ބުރު ސްޕޯޓްސް ކްލަބްގެ މައްޗަށް 2-0 އިން ކުރިހޯދައި، އޮޑި ސްޕޯޓްސް ކްލަބުން ކަޕް ވިނާސް ކަޕް ފުޓްބޯޅަ މުބާރާތުގެ ތިން ވަނަ ހޯދައިފި އެވެ.
އަށާރަ އަހަރުގެ މެދުކެނޑުމަކަށް ފަަހު، ރާއްޖޭގެ ފުޓްބޯޅަ ސީޒަނަށް ކަޕް ވިނާސް ކަޕް ވަނީ އެނބުރި އައިސްފަ އެވެ. މި ފަހަރުގެ މުބާރާތުގައި، ވާދަކުރާ ހަތަރު ޓީމުން ކޮންމެ ޓީމެއް ފުރަތަމަ ދެ މެޗު ކުޅުނުއިރު، ނިއު ރޭޑިއަންޓް ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން ވަނީ ފައިނަލަށް ދަތުުރުކޮށްފަ އެވެ. އެއީ، އޮޑި އާއި ބުރު އަތުން ފުރަތަމަ މެޗުތަކުން މޮޅުވެގެންނެވެ.
އެހެންވެ، މިއަދު ހަވީރުގެ މެޗު ވެފައި އޮތީ ކޮންމެ ޓީމެއް މޮޅުވިޔަސް، މުބާރާތުގެ ތިން ވަނަ ހޯދުމުގެ ފުރުސަތެކެވެ.
އޮޑިން މިއަދު ހަވީރު ގަލޮޅު ދަނޑުގައި ކުޅުނު މެޗުން މޮޅުވީ ކޮންމެ ހާފެއްގައި ލަނޑެއް ޖަހައިގެންނެވެ. މި މެޗުގައި އޮޑީގެ ދެ ގޯލު ވެސް ޖެހީ އެ ޓީމުގެ ޒުވާން ފޯވާޑް، މުޒްދާން ހަސަން އެވެ. އެ ގޮތުން، މެޗު ފަށައިގެން ދެ ވަނަ މިނިޓްގައި މުޒްދާން ވަނީ އޮޑި އަށް ލީޑެއް ނަގައިދީފަ އެވެ. މިއީ، އޮޑީގެ ކުރިއަށް ކުޅެމުންދިޔަ އަހުމަދު ނިޒާމް (ނިޒާމްބެ) ދިން ބޯޅައަކުން، އެ ޓީމުގެ ހައިޝަމް ރަޝީދު (ހައި)، އޭރިއާބޭރުން ފޮނުވާލި ޝޮޓް، ބުރުގެ ކީޕަރު، ހަސަން އަލީފް އިބްރާހިމް އަތުގައި ޖެހިފައި ނުކުތް ވަގުތު މުޒްދާން ޖެހި ގޯލެކެވެ.
އެއް ގޯލުގެ ލީޑަކާ އެކު ފުރަތަމަ ހާފު ނިންމާލި އޮޑިން މެޗުގައި ޖެހި ދެ ވަނަ ގޯލު ކާމިޔާބުކުރީ، ދެ ވަނަ ހާފުގެ ކުޅުން ފެށިގެން ހަތަރު ވަނަ މިނިޓްގަ އެވެ. މިއީ، އޮޑިގެ ފުލްބެކް، އަހުމަދު އައިހަމް (އައިހު) ނަގައިދިން ހުރަހަކުން މުޒްދާން ބޮލުން ޖެހި ގޯލެކެވެ.
މެޗުގެ ބާކީ ބައިގައި، އޮޑި އާއި ބުރުން ވެސް ލަނޑެއް ޖަހަން ކުރި މަސައްކަތް ކާމިޔާބުވާ ގޮތެއް ނުވި އެވެ.
މިއީ، މި ސީޒަނަށް އޮޑިގެ ކޯޗަކަށް ގެނައި، ޕޯޗުގަލްގެ ރުއީ ގްރެގޯރިއޯ އެ ޓީމާ ހަވާލުވި ފަހުން ކުޅުނު ފުރަތަމަ މެޗެވެ. ސީޒަނުގައި އޮޑިން އާ ކޯޗާ އެކު ކުރިމަތިލި ފުރަތަމަ މެޗުން ވަނީ މޮޅުވެފަ އެވެ. ފުރަތަމަ ދެ މެޗުގައި އޮޑިގެ ނަތީޖާ އަށް ބަލާއިރު، ފުރަތަމަ މެޗުން މާޒިޔާ އަތުން ބަލިވީ 2-1 އިންނެވެ. އެ އަށް ފަހު، ދެ ވަަނަ މެޗުން ނިއު އަތުން ބަލިވީ 5-3 އިންނެވެ.
ކަޕް ވިނާސް ކަޕްގައި ބާކީ އޮތީ ދެ މެޗެވެ. އެއީ، މާދަމާ ރޭ ނިއު އާއި މާޒިޔާ އިން ކުޅޭ ލީގު ބުރުގެ ފަހު މެޗާއި ހަމަ އެ ދެ ޓީމުން އަންނަ ބުދަ ދުވަހުގެރޭ ބައްދަލުކުރާ މުބާރާތުގެ ފައިނަލް މެޗެވެ. އެ ދެ މެޗުގެ ޝެޑިއުލަށް ބަދަލު ގެނެސްފައިވަނީ، އޭއެފްސީ ޗެލެންޖް ލީގުގައި މާޒިޔާ ކުޅުނު މެޗުގެ ޝެޑިއުލަށް ބަދަލެއް އައުމާ ގުޅިގެންނެވެ.
