ކުރީ ސަރުކާރުން ސްޓޭޓް ބޭންކް އޮފް އިންޑިއާ (އެސްބީއައި) އަށް ވިއްކާފައިވާ ޓީބިލުތަކަށް ދައްކަން ޖެހޭ ފައިސާގެ ތެރެއިން އިތުރު 50 މިލިއަން ޑޮލަރު މިއަދު ދައްކައިފި ކަމަށް ރައީސް މުހައްމަދު މުއިއްޒު އިއުލާންކުރައްވައިފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި، މުއިއްޒު ވިދާޅުވީ އިންޑިއާއިން ނަގާފައިވާ 50 މިލިއަން ޑޮލަރުގެ "ލޯނަކަށް" ދައްކަން ޖެހޭ ފައިސާ މިއަދުގެ ހެނދުނުގެ ވަގުތެއްގައި ދައްކާފައިވާ ކަމަށެވެ.
ސަރުކާރުން އަނބުރާ އަދާކުރީ ލޯނަކަށް ދައްކަން ޖެހޭ ފައިސާ ކަމަށް މުއިއްޒު ވިދާޅުވި ނަމަވެސް، މިއީ އިންޑިއާ ސަރުކާރު މެދުވެރިވެގެން ބަޖެޓު ސަޕޯޓުގެ ގޮތުގައި އެސްބީއައިއަށް ވިއްކާފައިވާ 150 މިލިއަން ޑޮލަރުގެ ޓީބިލުތަކަށް ދައްކަން ޖެހޭ ފައިސާ އެވެ. ކުރީ ސަރުކާރުން ވަނީ ތިން ފަހަރެއްގައި މިި ދަރަނި ރޯލްއޯވާކޮށްފަ އެވެ.
ނަމަވެސް މި ސަރުކާރުން ވަނީ ވެރިކަމާ ހަވާލުވުމަށް ފަހު، އެ ފައިސާގެ ތެރެއިން 50 މިލިއަން ޑޮލަރު އަނބުރާ ދައްކާފަ އެވެ. އެ ފަހަރު ފައިސާ ދެއްކުމަށް ފަހު، މި ސަރުކާރުން ވެސް އިންޑިއާ ސަރުކާރުގައި އެދިގެން ބަކީ 100 މިލިއަން ޑޮލަރުގެ ދަރަނި ވަނީ ރޯލްއޯވާކޮށްފަ އެވެ.
މުއިއްޒު ވިދާޅުވީ ބާކީ 50 މިލިއަން ޑޮލަރު ވެސް އެ ފައިސާ ދައްކަން ޖެހޭ ތާރީހުގައި ދައްކާ ހަލާސްކުރާނެ ކަމަށެވެ. އެއީ މި އަހަރުގެ ސެޕްޓެމްބަރު 17، އެވެ.
އެސްބީއައިއަށް ދެއްކި 50 މިލިއަން ޑޮލަރާ އެކީ، މި ވޭތުވީ 40 ދުވަހުގެ ތެރޭގައި ދިވެހި ސަރުކާރުން މި ވަނީ 974 މިލިއަން ޑޮލަރު ދަރަނި އަނބުރާ އަދާކޮށްފަ އެވެ. މި ދަރަނީގެ ތެރޭގައި ދެން ހިމެނެނީ ކުރީ ސަރުކާރުން ވިއްކާފައިވާ ސުކޫކަށް ދެއްކި 524 މިލިއަން ޑޮލަރާއި، މި ސަރުކާރުން ނެގި އާރުބީއައިގެ 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީ އެވެ.
