ނިއު ޔޯކް، ޔުނައިޓެޑް ސްޓޭޓްސް (އޮގަސްޓް 30) - ދުނިޔޭގެ ރޭންކިން އެއް ވަނަ އަންހެން ޓެނިސް ކުޅުންތެރިޔާގެ މަގާމު ދިފާއުކުރުމަށްޓަކައި މިހާރު ކުރިއަށްދާ ޔޫއެސް އޯޕަންގެ އަންހެން ސިންގަލްސް ތަށި، ބެލަރޫސްގެ އަރީނާ ސަބަލެންކާ ކާމިޔާބުކުރަން ޖެހޭނެ އެވެ.
ދުނިޔޭގެ އެއް ވަނައިގައި އުމުރުން 28 އަހަރުގެ ސަބަލެންކާ މަގާމު ދަމަހައްޓަމުން އަންނަތާ 99 ހަފްތާ ވަނީ ވެފަ އެވެ. އިންޑިއަން ވެލްސް އާއި މިއާމީ އޯޕަން ކާމިޔާބުކޮށް ރޭންކިން ކުރީގައި 3000 ޕޮއިންޓުގެ ލީޑެއް ސަބަލެންކާ ވަނީ ނަގައިފަ އެވެ. އެކަމަކު، އޭގެ ފަހުން، ފްރެންޗް އޯޕަން ޓެނިސް މުބާރާތުގެ ކުއާޓާ ފައިނަލުން އަދި ވިމްބަލްޑަން ޓެނިސް މުބާރާތުގެ ހަތަރު ވަނަ ބުރުން ސަބަލެންކާ ކެޓުމާ އެކު، ރޭންކިން ކުރީގައި އޭނާގެ ލީޑު ވަނީ ކުޑަވެފަ އެވެ.
ސަބަލެންކާ، މި ވަގުތު އެއް ވަނައިގައި އޮތީ 434 ޕޮއިންޓުގެ ފަރަގަކުން ދެ ވަނައިގައި އޮތް ކަޒަކްސްތާންގެ އެލީނާ ރިބަކީނާ އަށް ވުރެން ކުރީގަ އެވެ. އެކަމަކު، މި ފަހަރުގެ ޔޫއެސް އޯޕަންގައި ނަތީޖާތައް ނުކުންނަ ގޮތަކުން ސަބަލެންކާ އަށް އެއް ވަނަ ގެއްލި، ރިބަކީނާ އަށް އެ މަގާމު ލިބުމުގެ ފުރުސަތު އެބައޮތެެވެ. މަގާމު ދިފާއުކުރަން ސަބަލެންކާ އަށް އެންމެ ބޮޑު ފުރުސަތެއް އޮތީ މުބާރާތުގެ ތަށި ހޯދައިގެންނެވެ،
ޓެނިހުގެ ގްރޭންޑް ސްލޭމް ހަތަރު ގްރޭންޑް ސްލޭމް ކާމިޔާބު ކޮށްފައިވާ ސަބަލެންކާ ވަނީ ދެ ފަހަރެއްގެ މަތިން ޔޫއެސް އޯޕަން ކާމިޔާބުކޮށްފަ އެވެ. އެއީ، 2024 އާއި 2025 ވަނަ އަހަރު އެވެ. މި ފަަހަރުގެ މުބާރާތަށް ސަބަލެންކާ ނުކުންނާނީ ޖެހިޖެހިގެން ތިން ފަހަރު މި މުބާރާތް ކާމިޔާބު ކުރުމުގެ އަޒުމުގަ އެވެ.
ސަބަލެންކާ ބުނީ މި ފަހަރުގެ ޔޫއެސް އޯޕަންގައި އޭނާގެ ރަނގަޅު ކުޅުން ދެއްކޭނެ ކަމުގެ އުންމީދު އެބައޮތް ކަމަށެވެ.
"ވަރަށް ރަނގަޅު ފިލާވަޅުތަކެއް މި ސީޒަނުގައި ލިބިއްޖެ. ދަސްވި ކަމަކީ ބުރަކޮށް މަސައްކަތްކޮށްގެން ނޫނީ ހާލަތު ބަދަލުކުރެވެން ނެތްކަން،" ސަބަލެންކާ ބުންޏެވެ.
އެންމެ ރަނގަޅު ފޯމެއްގައި ކުޅެމުންދިޔައިރު ވެސް ސަބަލެންކާ ވަނީ ގްރޭންޑް ސްލޭމް ހަތަރު މުބާރާތުގެ ފައިނަލުންނާއި ހަ ސެމީ ފައިނަލުން ބަލިވެފަ އެވެ. އެ މެޗުތަކުން ވެސް ގިނަ ކަންތައްތަކެއް ދަސްވެފައިވާކަން ފާހަގަކޮށް، ސަބަލެންކާ ބުނީ، އެންމެ މުހިންމު ކަމަކީ އަމިއްލަ އަށް ކަންކަން ބަލައިގެން ކޯޗުންގެ އިރުޝާދު އަހައިގެން ކުރިއަށް ދިއުން ކަމަށެެވެ.
މާދަމާ ޔޫއެސް އޯޕަންގެ ފުރަތަަމަ ބުރުގައި ސަބަލެންކާ ކުޅޭ ފުރަތަމަ މެޗުގައި ނުކުންނާނީ ކޮލަމްބިއާގެ ކަމީލާ އޮސޯރިއޯއާ ދެކޮޅަށެވެ.
