އޮޑި ސްޕޯޓްސް ކްލަބުން އެ ޓީމުގެ ކޯޗަކަށް ހުރި ޕޯޗުގަލްގެ ރުއީ ގްރެގޯރިއޯއާ އެކު ހަދާފައިވާ އެއްބަސްވުން އުވާލައިފި އެވެ.
އޮޑި ސްޕޯޓްސް ކްލަބާ ގްރެގޯރިއޯ ހަވާލުވީ، މި ސީޒަނުގެ ކަޕް ވިނާސް ކަޕްގެ ފުރަތަމަ ދެ މެޗަށް ފަހު އެެވެ. ގްރެގޯރިއޯގެ ކޯޗުކަމުގަައި އޮޑިން ކުޅުނީ ދެ މެޗެވެ. އެއީ، ކަޕް ވިނާސް ކަަޕްގެ ފަހު މެޗުގައި 2-0 އިން ބުރު ސްޕޯޓްސް ކްލަބް އަތުން މޮޅުވި މެޗާއި ދިރާގު ދިވެހި ޕްރިމިއާ ލީގުގައި މާޒިޔާ ސްޕޯޓްސް އެންޑް ރެކްރިއޭޝަން އަތުން 1-0 އިން ބަލިވި މެޗުގަ އެވެ.
ދިވެހި ޕްރިމިއާ ލީގުގައި އިއްޔެ ހަވީރު އޮޑިން 4-1 އިން ބުރު ބަލިކުރި މެޗުގައި އޮޑީގެ ބެންޗުގައި ގްރެގޯރިއޯ ނެތެވެ. އޭނާގެ ބަދަލުގައި ޓީމުގެ ކޯޗުގެ ޒިންމާނަގައި، ޓީމު ލީޑުކުރީ އެސިސްޓަންޓް ކޯޗު އަހުމަދު ފައްރާހު (ފައްރަ) އެވެ.
އޮޑިން ވަނީ ގްރެގޯރިއޯއާ ކުރެވުނު މަޝްވަރާތަކަކަށް ފަހު، އެއްބަސްވުން ނިމުމަކަށް ގެންނަން ނިންމީ ކަމަށް ބުނެފަ އެވެ. ކުރިއަށް އޮތް ގައުމީ ޓީމުގެ މެޗުުތަކަށް ދޭ ބްރޭކުގެ ތެރޭގައި އޮޑިން އާ ކޯޗެއް ހަަމަޖެއްސުމުގެ މަސައްކަތް އަންނަނީ ކުރަމުންނެވެ.
އުމުރުން 57 އަހަރުގެ ރުއީ ގްރެގޯރިއޯ، ވަނީ ކޯޗިންގެ އެކި ޕްރޮޖެކްޓްތަަކުގައި، ޕޯޗުގަލް، މިޔަންމާ، ލެބަނަން، ސައުދީ އަރަބިއްޔާ، އިންޑިއާ އަދި އެންގޯލާގައި މަސައްކަތްކޮށްފަ އެވެ.
އެ ގޮތުން، މިޔަންމާގެ ޑްރެގަން ސްޓާ ޔުނައިޓެޑްގެ ހެޑް ކޯޗަކަށް އެންމެ ފަހުން މަސައްކަތްކުރި ރުއީ ގްރެގޯރިއޯ ވަނީ ލެބަނަންގެ ސަލާމް ޒްގާތާގެ ކޯޗުކަން ކުރުމުގެ އިތުރުން، ގާނާގެ ބެރަކޫމް ޗެލްސީގެ ކޯޗަކަށް ވެސް މަސައްކަތްކޮށްފަ އެވެ. ސައުދީ ޕްރޯ ލީގުގައި އަލް ތާވޫން ވާދަކުރިއިރު އެސިސްޓަންޓް ކޯޗަކަށް ހުރި ރުއީ ގްރެގޯރިއޯ ވަނީ މީގެ ކުރިން ތިން ސީޒަނެއްގައި ބެންގަލޫރުގެ ޓެކްނިކަލް ޑިރެކްޓަރެއްގެ ގޮތުގައި ވެސް މަސައްކަތްކޮށްފަ އެވެ.
އޭނާ ބެންގަަލޫރުގެ މަގާމުން ދުރުވީ ވެސް ކްލަބްގެ މެނޭޖްމަންޓާ ޖެހުނު މައްސަލަތަކަކަށް ފަހު އެވެ.
ދެ ވަނަ ޑިވިޝަނުގެ ޗެމްޕިއަންކަން ހޯދުމަށް ފަހު، މިދިޔަ ސީޒަނުގައި އަލަށް ފުރަތަމަ ޑިވީޝަނުގައި ވާދަކުރި އޮޑިން ފުރަތަމަ ހަމަޖެއްސި ކޯޗަކީ، އޮސްޓްރޭލިއާގެ އިއަން އެންޑްރޫ ގިލަން އެވެ. އެ ޓީމު ގޮވައިގެން އެންޑްރޫ ފަރިތަކުރުންތައް ކުރިއަށްގެންދިޔަ ނަމަވެސް، އަމިއްލަ ކަމެއްގައި ފުރަން ޖެހުމުން މިދިޔަ އަހަރު މެއި މަހު ޓީމާ ވަކިވި އެވެ. މެއި މަހު ބޭއްވި ޕްރީ ސީޒަން މުބާރާތް، އެފްއޭއެމް ލީގު ކަޕްގައި އޮޑި އަށް ކޯޗުކޮށްދިނީ، އެސިސްޓަންޓަކަށް ހުރި، ފަރުހާދު އިސްމާއިލް (ފަރޭ) އެވެ. އެ މުބާރާތުގެ ފައިނަލުގައި އޮޑި ކުޅުނެވެ.
އޭގެ ފަހުން، އޮޑިން ވަނީ ލީގު ފެށުމުގެ ކުރިން، ސްޕެއިން ފުޓްބޯޅަ ފެޑެރޭޝަނުގެ ގައުމީ ލެވަލްގެ ކޯޗެއްގެ ގޮތުގައި، 2013 ގައި ކޯޗިން އަށް ނުކުތް، އަންދްރެސް ގާސިއާ ގެނެސްފަ އެވެ. ގާސިއާގެ ކޯޗުކަމުގައި ލީގުގެ ދެ ވަނަ ހޯދައި، އޮޑިން ޕްރެޒިޑެންޓްސް ކަޕްގެ ޗެމްޕިއަންކަން ހޯދި އެވެ. އެކަމަކު، އެފްއޭ ކަޕްގެ ކުއާޓާ ފައިނަލުން ނިއު އަތުން ބަލިވީ އެވެ. ގާސިއާ، އޮޑި ދޫކޮށްލީ ރަނގަޅު އޮފާއެއް ލިބިގެންނެވެ.
