ލަންޑަން (ސެޕްޓެމްބަރު 6) - ޒަބީ އަލޮންސޯގެ ކޯޗުކަމުގައި މި ސީޒަނުގައި ކުޅެމުން އަންނަ ޗެލްސީން މި ފަހަރުގެ އިނގިރޭސި ޕްރިމިއާ ލީގަށް ވާދަކުރާނެ ކަމަށް އާސެނަލްގެ ކޯޗު، މިކޭލް އާޓެޓާ ބުނެފި އެވެ.
އިނގިރޭސި ޕްރިމިއާ ލީގުގެ އާ ސީޒަނުގައި މި ފަހަރު މިހާތަނަށް ޗެލްސީ އާއި އާސެނަލުން ކުޅުނު މެޗުތަކުން ވަނީ މޮޅުވެފަ އެެވެ.
މިދިޔަ ސީޒަނުގައި ޗެލްސީން، އިނގިރޭސި ޕްރިމިއާ ލީގުގެ 10 ވަނައިގައި ނިންމިިއިރު، އެ ޓީމަށް އެންމެ ފަހުން ލީގުގެ ގަދަ ދެ ޓީމުގެ ތެރޭގައި ހިމެނެވުނީ ވެސް 2017 ވަނަ އަހަރު އެވެ. އެއީ، އެންޓޯނިއޯ ކޮންޓޭގެ ކޯޗުކަމުގައި އެ ޓީމުން 2016-2017 ވަނަ ސީޒަނުގައި ލީގުގެ ޗެމްޕިއަންކަން ހޯދިއިރު އެވެ. އެކަމަކު، އާޓެޓާ ދެކޭގޮތުގައި މި ސީޒަނުގައި އަލޮންސޯގެ ކޯޗުކަމުގައި ޗެލްސީ އަށް ތަފާތު ދެއްކޭނެ އެވެ.
"ތާވަލުގެ އެންމެ މަތީ މަގާމުތަަކުގައި ވާދަކުރަން ބޭނުންވާނެ ހުރިހާ ކަމެއް ޗެލްސީގައި ފުރިހަމަ. އޭނަ (އަލޮންސޯ) ދަންނަން. ޗެލްސީގެ ތާރީހު ވެސް އެނގޭ. އެ މީހުންގެ ސްކޮޑުގެ ކޮލިޓީ ވެސް ވަރަށް ރަނގަޅަށް އެނގޭ. އެހެން ޓީމުތަކާ އަޅާކިޔާއިރު ޗެލްސީގެ ޝެޑިއުލް ވެސް އެނގޭ. މި ހުރިހާ ކަމަކަށް ބަލާއިރު، ޗެލްސީ މި ރޭހުން ފެންނާނެ،" ލީގުގައި މިރޭ ޗެލްސީއާ ދެކޮޅަށް ކުޅޭ މެޗުގެ ކުރިން އާޓެޓާ ބުންޏެވެ.
އާޓެޓާ އާއި އަލޮންސޯ އަކީ ސްޕެއިންގެ ސްޕެއިން ސަބެސްޓިއަން ސަރަަހައްދަށް ނިސްބަތްވާ ދެ ކޯޗުންނެވެ. އަދި، ޔޫތު ކެރިއަރުގައި އެއްކޮށް އެއް ޓީމަށް ކުޅެފައިވާ ދެ ކުޅުންތެރިންގެ އިތުރުން ގާތް ދެ އެކުވެރިންނެވެ. މިރޭގެ މެޗަކީ، އާޓެޓާ އާއި އަލޮންސޯގެ ކޯޗިން ކެރިއަރުގައި ރަސްމީ މެޗެއްގައި މި ދެ ކޯޗުންގެ ފުރަތަމަ ކުރިމަތިލުމެވެ. އަނެއްކޮޅުން، ލިވަޕޫލްގެ ކޯޗު، އަންޑޯނީ އިރައޯލާ އަކީ ވެސް އަލޮންސޯ އާއި އާޓެޓާއާ އެއް ސަރަހައްދަކަށް ނިސްބަތްވާ ކޯޗެކެވެ.
"އަހަރެމެންގެ ގުޅުން ވެސް ރަނގަޅު، އަހަރެމެން ނިސްބަތްވާ ސަރަހައްދު މި އޮތީ ވެސް ގުޅިފައި. ހަގީގަތުގައި މި ލެވަލްގެ ކޯޗިންގައި ދުނިޔޭގެ އެންމެ މަތީ ފަންތީގެ ކްލަބްތަކާ ހަވާލުވެ ތިބެ، އެކަކު އަނެކަކާ ދެކޮޅަށް މިހެން ޗެލެންޖަކަށް ނުކުންނަން ޖެހުމަކީ ވަރަށް ބޮޑު ހިތްހަމަ ޖެހުމެއް،" އާޓެޓާ ބުންޏެވެ.
އިނގިރޭސި ޕްރިމިއާ ލީގުގައި އާސެނަލުން އެންމެ ފަހުން ޗެލްސީއާ ދެކޮޅަށް ކުޅުނު ނުވަ މެޗުން ވެސް ބަލިވެފައިނުވެ އެވެ. އާސެނަލް ދަނޑުގައި ޗެލްސީން އެންމެ ފަހުން ކުޅުނު ހަތަރު މެޗުން ވެސް ވަނީ ބަލިވެފަ އެެވެ. އެންމެ ފަހުން، އާސެނަލް ދަނޑުގައި ޗެލްސީ މޮޅުވީ 2021 ވަނަ އަހަރު އެވެ.
އާސެނަލްގެ ދަނޑު އެމިރޭޓްސް ސްޓޭޑިއަމްގައި މިރޭ ޗެލްސީއާ ދެކޮޅަށް ކުޅޭ މެޗު ފަށާނީ 20:30 ގަ އެވެ.
