ބުރު ސްޕޯޓްސް ކްލަބް މި ފަހަރުގެ ސީޒަނުގައި މިހާތަނަށް ކުޅުނު ހަތަރު މެޗުން ވެސް ބަލިވެފައިވާއިރު، އެ ޓީމަށް ކުރިމަތިވެފައި އޮތް ހާލަތު ބަދަލުކުރަން އެންމެ މެޗެއްގެ ނަތީޖާ އިން ވެސް ތަފާތުތަކެއް އަންނާނެ ކަމަށް ބުރުގެ ކޯޗު، ސްޕެއިނުގެ ކްރިސްޓިއަން ރޮޑްރިގޭޒް ބުނެފި އެވެ.
މިއީ، ރޮޑްރިގޭޒްގެ ކޯޗުކަމުގައި ބުރުން ކުޅޭ ދެ ވަނަ މުބާރާތެވެ. ސީޒަންގެ ފުރަތަމަ މުބާރާތް، ކަޕް ވިނާސް ކަޕްގައި ބުރުންް ކުޅުނު ތިން މެޗުން ވަނީ ބަލިވެފަ އެވެ. ފުރަތަމަ މެޗުން ނިއު ރޭޑިއަންޓް ސްޕޯޓްސް ކްލަބް އަތުން 5-0 އިން ބަލިވިއިރު، ދެ ވަނަ މެޗުގައި މާޒިޔާ ސްޕޯޓްސް އެންޑް ރެކްރިއޭޝަން އަތުން ލީޑު ނަގާފައި ވެސް 2-1 އިން ބަލިވީ އެވެ. އަދި، ފަހު މެޗުގައި، އޮޑި ސްޕޯޓްސް ކްލަބް އަތުން ބަލިވީ 2-0 އިންނެވެ. އަދި، ދިވެހި ޕްރިމިއާ ލީގުގައި ބުރު ވަނީ ކުޅުނު ފުރަތަމަ މެޗުން ހއ. ދިއްދޫ ފުޓްބޯޅަ ޓީމު އަތުން 1-0 އިން ބަލިވެފަ އެވެ.
ލީގުގައި ބުރުން ކުޅޭ ދެ ވަނަ މެޗުގައި އޮޑިއާ ދެކޮޅަށް ކުޅުމުގެ ކުރިން ރޮޑްރިގޭޒް ބުނީ، އޮޑި އަކީ ރަނގަޅު ޓީމެއްކަން އެނގޭ ކަމަށެވެ. އަދި، އެ ޓީމާ ހަވާލުވި ކޯޗު، ޕޯޗުގަލްގެ ރުއީ ގްރެގޯރިއޯއާ އެކު ކަންކަން ބަަދަލުކުރަން މަސައްކަތް ކުރަމުން އަންނަ ކަމަށާއި ލީގުގެ ފުރަތަމަ މެޗުގައި މާޒިޔާ ސްޕޯޓްސް އެންޑް ރެކްރިއޭޝަން އަތުން އޮޑި ބަލިވި ނަމަވެސް ތަފާތު ފެނުނުކަން ރޮޑްރިގޭޒް ފާހަގަކުރި އެވެ.
ބުރުން މިހާރު މައިގަނޑު ފޯކަސް އެއް ބަހައްޓައިގެން މަސައްކަތް ކުރަމުން އަންނަނީ ވީ އެންމެ ރަަނގަޅަކަށް ކަންކަން ރަނގަޅުކޮށް، މޮޅު މެޗެއް ކުޅެގެން ކާމިޔާބެއް ހޯދޭތޯ ކަމަށެވެ.
"އަހަރެމެން ޓީމު އެންމެން އެއްކޮށް ވާހަކަ ދައްކަމުން މި އަންނަނީ މި ހުރިހާ ކަމަކާ ގުޅޭގޮތުން، އަހަރެމެންނަށް ގޯލެއް ޖެހި، ރަނގަޅު ރިޒަލްޓެއް ނެރެވޭ ހިސާބުން، ދެން ހުރި ހުރިހާ ކަމެއް ބަދަލުވާނެ. އެ މީހުން (ކުޅުންތެރިން) ގަބޫލު އެބަކުރޭ މި ކުރާ މަސައްކަތް. ދެން، މި މަސައްކަތުން އަހަރެމެންނަށް ނަތީޖާއެއް ނެރެވޭ ހިސާބުން، މޮޅުވާން ގޯލެއް ޖެހޭ ހިސާބުން، ނަތީޖާއެއް ނެރެވޭ ހިސާބުން ކަންކަން ބަދަލުވާނެ، އެންމެ މުހިންމު ކަމަކީ މި ކުރާ މަސައްކަތަށް އެ އޮތް އިތުބާރު، އެކަން ކުރިއަށްގެންދަން ބޭނުންވަނީ ރަނގަޅު ނަތީޖާއެއް،" ރޮޑްރިގޭޒް ބުންޏެވެ.
އޭނާ ބުނީ ތަކުރާރުކޮށް ފާހަގަކުރަން ޖެހޭ އެއް ކަމަކީ ބުރުގައި އޮތީ ޒުވާން ޓީމެއް ކަމެވެ. އާދި، އޭނާ ގެންގުޅޭ ފުޓްބޯޅައިގެ ވިސްނުންތަކަށް ހޭނެން ބުރުގެ ކުޅުންތެރިންނަށް ވަގުތު ބޭނުންވާ ކަމަށާއި "އެންމެ ރެޔަކުން ނޫނީ އެއް ދުވަހުން" ކަންކަން ބަދަލުނުކުރެވޭނެ ކަމަށް ރޮޑްރިގޭޒް ވަނީ ބުނެފަ އެވެ.
"މިއީ ޕްރޮސެސް އެއް، ރަނގަޅު ކަމަކީ އަހަރެމެން މި އަންނަނީ މި ކުރެވޭ ކަންކަން ބަލައި ދިރާސާ ވެސް ކުރަމުން، އަހަރެމެން މިހާރު ކުރަން ޖެހޭ ކަމަކީ 90 މިނިޓް ރަނގަޅު ލެވަލްގައި ހިފެހެއްޓޭތޯ ބަލަންވީ،" ރޮޑްރިގޭޒް ބުންޏެވެ.
ދިއްދޫ އަތުން ބަލިވި މެޗަށް ފަހު، ބުރުގެ ހުރިހާ ކުުޅުންތެރިންގެ މޫނުމަތިން ފެނުނީ ދެރަވެފައި ހުރި މަންޒަރު ކަމަށާއި ސަބަބަކީ ބަލިވެފައި އޮތުމުން އެންމެ ފަހު ވަގުތާ ހަމައަށް ވެސް ގޯލެއް ޖަހައި، އެއްވަރުކުރެވޭތޯ ކުރި މަސައްކަތް ވެސް ކާމިޔާބުނުވުން ކަމަށް ރޮޑްރިގޭޒް ވަނީ ބުނެފަ އެވެ. ޓީމުގެ ބައްދަލުވުމެއް މި ފަހުން ބުރުން ބޭއްވިއިރު، އެ ބައްދަލުވުމަށް ވެސް ބުރުގެ ކުޅުންތެރިން އައީ "ނެގެޓިވް" ވިސްނުމެއްގައި ކަމަށާއި އެކަމަކު، އެ ބައްދަލުވުމުގައި ބުރުން ވީޑިއޯތައް ބަލައި ފޯކަސް ކުރީ ރަނގަޅަށް ކުރެވިފައި ހުރި ކަންކަމަށް ކަމަށްވާތީވެ، ކުޅުންތެރިންގެ މޫނުމަތިން ހިތްހަމަޖެހުން ފެނި އިތުބާރު ލިބިފައިވާ ކަމަށް ރޮޑްރިގޭޒް ވަނީ ބުނެފަ އެވެ.
ބުރު އާއި އޮޑި ކުޅޭ މެޗު ފަށާނީ މިއަދު 16:00 ގަ އެވެ.
