ހޯސޭ މޮރީނިއޯ، މީގެ ކުރިން، ރެއާލް މެޑްރިޑްގެ ކޯޗަކަށް މަސައްކަތްކުރިއިރު، އެ ޓީމަށް ކުޅެފައިވާ ސްޕެއިނުގެ ހޯސޭ ރޮޑްރިގޭޒް، ރާއްޖޭގެ ޕްރެޒިޑެންޓްސް ކަޕް ޗެމްޕިއަން، އޮޑި ސްޕޯޓްސް ކްލަބާ ގުޅެން ނިންމައިފި އެވެ.
ރާއްޖޭގެ ފުރަތަމަ ޑިވިޝަނުގައި ދެ ވަނަ ސީޒަނުގައި ވާދަކުރަން ތައްޔާރުވަމުން އަންނަ އޮޑިއާ އެކު، 31 އަހަރުގެ މިޑްފީލްޑަރު، ރޮޑްރިގޭޒް ވަރަށް އަވަހަށް އެއްބަސްވުމުގައި ސޮއިކުރާނެ އެވެ.
ސްޕެނިޝް ލީގުގައި 2012 ވަނަ އަހަރު އެތުލެޓިކޯ މެޑްރިޑާ ދެކޮޅަށް ރެއާލުން ކުޅުނު މެޑްރިޑް ޑާބީ މެޗުގައި ވެސް ކުޅެފައިވާ ރޮޑްރިގޭޒް ވަނީ ޔުއެފާ ޗެމްޕިއަންސް ލީގުގައި ޖުމްލަ ހަތަރު މެޗު ކުޅެފަ އެވެ. އެއީ، ރެއާލުން 2012 ވަނަ އަހަރުގެ ޗެމްޕިއަންސް ލީގުގައި އަޔަކްސްއާ ދެކޮޅަށް ކުޅުނު މެޗުގައި ބަދަލު ކުޅުންތެރިއެއްގެ ގޮތުގައި، ކުޅުމުގެ އިތުރުން ތުރުކީގެ ގަލަސަތަރާއި އަށް ކުޅުނު ތިން މެޗެވެ.
ރެއާލަށް ޗެމްޕިއަންސް ލީގުގެ މެޗެއްގައި ކުޅުނު އެންމެ ޒުވާން ކުޅުންތެރިޔާގެ ޝަރަފް 2012 ވަނަ އަހަރު ރޮޑްރިގޭޒަށް ލިބުނީ 17 އަހަރާއި 354 ދުވަސް ފުރިފައިވަނިކޮށް އަޔަކްސްއާ ދެކޮޅަށް ކުޅެގެންނެވެ.
ސްޕެއިނުގެ ހަތަރު އުމުރުފުރާއެއްގެ ގައުމީ ޓީމަށް ކުޅެފައިވާ ރޮޑްރިގޭޒް ވަނީ، ރެއާލުން 2013/14 ވަނަ އަހަރު ޗެމްޕިއަންސް ލީގާއި 2011/12 ގައި ސްޕެނިޝް ލީގު ކާމިޔާބުކުރި ސްކޮޑުގައި ހިމެނިފަ އެވެ. ގަލަސަތަރާއިއާ އެކު، 2015/2016 ވަނަ އަހަރު ތުރުކީގެ ކަޕް ޗެމްޕިއަންކަން ހޯދި ރޮޑްރިގޭޒް ވަނީ އިޒްރޭލުގެ މަަކަަބީ ހައިފާއާ އެކު، އެ ގައުމުގެ ލީގު ޗެމްޕިއަންކަން ދެ ފަހަރު އަދި ކަޕް ޗެމްޕިއަންކަން އެއް ފަހަރު ހޯދައިފަ އެވެ.
ޔޫރަޕްގެ ކްލަބް ލެވަލްގެ ތިން ފަންތީގެ މުބާރާތްތަކުގައި ވެސް ރޮޑްރިގޭޒް ވަނީ ކުޅެފަ އެވެ. އެއީ، ޗެމްޕިއަންސް ލީގުގެ އިތުރުން، ޔޫރޮޕާ ލީގާއި ކޮންފަރެންސް ލީގުގަ އެވެ.
އެންމެ ފަހުން އަލްބޭނިއާގެ ފްލަމުރްތާރީ އެފްސީގައި ހުރި ރޮޑްރިގޭޒް ވަނީ، ސްޕެއިނުގެ މަލާގާ، ޖަރުމަނުގެ މައިންޒް، ތުރުކީގެ އަޑާނާ ޑެމިރްސްޕޯޯރު، ބެލްޖިއަމްގެ ޔޫނިއަން ސެއިންޓް ގިލޮއިސް، ނެދަލެންޑްސްގެ ފޯޗޫނާ ސިޓާޑް އަދި އިޒްރޭލްގެ މަކަބީ ޓެލް އަވީވް އަދި ހަޕޮއޭވް ޓެލް އަވީވް އަށް ވެސް ކުޅެފަ އެވެ.
މީގެ ކުރިން، ސްޕެނިޝް ލަލީގާގައި ކުޅެފައިވާ ޓަނާ ޑޮމިންގޭޒް ވަނީ ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނަށް ކުޅެފަ އެވެ. ޓަނާ ވަނީ ސްޕެނިޝް ލީގުގައި ލަސް ޕަލްމާސް އަށް ގިނަ މެޗުތަކެއް ކުޅެދީފަ އެވެ.
މި ފަހަރުގެ ސީޒަނަށް އޮޑިން ނުކުންނާނީ، ޔުއެފާ ޕްރޯ ލައިސަންސް ހާސިލްކޮށްފައިވާ، ޕޯޗުގަލްގެ ރުއީ ގްރެގޯރިއޯގެ ކޯޗުކަމުގަ އެވެ. އިންޑިއާ، ސައުދީ އަރަބިއްޔާ އަދި މިޔަންމާގައި ކޯޗިން މަސައްކަތްކޮށްފައިވާ ގްރެގޯރިއޯގެ ކޯޗުކަމުގައި ރޮޑްރިގޭޒްގެ އިތުރުން، ދެން ކުޅޭނެ ބިދޭސީ ކުޅުންތެރިންނަކީ، މިދިޔަ ސީޒަނުގައި ބުރު ސްޕޯޓްސް ކްލަބަށް ކުޅުނު ބްރެޒިލްގެ ފޯވާޑް، ހުޑްސަން ޑިއާޒް، ކްލަބް އީގަލްސް އަށް ކުޅުނު ސިއެެރަ ލިއޯން ޑިފެންޑަރު، މާވިން ލެބީ އެވެ.
އޮޑި އަށް ކުރިއަށް އޮތީ ދިވެހި ޕްރިމިއާ ލީގެވެ. ޕްރިމިއާ ލީގުގެ ފުރަތަމަ މެޗުގައި، އަންނަ މަހު 10 ވަނަ ދުވަހު ކުޅޭނީ އެންމެ ފަހުގެ ޗެމްޕިއަން، މާޒިޔާ އާއި އޮޑި އެވެ.
