ނިއު ޔޯކް، ޔުނައިޓެޑް ސްޓޭޓްސް (ސެޕްޓެމްބަރު 12) - މި ފަހަރުގެ ޔޫއެސް އޯޕަން ޓެނިސް މުބާރާތުގައި ތަފާތު ފޯމެއްގައި ކުޅެމުން އަންނަ އެމެރިކާގެ ބެން ޝެލްޓަން، މުބާރާތުގެ ފިރިހެން ސިންގަލްސް ފައިނަލުގައި ޖަރުމަނުގެ އަލެކްސަންޑަ ޒްވެރެވާ ދެކޮޅަށް ކުޅެން ޖެހިއްޖެ އެވެ.
ޝެލްޓަން އަށް މި ފަހަރުގެ ޔޫއެސް އޯޕަންގައި ގިނަ ބަޔެއްގެ ސަމާލުކަން ހުއްޓުނު ހިސާބަކީ، އެންމެ ފަހުގެ ޗެމްޕިއަން، ސްޕެއިނުގެ ކާލޯސް އަލްކަރާޒް އަތުން ކުއާާޓާ ފައިނަލުގައި މޮޅުވި ހިސާބުންނެވެ. ސެމީ ފައިނަލުގައި ޝެލްޓަން ކުޅެން ޖެހުނީ އެމެރިކާގެ ފްރާންސެސް ޓިއާފޯއާ އެވެ.
ޔޫއެސް އޯޕަން ކުއާޓާ ފައިނަލުގައި ޝެލްޓަން އަތުން އަލްކަރާޒް ކަޓައިފި
ޔޫއެސް އޯޕަންގެ ކުއާޓާ ފައިނަލުގައި އެމެރިކާގެ ބެން ޝެލްޓަން އަތުން ބަލިވެ، އެންމެ ފަހުގެ ޗެމްޕިއަން ކާލޯސް އަލްކަރާޒް މުބާރާތުން ކަޓައިފި. ހަތަރު ގަޑިއިރަށް ވުރެ ގިނަ އިރުވީ މި މެޗުން ޝެލްޓަން ހޯދި ކާމިޔާބީއާއެކު، 23 އަހަރަށް ފަހު އެމެރިކާގެ ކުޅުންތެރިއަކަށް މި މުބާރާތުގެ ތަށި ހޯދުމުގެ ފުރުސަތު ވަނީ ބޮޑުވެފައި
ޓިއާފޯއާ ދެކޮޅަށް ކުޅެން ޖެހުނު މެޗުގައި ވެސް ޝެލްޓަން ވަނީ ތަފާތު ކުޅުމެއް ދައްކައިފަ އެވެ. ހަތަރު ސެޓަށް ދިގު ދެމިގެންދިޔަ މި މެޗުން ޝެލްޓަން މޮޅުވެ، ކެރިއަރުގައި ފުރަތަމަ ފަހަރަށް މި ވަނީ ގްރޭންޑް ސްލޭމް ޓެނިސް މުބާރާތެއްގެ ފައިނަލުން ޖާގަ ހޯދައިފަ އެވެ. ޓިއާފޯ އަތުން މޮޅުވި މެޗުގައި، އުމުރުން 23 އަހަރުގެ ޝެލްޓަން ސެޓުތައް ގެންދިޔައީ، 4-6 6-3 6-3 7-5 އިންނެވެ.
ޒްވެރެވް، ފައިނަލުގެ ޖާގައެއް ހޯދާފައިވަނީ، ސެމީ ފައިނަލުގައި، ރަޝިއާގެ ކަރެން ކަޗަނޯވް ބަލިކޮށްފަ އެވެ. އެ ގޮތުން، ސެމީ ފައިނަލް މެޗުގައި ޒްވެރެވް މޮޅުވިއިރު، މެޗުގެ ސެޓުތައް ގޮސްފައިވަނީ، 6-3 7-6 (9-7) 7-6 (8-6) އިންނެވެ. މި ނަތީޖާއާ އެކު، ޒްވެރެވް ވަނީ ޖެހިޖެހިގެން ތިން ގްރޭންޑް ސްލޭމް ފައިނަލުން ޖާގަ ހޯދައިފަ އެވެ.
މިދިޔަ މެއި މަހު ފްރެންޗް އޯޕަންގެ ޗެމްޕިއަންކަން ހޯދި ޒްވެރެވް ވަނީ ވިމްބަލްޑަން ފައިނަލުގައި ޖަނިކް ސިނާ އަތުން ބަލިވެފަ އެވެ. ޓޯކިޔޯ އޮލިމްޕިކްސްގެ ޓެނިސް ފިރިހެން ސިންގަލްސް އިވެންޓުގެ ރަން މެޑަލް ހޯދި ޒްވެރެވް މަސައްކަތްކުރަމުން އަންނަނީ ކެރިއަރުގެ ދެ ވަނަ ގްރޭންޑް ސްލޭމް ތަށި ހޯދުމަށެވެ.
އަނެއްކޮޅުން، ޝެލްޓަން އަމާޒުހިފައިގެން ހުރީ ތާރީހީ ކާމިޔާބަކަށެވެ. ތޭވީސް އަހަރު ތެރޭ ޔޫއެސް އޯޕަންގައި ފުރަތަމަ ފަހަރަށް އެމެރިކާ އަށް ނިސްބަތްވާ ކުޅުންތެރިއަކު ތަށި ހޯދުމުގެ ފުރުސަތު މި ފަހަރު އެބައޮތެވެ. އެންމެ ފަހުން، 2003 ވަނަ އަހަރު އެމެރިކާގެ އެންޑީ ރޮޑިކް، ޔޫއެސް އޯޕަން ތަށި ހޯދިއިރު، ޝެލްޓަން އަށް އެއް އަހަރު ވެސް ނުފުރެ އެވެ.
ނިއު ޔޯކްގެ އާތޫރު އޭޝް ސްޓޭޑިއަމްގައި ޒްވެރެވް އާއި ޝެލްޓަން ކުޅޭ މި އަހަރުގެ ޔޫއެސް އޯޕަން ފިރިހެން ސިންގަލްސް ފައިނަލް މެޗު އޮތީ މާދަމާ އެވެ. ޔޫއެސް އޯޕަން އަކީ އަަހަރުގެ ފަަހު ގްރޭންޑް ސްލޭމް މުބާރާތެވެ.
