މިިދިޔަ މަހުގެ 28 ވަނަ ދުވަހުން ފެށިގެން، ރިވައިވަލް ސްޕޯޓްސް އިން މެލޭޝިއާގައި ކުރިއަށްގެންދަމުން އަންނަ ދެ މަސް ދުވަހުގެ ޓްރެއިނިން ކޭމްޕްގެ ތެރެއިން ލިބޭ ފުރުސަތުތަކަކީ އޭގެ ފައިދާ ރާއްޖޭގެ ބެޑްމިންޓަނަށް ވެސް ކުރާނެ ކަމެއް ކަމަށް ރިވައިވަލްގައި ހިމެނޭ ގައުމީ ބެޑްމިންޓަން ޓީމުގެ ތަރި، ނިބާލް އަހުމަދު ފާހަގަކޮށްފި އެވެ.
ރިވައިވަލް ސްޕޯޓްސް އިން އެ ކްލަބްގެ ހައި ޕާފޯމަންސް ޓީމައި 23 އަހަރުން ދަށުގެ ސްކޮޑު، މެލޭޝިއާގައި ތާރީހީ ޓްރެއިނިން ކޭމްޕެއް މިހާރު ކުރިއަށްގެންދަމުން އެބަ ދެ އެވެ. މިއީ، މުސްތަގުބަލަށް ގިނަ ލަނޑުދަނޑިތަކެއް ހާސިލްކުރުމުގެ އަމާޒުގައި އެ ޓީމުން ކުރިއަށްގެންދާ މުހިންމު ޕްރޮޖެކްޓެއްގެ ބައެކެވެ. މިއީ، މިހާތަނަށް ރާއްޖޭގެ އަމިއްލަ ކްލަބަކުން، އިންޑިވިޖުއަލް ކުޅިވަރަކަށް ބަލާއިރު، ގައުމުން ބޭރުގައި އެންމެ ގިނަ ކުޅުންތެރިންނާ އެކު، ދެ މަސް ދުވަހުގެ މުއްދަތަކަށް ކުރިއަށްގެންދާ އެންމެ ފުރަތަމަ ޓްރެއިނިން ކޭމްޕް އެވެ. މި ކޭމްޕްގައި، ރިވައިވަލް ސްޕޯޓްސްގެ 12 ކުޅުންތެރިއަކު މެލޭޝިއާގައި ޓްރެއިނިންތައް ކުރިއަށްގެންދެ އެވެ. އަދި، މި ޓްރެއިނިން ދަތުރުގައި، ރިވައިވަލްގެ ތިން ކޯޗުން ބައިވެރިވެ އެވެ.
ނިބާލްގެ އިތުރުން، ޓްރެއިނިން ކޭމްޕްގައި ބައިވެރިވާ އެތުލީޓުންނަކީ، ފާތިމަތު ނަބާހާ (ނަބާ)، އައިމިނަތު ނަބީހާ (ނަބީ)، ޒަޔާން ޒަކީ، ހަަސަން ޒަޔާން، ހައިޝަމް އިބްރާހިމް، މުހައްމަދު ހަަލަަފް، އަހުމަދު އަޔާން، އައްޔޫބު އަޒްހަރު އަދި އިބްރާހިމް ނާޝިތު އެވެ. ކޯޗުންނަކީ، ނަޝީއު ޝަަރަފުއްދީން އާއި ނަޝްފާން މުހައްމަދު އެވެ. ނިބާލާއި ކޯޗު، ރިއާޒް މުހައްމަދު ފަހުން ކޭމްޕާ ގުޅުނީ، މިހާރު ކުރިއަށްދާ ސަރުކާރު އޮފީސްތަކާއި ކުންފުނިތަކުގެ ބެޑްމިންޓަން މުބާރާތަށް ފަހު އެވެ.
މެލޭޝިއާ ކޭމްޕް؛ ދަތިތަކުގެ ހައްލަކަށް ރިވައިވަލް އިން މުސްތަގުބަލަށް އެޅި ބޮޑު ފިޔަވަޅު
ރިވައިވަލް ސްޕޯޓްސްގެ 12 ކުޅުންތެރިންނާއި 3 ކޯޗުން ހިމެނޭހެން، ބެޑްމިންޓަންގެ ހާއްސަ ތަމްރީނު ކޭމްޕެއް ދެ މަސްދުވަހުގެ މުއްދަތަށް މެލޭޝިއާގައި ކުރިއަށް އެބަގެންދޭ. މިއީ ކުރިއަށް އޮތް ބައިނަލްއަގުވާމީ މުބާރާތްތަކުން މެޑަލް ހޯދުމަށާއި، ކުޅުންތެރިންގެ ފެންވަރު މަތިކުރުމަށް އެ ކްލަބުން ކުރިއަށްގެންދާ ދިގު މުއްދަތުގެ އިންވެސްޓްމަންޓެއް
ރިވައިވަލް އިން ވަނީ މި ކޭމްޕްގެ ތެރެއިން، އަލްޖީރިއާ އާއި މެލޭޝިއާގެ ގައުމީ ލެވަލްގެ ކުޅުންތެރިންނާ އެކު މެޗުތަކެއް ކުޅެފަ އެވެ.
ރިވައިވަލްގެ މީޑިއާ އަށް ނިބާލް ބުނީ، އަލްޖީރިއާ އާއި މެލޭޝިއާގެ ގައުމީ ލެވަލްގެ ކުޅުންތެރިންނާ ދެކޮޅަށް ކުޅުނު މެޗުތައް ގޮތަށް، އެކި ގައުމުތަކުގެ ތަފާތު ސްޓައިލްތަކުގެ ކުޅުންތެރިންނާ ދެކޮޅަށް މެޗުތައް ކުޅުމަކީ ވަރަށް ފައިދާކުރާނެ ކަމެއް ކަމަށެެވެ.
"އަލްޖީރިއާގެ ބައެއް ކުޅުންތެރިންނާ އެކު މި ކުޅެލެވުނީ ވަރަށް ރަނގަޅު މެޗުތަކެއް. ރިވައިވަލްގެ ހުރިހާ ކުޅުންތެރިންނާ އެކު މި ކޭމްޕްގައި، ޓްރެއިނިން ކޭމްޕެއްގެ މާހައުލެއްގައި ހުރުމަކީ އަހަރެން އަމިއްލަ ނަފްސު ދެކޭ ގޮތް ބުނާނަމަ ވެސް ވަރަށް ރަނގަޅު ކަމެއް. ވަރަށް ރަނގަޅު މުއްދަތެއް ޓްރެއިނިން ކުރިއަށްގެންދަން އަހަރެމެންނަށް އެބަ ލިބޭ، މާލޭގައި ނުލިބޭނެ މިންވަަރަށް. އަދި، އެ ވަގުތުތަކުގައި އެންމެ ރަނގަޅު ލެވަލްގެ މެޗުތަކެއް ވެސް ކުޅެލަން އެބަ ލިބޭ،" ނިބާލް ބުންޏެވެ.
ނިބާލްގެ ވާހަކަތަކަށް ބާރު ލިބޭ ވިސްނުމުގައި ރިވައިވަލްގައި ހިމެނޭ ގައުމީ ބެޑްމިންޓަން ޓީމުގެ އައިމިނަތު ނަބީހާ (ނަބީ) ވެސް ވަނީ އޭނާ ދެކޭ ގޮތް ހިއްސާކޮށްފަ އެވެ. ނަބީ ބުނީ، ހަމައެކަނި ރިވައިވަލްގެ އެއް ކުޅުންތެރިއަކު އަނެއް ކުޅުންތެރިއަކާ ދެކޮޅަށް މެޗުތައް ކުޅުމުގެ އިތުރަށް މިި ކޭމްޕްގެ ތެރެއިން، އެކި ގައުމުތަކުގެ ތަފާތު ލެވަލްގެ ކުޅުންތެރިންނާ ބައްދަލުކޮށް، މެޗު ކުޅުމަކީ ހަގީގަތުގައި ކުރިއަށްދާން ބަލާއިރު އިތުރު ފުރުސަތުތަކެއް ފަހިވާނެ ކަމެއް ކަމަށެވެ.
ރިވައިވަލްގެ ކޯޗު ނަޝްފާން ވަނީ، މެލޭޝިއާގެ ޓްރެއިނިން ކޭމްޕްގައި މިހާތަނަށް ފެނުނު ކަންކަމާއި މި ކޭމްޕްގެ ތެރެއިން ރިވައިވަލް އިން ކުޅުނު ފުރަތަމަ މުބާރާތް، މެލޭޝިއާ އިންޓަނޭޝަނަލް ޗެލެންޖުގައި ކުޅުނު މެޗުތަކާއި މެލޭޝިއާ އާއި އަލްޖީރިއާގެ ކުޅުންތެރިންނާ ދެކޮޅަށް ކުޅުނު މެޗުތަކުން، ކޭމްޕްގައި ހާސިލްކުރަން ބޭނުންވާ ލަނޑުދަނޑިތަކާ ހަމައަށް ދެވޭކަން ފާހަގަކޮށްފަ އެވެ.
"ގިނަ މެޗުތަކުން ކްލަބްގެ ޕްލޭޔާސް މޮޅުވެފައިވަނީ. މި ގޮތަށް މޮޅެތި ފެންވަރުގެ ކުޅުންތެރިންނާ އެއްކޮށް ކުޅެން ފުރުސަތު ހޯދުން އެއީ މި ކޭމްޕް އެންމެ މުހިންމު ބޭނުން. ކުރިއަށް ހުރި ދުވަސްތަކުގައި ވެސް އިތުރު މެޗުތައް ކުޅެން ރާވަމުން މި ދަނީ،" ނަޝްފާން ބުންޏެވެ.
އަންނަ މަހު 1-6 އަށް ކުރިއަށްދާ މެލޭޝިއާ އިންޓަނޭޝަނަލް ސީރީސްގައި ވެސް ރިވައިވަލް ކުޅުންތެރިން ވާދަކުރާނެ އެވެ. އެ މުބާރާތުގައި ވާދަކުރަން ރިވައިވަލް ކުޅުންތެރިންނާ އެކު ތައްޔާރުވުމަށްޓަކައި، ބަންގްލަދޭޝްގެ ގައުމީ ދެ ކުޅުންތެރިން ކަމަށްވާ ސިބްގާތު އާއި ގާލިބް އަންނަނީ ފަރިތަކުރަމުންނެވެ. މީގެ ތެރެއިން، ގާލިބް އަކީ، 2028 ވަނަ އަހަރު ލޮސް އެންޖެލްސްގައި އޮންނަ އޮލިމްޕިކްސް އަށް ހާއްސަކޮށް، އޮލިމްޕިކް ކައުންސިލް އޮފް އޭޝިއާ އިން ދީފައިވާ، އޭޝިއަން އޮލިމްޕިކް ޕްރޮގްރާމް ލިބިފައިވާ އެތުލީޓެކެވެ.
