކުޅުން ރަނގަޅުކުރިއިރު، އެ ޓީމުން ލަނޑެއް ޖެހޭތޯ ކުރި މަސައްކަތް ކާމިޔާބުވީ 86 ވަަނަ މިނިޓްގަ އެވެ. މި ލަނޑު ޖެހީ ކޯނަރަކުން ތަނަވަސްވި ފުރުސަތެއްގަ އެވެ. މިއީ، އޭރިއާތެރެއިން ގައްދޫގެ އެމަނުއަލް އޮލުބެންގާ މަކިންޑޭ ޖެހި ލަނޑެކެވެ.
އިތުރު ލަނޑެއް ޖަހައި، ގައްދޫން ނަތީޖާ ހަމަހަމަކުރެވޭތޯ މަސައްކަތް ކުރަމުން ދަނިކޮށް އެ ޓީމުގެ ފަހަތަށް ދިޔަ ބޯޅައެއްގައި ކީޕަރު، ސާބިއާގެ ބޯޖާން ވުކްމިރޯވިޗް ހެދި ގޯހެއްގެ ފައިދާނަގައި، ޓީސީގެ މާޔިޒް ވަހީދު ވަނީ ގޯލަށް ބޯޅަ ފޮނުވާލައިފަ އެވެ. ޓީސީ އަށް ފުރަތަމަ މެޗުގައި ވެސް މާޔިޒް ވަނީ ލަނޑު ޖަހައިދީފަ އެވެ.
ލީގުގައި ދެން އެންމެ އަވަހަށް ގައްދޫ ކުޅޭ މެޗު ވެސް އޮތީ އެ ރަށުގަ އެވެ. އެއީ، އަންނަ އާދިއްތަ ދުވަހު ހަވީރު ކްލަބް އީގަލްސްއާ ދެކޮޅަށެެވެ. އީގަލްސް އިން ވަނީ ކުޅުނު ފުރަތަމަ މެޗުން، ލީގަށް މި ފަހަރު ޕްރޮމޯޓްވި ބިސް ބުރު ސްޕޯޓްސް ކްލަބް އަތުން 3-1 އިން މޮޅުވެފަ އެވެ.
