މެޑްރިޑް (ސެޕްޓެމްބަރު 9) - ޔުއެފާ ޗެމްޕިއަންސް ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި ރެއާލް މެޑްރިޑުން ކާމިޔާބުކޮށް މި ފަހަރުގެ މުބާރާތް މޮޅަކުން ފަށައިފި އެވެ.
ރެއާލުން އަމިއްލަ ދަނޑުގައި އިޓަލީގެ ޗެމްޕިއަން، އިންޓަ މިލާނާ ދެކޮޅަށް ކުޅެ މޮޅުވީ 2-1 އިންނެވެ. ޕޯޓޯ ދަނޑުގައި މެންޗެސްޓާ ސިޓީން ކުރިހޯދީ 2-0 އިންނެވެ.
ރޭގެ މެޗުގެ 14 ވަނަ މިނިޓްގައި އިންޓަގެ މެދު ތެރެއިން ކާޓިސް ޖޯންސް ހެދި ގޯހެއްގެ ފައިދާނަގައި ރެއާލުން ލީޑުނެގީ ކީލިއަން އެމްބާޕޭ ޖެހި ގޯލުންނެވެ. މިިދިޔަ ސީޒަނުގެ ޗެމްޕިއަންސް ލީގުގައި އެންމެ ގިނަ ގޯލު ޖެހި އެމްބާޕޭ، މި ލަނޑާ އެކު ވެފައިވަނީ، ޗެމްޕިއަންސް ލީގުގެ ތާރީހުގައި ފަސް ވަނަ އަށް އެންމެ ގިނަ ގޯލު ޖެހި ކުޅުންތެރިޔާ އަށެވެ. މިއީ، އެމްބާޕޭ، ޗެމްޕިއަންސް ލީުގގައި ކުޅުނު 99 މެޗުން ޖެހި 71 ވަނަ ލަނޑެވެ. އޭނާ އަށް ވުރެން ގިނައިން މި މުބާރާތުގައި ލަނޑު ޖަހާފައިވަނީ، 90 ލަނޑު ޖެހި ކަރިމް ބެންޒެމާ، 109 ލަނޑު ޖެހި ރޮބަޓް ލެވަންޑޯސްކީ، 129 ލަނޑު ޖެހި ލިއޮނަލް މެސީ އަދި 140 ލަނޑު ޖަހާފައިވާ ކްރިސްޓިއާނޯ ރޮނާލްޑޯ އެވެ. ރައުލް ގޮންޒާލޭޒް ވަނީ އެމްބާޕޭއާ އެއްވަރަށް 71 ލަނޑު ޖަހައިފަ އެވެ.
އިންޓަ އިން ރަނގަޅަށް ކުޅެމުން ދަނިކޮށް، އެމްބާޕޭގެ ގޯލުން ރެއާލުން ކުރިހޯދިއިރު، އެ ޓީމުން ޖެހި ދެ ވަނަ ލަނޑަކީ އިންޓަގެ ކީޕަރު، ޖޯސެޕް މާޓިނޭޒް ހެދި ގޯހަކުން ފެޑެރީކޯ ވަލްވޭޑޭ ޖެހި ގޯލެކެވެ. މާޓީނޭޒް ވަނީ އެމްބާޕޭ އާއި ޖޫޑް ބެލިންހަމް ފޮނުވާލި ނުރައްކާތެރި ހަމަލާތަކެއް ހުއްޓުވައިފަ އެވެ.
މެޗުގައި، އިންޓަ އަށް ލަނޑެއް ޖަަހައިދޭން ކާޓިސް ޖޯންސް ޖެހި ޝޮޓެއް ހުރަސްދަނޑިއަށް އަމާޒުވިއިރު، ލައުޓާރޯ މާޓިނޭޒް އަދި ހަކަން ޗަނޮނޯލޫ ޖެހި ޝޮޓްތައް ރެއާލްގެ ކީޕަރު، ތިބޯ ކޯޓުއާ މަތަކުރި އެވެ. މެޗުގައި އިންޓަ އިން ޖެހި ހަމައެކަނި ލަނޑު ޖެހީ 77 ވަނަ މިނިޓްގައި މާޓީނޭޒް ނެގި ހުަރަހަކުން ކާލޯސް އަގުސްޓޯ އެވެ.
އެންޒޯ މަރެސްކާގެ ކޯޗުކަމުގައި ސިޓީން ޔޫރަޕްގައި ކުޅުނު ފުރަތަަމަ މެޗުން ޕޯޓޯ އަތުން ކާމިޔާބު ހޯދިއިރު، ދެ ލަނޑު ވެސް ޖެހީ ދެ ވަނަ ހާފުގަ އެވެ. އެ ގޮތުން، ދެ ވަނަ ހާފުގެ ކުޅުން ފެށިގެން ދެ މިނިޓް ތެރޭ އެންޒޯ ފެނާންޑޭސް ދިން ބޯޅައަކުން އާލިން ބްރައުޓް ހާލަންޑް ވަނީ ސިޓީ އަށް ލީޑުނަގައިދީފަ އެވެ. އެއް ގޯލު ކުރީގައި އޮވެ، މެޗު ނިންމާލަން ދިޔަ ސިޓީން އިތުރު ވަގުުތުގައި ދެ ވަނަ ލަނޑެއް ޖެހި އެވެ. މިއީ، ރަޔާން އަޔަތު-ނޫރީ ތަނަވަސްކޮށްދިން ފުރުސަތެއްގައި ހާލަންޑް ކާމިޔާބުކުރި ގޯލެކެވެ.
ޗެމްޕިއަންސް ލީގުގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ބޮރޫޝިއާ ޑޯޓްމަންޑުން 3-2 އިން ވިޔަރެއާލް ބަލިކުރިއިރު، ހަމަ އެ ނަތީޖާ އިން ކްލަބް ބްރޫޖްގެ މައްޗަށް ކުރިހޯދައި އެސްޓަން ވިލާ އިން މި ފަހަރުގެ ސީޒަނުގެ ފުރަތަމަ މޮޅު ހޯދި އެެވެ. އެސްޓަން ވިލާ އަށް މި ފަހަރުގެ އިނގިރޭސި ޕްރިމިއާ ލީގުގެ ފުރަތަމަ ތިން މެޗުން ވެސް މޮޅެއް ނުލިބެ އެވެ.
ފްރާންސްގެ ލިލް އަތުން ސްޕެއިނުގެ ރެއާލް ބެޓިސް 3-2 އިން މޮޅުވިއިރު، ގްރީސްގެ އޭއީކޭ އެތަންސް އިން ވަނީ ލާސްކް އަތުން 1-0 އިން މޮޅުވެފަ އެވެ.
