ލޯކަލް ކައުންސިލް އިންތިހާބުގައި އެ މީހަކު ރެޖިސްޓްރީވެފައިވާ ތަނަށް ވޯޓުލުމުގެ ބަދަލުގައި އެ މީހަކު އުޅޭ ރަށަށް ވޯޓު ލެވޭ ގޮތަށް ސިޔާސަތު އެކަށައެޅުމަށް އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކޮންގްރެސްއަށް ސިޔާސަތު ގަރާރެއް ހުށަހަޅައިފި އެވެ.
އަންނަ އޮކްޓޯބަރު 1، ގައި ބާއްވާ ކޮންގްރެސްއަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ހުށަހަޅުއްވާ "ބޮޑުބަދަލު" ސިޔާސަތު ގަރާރުގައި ބުނެފައިވަނީ އެމީހަކު އުޅޭ ރަށަށް ވޯޓު ލެވޭ ގޮތަށް ދިރާސާތާކޮށް، އެ ބަދަލު ގެންނަން ކުރަންޖެހޭ މަސައްކަތްތައް ކުރުމަށެވެ. އެ ގަރާރަށް ތާއިދުކުރައްވާފައިވަނީ މަޖިލީހުގެ ކުރީގެ މެންބަރު އަދި އެ ޕާޓީގެ މެމްބަޝިޕް ކޮމިޓީގެ ކޯޗެއާ އިލްޔާސް ލަބީބު އެވެ.
"މިހާރު އޮންނަ ގޮތަށް އެމީހެއްގެ ދާއިމީ އެޑްރެސް އޮންނަ އިންތިހާބީ ދާއިރާއެއްގެ ކައުންސިލަށް ކުރިމަތިލާ ކެންޑިޑޭޓުންނަށް އެމީހަކު ވޯޓު ދިނުމަށް ހަމަޖެހިފައި އޮތް އުސޫލުގެ ބަދަލުގައި، އެމީހަކު ދިރިއުޅޭ އިންތިހާބީ ދާއިރާއެއްގެ ކައުންސިލަށް ކުރިމަތިލާ ކެންޑިޑޭޓުންނަށް ވޯޓު ދިނުމުގެ ފުރުސަތު އެމީހަކަށް އޮންނަ ގޮތަށް ބަދަލުކުރުމަށް ކުރަންޖެހޭ ދިރާސާތައްކޮށް، އެ ބަދަލު ގެންނަން ކުރަންޖެހޭ މަސައްކަތްކުރުން،" ހުށަހެޅުމުގައި ބުނެފައިވެ އެވެ.
އެ ހުށަހެޅުމުގައި ބުނީ މުޅި ލާމަރުކަޒީ ނިޒާމުން ރައްޔިތުންނަށް ލިބިދީފައިވާ އެންމެ ބޮޑު އެއް ފައިދާއަކީ ރައްޔިތުންގެ މަޝްވަރާއާއެކު އެ މީހުންގެ ބޭނުންތައް ފުއްދައިދިނުމަށް އެމީހުންގެ ގާތުގައި ތިބޭ ބަޔަކު އިންތިހާބުކުރަން އެމީހުންނަށް ފުރުސަތު ލިބުން ކަމުގައިވީއިރު، އެ ފުރުސަތުގެ ހަގީގީ ފައިދާ ރައްޔިތަކަށް ލިބިދެވެނީ، އެމީހަކު އެ ހިދުމަތެއް ހޯދާ ކައުންސިލެއް ކައުންސިލަރުން އިންތިހާބުކުރުމަށް އެމީހަކަށް އެ ފުރުސަތު ލިބިދިނުމުން ކަމަށެވެ.
އޭގެއިތުރުން ދައުލަތުގެ ކޮންމެ މަގާމަކަށް އިންތިހާބުކުރެވޭ ކޮންމެ މީހަކުވެސް އެމީހަކު އިންތިހާބުކުރެވިފައިވާ ދައުރުގެ ތެރޭގައި ވަކިކުރުމުގެ ފުރުސަތު ރައްޔިތުންނަށް ހޯދައިދިނުންވެސް ބަދަލުތަކުގެ ތެރޭގައި ހިމެނެ އެވެ.
ރައްޔިތުންގެ މަޖިލީހަށް ގެންނަ ބަދަލުތަކުގެ ތެރޭގައި މަޖިލީހަކީ ދެ ގޭގެ މައްޗަށް އެކުލެވޭ މުއައްސަސާއެއްގެ ގޮތުގައި ހެދުމަށް ކުރަންޖެހޭ ދިރާސާތައްކޮށް، މަތި ގެއަކީ އެކިއެކި ފަންނުތަކުގެ މީހުންގެ މައްޗަށް އެކުލެވޭ ގެއެއްގެ މަފްހޫމް އިތުރަށް ދިރާސާކުރުމަށްފަހު އެ ބަދަލު ގެންނަން މަސައްކަތްކުރުން ހިމެނެ އެވެ.
އެ ރަށެއްގައި ދިރިއުޅޭ ބަޔަކަށް އެ ރަށެއްގެ ކަންކަން ނިންމަން ހޮވާ އިންތިހާބީ އޮފިޝަލުން ހޮވުމުގައި ބާކީ ކުރުމަކީ ޑިމޮކްރަސީގެ އެންމެ ބޮޑު އަސާސް ބޮލާލައިޖެހުން ކަމަށް ކަމުގެ މާހިރުން ދެކެ އެވެ. އެހެންކަމުން ކައުންސިލުތައް ހޮވަން ރާއްޖޭގައި ގެންގުޅެނީ އަންޑިމޮކްރެޓިކް އުސޫލެއް ކަމަށް މާހިރުން ބުނެ އެވެ.
ވޯޓުލުމުގެ ހައްގު ދޭއިރު އެކި ގައުމުތަކުގައި ބަލާ މިންގަނޑު ތަފާތެވެ. ނަމަވެސް ކޮންމެ ގައުމެއްގައި ވެސް އަސާސަކަށް ބަލަނީ އެ ރަށެއްގައި ދިރިއުޅޭ ބަޔަކަށް މުނިސިޕަލް ކަންކަމުގައި ބަސް ކިޔޭނެ ފުރުސަތު ދިނުމެވެ. ޔޫރަޕު އަދި ބައެއް އެހެން ހިސާބުތަކުގައި އެ ގައުމުގެ ރައްޔިތުން ނޫން މީހުންނަށް ވެސް މުނިސިޕަލް އިންތިހާބުތަކުގައި ވޯޓުލެވެ އެވެ.
