ލިވަޕޫލް (ސެޕްޓެމްބަރު 10) - ޔުއެފާ ޗެމްޕިއަންސް ލީގުގައި ރޭ ލިވަޕޫލުން ފަހަތުން އަރައި އެތުލެޓިކޯ މެޑްރިޑް 2-1 އިން ބަލިކުރިއިރު، ނަޕޯލީ އަތުން އާސެނަލް 1-0 އިން މޮޅުވެއްޖެ އެވެ.
އަމިއްލަ ދަނޑުގައި ރޭ ކުޅުނު ލިވަޕޫލުން މެޗު ފަށައިގެން ފުރަތަމަ މިނިޓް ތެރޭ ހަމަލާއެއް ފޮނުވާލި އެވެ. އެ ގޮތުން، ލިވަޕޫލްގެ ފޯވާޑް، އަލެކްސަންޑަ އިސާކަށް އެތުލެޓިކޯ އޭރިއާތެރެއިން ލިބުނު ފުރުސަތުގައި ޖެހި ބޯޅަ ދިޔައީ ގޯލު ކުރިމަތިން ހުރަސްވެގެންނެވެ. އަދި، ފުރަތަމަ ފަަހަރަށް ލިވަޕޫލްގެ ފުރަތަމަ އެގާރައިގައި ހިމެނިގެން ކުޅުނު، ބްރެޑްލީ ބާކޮލާ ޖެހި ޝޮޓެއް އެތުލެޓިކޯ ކީޕަރު ޔެން އޮބްލަކް ވަނީ މަތަކޮށްފަ އެވެ.
އެތުލެޓިކޯ އިން ލީޑުނެގީ 17 ވަނަ މިނިޓްގައި މާކޯސް ލޮރެންޓޭ ޖެހި ގޯލުންނެވެ. ހޫލިއަން އަލްވަރޭޒް ދިން ބޯޅައަކުން ލޮރެންޓޭ މި ލަނޑު ޖެހިއިރު، މިއި، ލިވަޕޫލާ ދެކޮޅަށް ކުޅުނު ތިން މެޗުން ލޮރެންޓޭ ޖެހި ފަސް ވަނަ ގޯލެވެ. މި ހުރިހާ ލަނޑެއް ވެސް ޖެހީ ލިވަޕޫލް ދަނޑުގަ އެވެ. އެތުލެޓިކޯ އަށް ލީޑުފުޅާކޮށްދޭން އަލްވަރޭޒް ޖެހި ޝޮޓެއް ލިވަޕޫލްގެ ކީޕަރު އެލިސަން ބެކާ މަތަކުރި އެވެ.
ފުރަތަމަ ހާފު ނިމުމުގެ ކުރިން ލިވަޕޫލަށް އެއްވަރުކޮށްދިނީ ޑޮމިނިކް ސޮބޯސްލާއި އެވެ. މިއީ، އެތުލެޓިކޯ އޭރިއާތެރެއިން ލިވަޕޫލްގެ ރޮނާލްްޑް އަރައުހޯ ދިން ބޯޅައަކުން ސޮބޯސްލާއި ތިރިތިރިން ގޯލަށް ބޯޅަ ފޮުނުވާލައިގެން ޖެހި ގޯލެކެެވެ. ދެ ވަނަ ހާފު ފަށައިގެން އިރުކޮޅެއްގެ ތެރޭގައި، ލިވަޕޫލްގެ ފްލޯރިއަން ވާޓްޒް ދިން ބޯޅައަކަށް އަރައި، ބާކޮލާ ޖެހި ޝޮޓް ދިޔައީ ދަނޑިކައިރިންނެވެ. މެޗުގެ ފަހުކޮޅުގައި، އަނިޔާގެ ކަމެއް ދިމާވެގެން ބާކޮލާ ބަދަލުކުރި އެވެ.
މެޗުން ލިވަޕޫލް މޮޅުކޮށްދިން ލަނޑު ޖެހީ 50 ވަނަ މިނިޓްގައި އަލެކްސިސް މެކް އަލިސްޓާ އެވެ. މިއީ، އިސާކް ދިން ބޯޅައަަކުން އޭރިއާ ރޮނގުކައިރިން ގޯލުގެ ތިރީ ކަނަށް ބޯޅަ ފޮނުވާލައިގެން މެކް އަލިސްޓާ ޖެހި ލަނޑެކެވެ.
ލިވަޕޫލާ މި ސީޒަނުގައި ހަވާލުވި ކޯޗު އަންޑޯނީ އިރައޯލާ، ފުރަތަމަ ފަހަރަށް ކޯޗިން ކެރިއަރުގައި ޗެމްޕިއަންސް ލީގުގެ މެޗެއްގައި ނުކުމެ މި ވަނީ މޮޅުވެފަ އެވެ. އަނެއްކޮޅުން، ލިވަޕޫލަކީ ޗެމްޕިއަންސް ލީގުގަައި އެތުލެޓިކޯ އަތުން ޖެހިޖެހިގެން ހަތަރު މެޗުން މޮޅުވި ފުރަތަމަ ޓީމެވެ.
ނަޕޯލީގެ ޑިއޭގޯ އަރްމާންޑޯ މަރަޑޯނާ ސްޓޭޑިއަމްގައި ކުޅުނު މެޗުގައި އާސެނަލުން ވަނީ ކޮންޓްރޯލް ނަގައިގެން ރަނގަޅު ކުޅުމެއް ދައްކައިފަ އެވެ. އެކަމަކު، ފުރަތަމަ ހާފުގައި، އާސެނަލަށް ލަނޑު ޖަހަން ލިބުނު ފުރުސަތުތަކުގެ ބޭނުމެއް ހިފޭގޮތެއް ނުވި އެވެ.
މެޗުގައި އާސެނަލުން ޖެހި ހަމައެކަނި ލަނޑު ކާމިޔާބުކޮށްފައިވަނީ، މެޗުގެ ފުރިހަމަ ވަގުތު ހަމަވާން 15 މިިނިޓަށް ވެފައި ހުއްޓަ އެވެ. މި ސީޒަނުގައި އާސެނަލާ ގުޅުމަށް ފަހު، ރަނގަޅު ކުޅުމެއް ދައްކަމުން އަންނަ ކްރިސްޓޯސް ޒޯލިސް ދިން ބޯޅައަކުން މި ލަނޑު ޖެހީ، މި ސީޒަނުގައި ލަނޑު ޖެހުމުގެ ރަނގަޅު ފޯމެއްގައި ހުރި އާސެނަލްގެ ކެޕްޓަން، މާޓީން އޮޑެގާޑް އެވެ.
