ލޯކަލް ކައުންސިލްތަކުގެ މާލީ ގާބިލުކަން އިތުރުކުރުމަށް ބްލޮކް ގްރާންޓަށް ދައުލަތުގެ އާމްދަނީން ދޭ ފަސް ޕަސަންޓުގެ ބްލޮކް ގްރާންޓުގެ ބަދަލުގައި 15 ޕަސަންޓުގެ ބްލޮކް ގްރާންޓެއް ދިނުމުގެ އިތުރުން ލާމަރުކަޒީ ނިޒާމަށް ބަދަލުތަކެއް ގެނައުމަށް އިދިކޮޅު އެމްޑީޕީގެ ކޮންގްރެސްއަށް ސިޔާސަތު ކަރުދާހެއް ހުށަހަޅައިފި އެވެ.
އަންނަ އޮކްޓޯބަރު 1، ގައި ބާއްވާ މި ކޮންގްރެސްއަށް ހުށަހަޅާ މި އިސްލާހުތަކަކީ ލޯކަލް ކައުންސިލް އެސޯސިއޭޝަނުން އެކުލަވާލާފައިވާ ދިރާސާއަށް ބިނާކޮށް ހުށަހަޅާ އިސްލާހުތަކެކެވެ. މި ހުށަހެޅުން ހުށަހެޅުއްވީ ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު އެވެ.
އިސްލާހުތަކުގެ ތެރޭގައި ބްލޮކް ގްރާންޓް އިތުރުކުރުމަށް ނިންމާފައިވަނީ މިހާރު ލިބޭ މިންވަރުން ރިކަރަންޓް ހަރަދުކުރުމަށްފަހު މުޖުތަމައުގެ ރައްޔިތުންނާއެކު ކައުންސިލްތަކުން ތައްޔާރުކުރާ ތަރައްގީގެ ކަންކަން ކުރުމަށް ފައިސާ ނެތުމުން ކަމަށް ހުށަހެޅުމުގައި ބުނެފައިވެ އެވެ.
މީގެއިތުރުން ލާމަރުކަޒީ ގާނޫނުގައި ބަޔާންކޮށްފައިވާ ސެކްޓޯރަލް ގްރާންޓް ކައުންސިލްތަކަށް ދިނުމާއި، ގްރީން ފަންޑަށް ނަގާ އަދަދު 20 ޕަސަންޓު، ބިމު ކުލީގެ 50 ޕަސަންޓު އަދި އެ ދާއިރާއަކުން ނަގާ މަރުކަޒީ ޓެކްސްތަކުގެ ފަސް ޕަސަންޓު ކައުންސިލްތަކަށް ދިނުމަށް މަޝްވަރާކުރުންވެސް ހިމެނެ އެވެ.
ހުށަހެޅުންތަކުގެ ތެރޭގައި ސަރަހައްދީ ކޮމިއުނިޓީ ބޭންކްތައް އުފެއްދުމުގެ ފުރުސަތު ދިނުމާއެކު، އުފެއްދުންތެރިކަމުގެ ނިސްބަތުން ދަރަނިވެރިވެވޭނެ ނިސްބަތެއް ކަނޑައެޅުމާއި، ސޮވެރިން ގެރެންޓީ ލިބޭނޭ އިންތިޒާމު ހަމަޖެއްސުންވެސް ހިމެނެ އެވެ.
އެންމެ ބޮޑު އެއް އިސްލާހަކީ އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) އުވާލައި، ކައުންސިލްގެ ރައީސުން ފިޔަވަައި ދެންހުރި ގޮނޑިތައް ދެޖިންސަށް ހަމަހަމައަށް ކަނޑައެޅުމެވެ.
އިހުތިސާސާއި ގުދުރަތީ ވަސީލަތްތަކުގެ މިލްކުވެރިކަން:
- ގާނޫނުއަސާސީން އިހުތިސާސް ކަނޑައެޅުން: ރަށާއި އަތޮޅުގެ އިހްތިސާސް ގާނޫނުއަސާސީގައި ކަނޑައަޅައި، އެ ސަރަހައްދުގައިވާ ގުދުރަތީ ވަސީލަތްތަކުގެ (ބިން، ކަނޑު، ފަޅު، ފަރު) މިލްކުރެވިެރިކަން ކައުންސިލަށް ދިނުން.
- އަތޮޅު ކައުންސިލްގެ ދައުރު: އަތޮޅު ކައުންސިލް އަލުން އިޔާދަކޮށް، ރަށު ކައުންސިލްގެ އިހުތިސާސްގައި ނުހިމެނޭ ވަސީލަތްތައް އަތޮޅު ކައުންސިލަށް ލިބި، ރަށު ކައުންސިލްތަކަށް މާލީ އެހީތެރިކަން ދެވޭނެ މަގުފަހިކުރުން.
އިދާރީ ހިންގުމާއި މުވައްޒަފުންގެ އޮނިގަނޑު:
- މުވައްޒަފުންގެ ބާރު ކައުންސިލަށް: މުވައްޒަފުން އައްޔަނުކުރުމާއި، ޕްރޮމޯޝަން ދިނުމާއި، ފިޔަވަޅުއެޅުމާއި ވަކިކުރުމުގެ ބާރު ކައުންސިލަށްދީ، މުވައްޒަފުން ކައުންސިލަށް ޖަވާބުދާރީކުރެވޭނެ ނިޒާމެއް ކަނޑައެޅުން.
- ކައުންސިލަރުންގެ ދައުރު ބަދަލުކުރުން: ކައުންސިލް ރައީސް އާއި ނައިބުރައީސް ފިޔަވައި އެހެން މެންބަރުންނަކީ ދުވަހުން ދުވަހަށް އޮފީހަށް ނުކުންނަން ނުޖެހޭ (ސިޓިން/ފިކްސްޑް އެލަވަންސް ލިބޭ) ބަޔަކަށް ހަދައި، ކައުންސިލަރުންގެ އަދަދު ގިނަ ކުރުން.
ގައުމީ ތަރައްގީގެ ޕްލޭނާއި ހިދުމަތްތައް ލާމަރުކަޒުކުރުން:
- ދިގު މުއްދަތުގެ ގައުމީ ތަރައްގީގެ ޕްލޭން: ސަރުކާރާއި ކައުންސިލްތައް މަޝްވަރާކޮށްގެން އެކުލަވާލާ ދުރު މުސްތަގުބަލުގެ ގައުމީ ތަރައްގީގެ ޕްލޭންގެ އޮނިގަނޑު ގާނޫނުގައި ކަނޑައެޅުމާއި، ސިޔާސީ މެނިފެސްޓޯތައް އެ އޮނިގަނޑަށް ފެތޭގޮތަށް ބައްޓަންކުރުން.
- ހިދުމަތްތައް ޑެލިގޭޓްކުރުން: ރަށުގައި ދޭ ސަރުކާރުގެ ހިދުމަތްތައް ކައުންސިލްތަކުގެ ބެލުމުގެ ދަށުން ފޯރުކޮށްދިނުން.
އިންތިހާބީ ނިޒާމާއި ގާނޫނީ ރައްކާތެރިކަން:
- ދިރިއުޅޭ ތަނުން ވޯޓުލުން: ކައުންސިލް އިންތިހާބުގައި އެ ދާއިރާއެއްގައި ރަށްވެރިވެ ދިރިއުޅޭ މީހުންގެ ވޯޓުލުން އެ ދާއިރާއެއްގެ ކައުންސިލް އިންތިހާބުކުރުން.
- ކައުންސިލްތަކުގެ ގާނޫނީ ޝަހްސް: ކައުންސިލްތަކުގެ ހައްގުގައި ވަކާލާތުކުރާނެ ގާނޫނީ ބާރު ލިބިދީފައިވާ ޝަހްސެއް އުފެއްދުން.
- މައްސަލަ ހައްލުކުރާނެ ނިޒާމެއް އުފެއްދުން: ކައުންސިލްތަކާއި ސަރުކާރާ ދެމެދު ދެބަސްވުންތައް ހައްލުކުރުމަށް ނިޒާމެއް އެކުލަވާލުން.
އެމްޑީޕީގެ ކޮންގްރެސްއަށް ލާމަރުކަޒީ ނިޒާމާ ގުޅޭގޮތުން ހުށަހަޅާ ގިނަ ކަންކަމަކީ މި ސަރުކާރުން ނިގުޅައިގަނެފައިވާ ބާރުތައްކަން ފާހަގަކޮށްލެވެ އެވެ. އޭގެތެރޭގައި އަތޮޅު ކައުންސިލްތައް އުވާލުމާއި، ކައުންސިލްތައް އަތުން ބިންތައް އަތުލެވޭގޮތް އޮތުން ހިމެނެ އެވެ.
ލާމަރުކާޒީ ނިޒާމަކީ އެމްޑީޕީގެ ފުރަތަމަ ވެރިކަމުގައި ވުޖޫދުކުރި ނިޒާމެކެވެ. އެ ނިޒާމަށް ޕީޕީއެމްއެމްގެ ވެރިކަމުގައި އަދި ވަކިން ހާއްސަކޮށް މިހާރު މިހިނގާ ޕީއެންސީގެ ވެރިކަމުގައި ގިނަ ބަދަލުތަކެއް ގެނެސް ކައުންސިލްތަކުގެ ބާރު ވަނީ ކަނޑުވާލައިފަ އެވެ.
