ނިއު ޔޯކް، ޔުނައިޓެޑް ސްޓޭޓްސް (ސެޕްޓެމްބަރު 15) - ޔޫއެސް އޯޕަން ފައިނަލުގައި ބަލިވި ބެލަރޫސްގެ ޓެނިސް ތަރި، އަރީނާ ސަބަލެންކާ، އެ މެޗަށް ފަހު، ރުޅިގަނޑު ފަޅައިގެން ގޮސް އަހުލާގީ ގޮތުން ދެރަ ކަންތައްތަކެއް ކުރުމާ އެކު އޭނާ އަށް ބޮޑު ޖޫރިމަނާއެއް އައުމުގެ ފުރުސަތު ބޮޑުވެއްޖެ އެވެ.
ޔޫއެސް އޯޕަން އަންހެން ސިންގަލްސް ތަށި ޖެހިޖެހިގެން ތިން ފަހަރު ހޯދަން ނުކުތް ސަބަލެންކާ ވަނީ ކަޒަކްސްތާންގެ އެލީނާ ރިބަކީނާ އަތުން ބަލިވެފަ އެވެ. އަނެއްކޮޅުން، މިއީ، ދުނިޔޭގެ ރޭންކިންގެ އެއް ވަނައިގައި އޮތް ސަބަލެންކާ އަށް 2022 ވަނަ އަހަރުގެ ފަހުން، ގްރޭންޑް ސްލޭމް ޓެނިސް މުބާރާތެއް ނުލިބި ނިންމާލަން ޖެހުނު ފުަރަތަމަ ފަހަރެެވެ. ސަބަލެންކާ ވަނީ މި އަހަރުގެ އޮސްޓްރޭލިއަން އޯޕަން ފައިނަލުގައި ވެސް ރިބަކީނާ އަތުން ބަލިވެފަ އެވެ. އަދި، އޭގެ ފަހުން، ސަބަލެންކާ ވަނީ، ފްރެންޗް އޯޕަން ޓެނިސް މުބާރާތުގެ ކުއާޓާ ފައިނަލުން އަދި ވިމްބަލްޑަން ޓެނިސް މުބާރާތުގެ ހަތަރު ވަނަ ބުރުން ކަޓައިފަ އެވެ.
ޔޫއެސް އޯޕަން ފައިނަލް މެޗުން މި ފަހަރު ބަލިވުމާ އެކު، ސަބަލެންކާ ވަނީ އޭނާގެ ރެކެޓް ހަލާކުކޮށްލައިފަ އެވެ. މީގެ ކުރިން ވެސް އެތައް މުބާރާތަކުން ކަޓައިގެން ސަބަލެންކާ ފަރާތުން އެކަން ވަނީ ފެނިފަ އެވެ. އެހެންކަމުން، ތަކުރާރުކޮށް އެއް ކަމެއް ކޮށްފައިވާތީވެ، މި ފަަހަރު އެކަމަށް އޭނާ އަށް އަންނަ ޖޫރިމަނާ، 50،000 ޑޮލަރަށް އަރާނެ ކަމަށް ބެލެވެ އެވެ. އަދި، ފައިނަލް މެޗު ނިމުނު ވަގުތު ކެމަރާމަން ތަންކޮޅެއް ކައިރިން، ސަބަލެންކާގެ މަންޒަރުތަކެއް ނަގަން ކައިރިވި ވަގުތުގައި، ކެމަރާ އަށް ބޭއަދަބީ ބަހުން ސަބަލެންކާ ވަނީ މުހާތަބުކޮށްފަ އެވެ. އެކަމާ ގުޅިގެން، އޭނާ އަށް 20،000 ޑޮލަރުގެ ޖޫރިމަނާއެއް އަައުމުގެ ފުރުސަތު ބޮޑެވެ. އެހެންކަމުން، މުޅި ޖުމްލަ އެކު ސަބަލެންކާގެ ޖޫރިމަނާ، 70،000 ޑޮލަރަށް އަރާނެ ކަމަށް ބެލެވެ އެވެ.
ޔޫއެސް އޯޕަން ފައިނަލުން ބަލިވި ސަބަލެންކާ އަށް ވަނީ 99 ހަފްތާ އަށް ފަހު ދުނިޔޭގެ ރޭންކިން އެއް ވަނަ ވެސް ގެއްލިފަ އެވެ. ސަބަލެންކާ އަށް ޔޫއެސް އޯޕަން ރަނަރަޕްގެ އިނާމް ފައިސާގެ ގޮތުގައި، 2.8 މިލިއަން ޑޮލަރު ލިބިފައިވާއިރު، އޭނާ ޖޫރިމަނާ ކުރާނަމަ، އެ އަދަދު އިނާމް ފައިސާ އިން އުނިކުރާނެ އެވެ.
ކެރިއަރުގައި ފުރަތަމަ ފަހަރަށް ދުނިޔޭގެ ރޭންކިން އެއް ވަނަ އަށް އެރި ރިބަކީނާ އަށް ޔޫއެސް އޯޕަން ޗެމްޕިއަންކަން ހޯދައިގެން އިނާމް ފައިސާގެ ގޮތުގައި 5.5 މިލިއަން ޑޮލަރު ވަނީ ލިބިފަ އެވެ.
