ރާއްޖޭގެ އިގުތިސޯދަށް ބޮޑެތި ގޮންޖެހުންތަކެއް ކުރިމަތިވެފައިވާ މި ދަނޑިވަޅުގައި ބޭނުމެއް ނެތް ހަރަދު ކުރުން ހުއްޓާލައި، ރައްޔިތުންގެ ތެރެއިން ސޭވިންގްސްގައި ފައިސާ ހުރި މީހުން އޭގެ ތެރެއިން ބައެއް ނަގުދު ފައިސާއަށް ބަދަލުކުރުމަށް ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް ގޮވާލައްވައިފި އެވެ.
އިދިކޮޅު މައި ޕާޓީ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ގައުމީ މަޖިލީހުގެ ގްރޫޕްގައި ލިޔުއްވި މެސެޖެއްގައި ފައްޔާޒު ވިދާޅުވި ގޮތުގައި މިއީ އިގުތިސޯދަށް އަތުވެދާނެ އެންމެ ގޯސް ހާލަތަކާ މެދު ހުރިހާ އެންމެން ވެސް ވިސްނައި ތައްޔާރުވާން ޖެހޭ ވަގުތެވެ.
"އަޅުގަނޑުމެން ބޭކާރު ހުރިހާ ހަރަދުތައް ކުރުން ހުއްޓާލައި، ސޭވިންގްސްގެ ހުރިނަމަ އޭގެ ތެރެއިން މިންވަރެއް ނަގުދު ފައިސާއަށާއި ބޭރު ފައިސާއަށް ބަދަލުކުރަންޖެހޭ. މަދުވެގެން ދެތިން މަހަކު އުޅެވޭވަރަށް ނަގުދު ފައިސާ ހުންނަންވާނެ،" ފައްޔާޒު ލިޔުއްވި އެވެ.
މި ސަރުކާރުން ބޭރު ފައިސާ މާރުކުރުމުގެ ގާނޫނުތަކާއި ގަވާއިދުތަކަށް ބޮޑެތި ބަދަލުތަކެއް ގެނައި ނަމަވެސް އާންމު ދިވެހި މީހާއަށް ބޭރު ފައިސާ ހޯދުމުގައި ބޮޑެތި ދަތިތަކެއް އެބަހުއްޓެވެ. އަދި ޓޫރިޒަމަށް ސިނާއަތުން އަންނަނީ ސަރުކާރުން ގެނައި ބަދަލުތަކާ އެއްގޮތަށް ޑޮލަރު މާރުނުކުރެވޭނެ ކަމަށް ބުނަމުންނެވެ.
އޭގެ އިތުރުން، ޓެކްސް ނިޒާމަށް ގެނައި ބައެއް ބަދަލުތަކާ ގުޅިގެން ބޭރުގެ ޓުއާ އޮޕަރޭޓަރުން ވަނީ ރާއްޖެ ވިއްކުން ހުއްޓާލަން ޖެހިދާނެ ކަމަށް ބުނެފަ އެވެ. އެއީ އެއްވެސް މަޝްވަރާއެއް އަދި ދިރާސާއެއް ކުރުމެއް ނެތި ބަދަލުތައް ގެނައުމުގެ ނަތީޖާ ކަމަށް ފައްޔާޒު ވިދާޅުވި އެވެ.
"ރުކާރުގެ އިސްރާފަށް ހަރަދުކުރަން ރަން ބިސް އަޅާ ކުކުޅު ގުރުބާންކޮށް މުޅި ސިނާއަތާ މެދު އިންވެސްޓަރުންނާއި ވިޔަފާރިތަކުގެ އިތުބާރު އިއާދަނުކުރެވޭ މިންވަރަށް މުއިއްޒުގެ ސަރުކާރުން މިވަނީ ގެއްލުވާލާފައި. ޓުއާ އޮޕަރޭޓަރުންނާ މަޝްވަރާކޮށްގެން ހައްލެއް ހޯދުމަށް ސަރުކާރަށް ގޮވާލަން،" ފައްޔާޒު އެކްސްގައި ލިޔުއްވި އެވެ.
އެމްޑީޕީގެ ކުރީގެ ޗެއާޕާސަން މިހެން ވިދާޅުވިއިރު ބޭނުންކުރެވޭ ބޭރު ފައިސާގެ ރިޒާވު 200 މިލިއަން ޑޮލަރަށް ވަނީ ވެއްޓިފަ އެވެ. މިއަދު އިންޑިއާއަށް ދައްކަން ޖެހޭ 50 މިލިއަން ޑޮލަރު ދެއްކުމާއެކު ރިޒާވު އިތުރަށް ދަށްވާނެ އެވެ. އެ ފައިސާ ދައްކާފައިވާ ކަމަށް ސަރުކާރުން ބުނެ އެވެ.
މި އަދަދުގެ ތެރެއިން ބޭންކުތަކުގައި އިންވެސްޓުކޮށްފަ ހުރި އަދަދު އުނިކޮށްފަ، ކުރިން ހިސާބުކުރާ ގޮތަށް ބޭނުންކުރެވޭ ރިޒާވު ހިސާބުކުރާ ނަމަ ބާކީ އޮންނާނީ އެންމެ 29 މިލިއަން ޑޮލަރެވެ.
