ނިއު ޔޯކް، ޔުނައިޓެޑް ސްޓޭޓްސް (ސެޕްޓެމްބަރު 14) - ފައިނަލުގައި އެމެރިކާގެ ބެން ޝެލްޓަން ކައިރިން ތަޖުރިބާގެ ބޭނުންހިފައި، އޭނާ ބަލިކުރުމަށް ފަހު، ޖަރުމަނުގެ ތަރި، އަލެކްސަންޑަ ޒްވެރެވް، ޔޫއެސް އޯޕަން ފިރިހެން ސިންގަލްސް ޗެމްޕިއަންކަން ހޯދައިފި އެވެ.
މިދިޔަ މެއި މަހު ފްރެންޗް އޯޕަންގެ ޗެމްޕިއަންކަން ހޯދި، އުމުރުން 29 އަހަރުގެ ޒްވެރެވް ވަނީ ވިމްބަލްޑަން ފައިނަލުގައި ޖަނިކް ސިނާ އަތުން ބަލިވެފަ އެވެ. ޓޯކިޔޯ އޮލިމްޕިކްސްގެ ޓެނިސް ފިރިހެން ސިންގަލްސް އިވެންޓުގެ ރަން މެޑަލް ހޯދި ޒްވެރެވް މި ވަނީ، ޔޫއެސް އޯޕަންގެ ކާމިޔާބާ އެކު، ދެ ވަނަ ގްރޭންޑް ސްލޭމް ތަށި ހޯދައިފަ އެވެ.
ފައިނަލް މެޗުގައި ޒްވެރެވް ވަނީ ޝެލްޓަން އަތުން ރަނގަޅު ކުޅުމެއް ދައްކައިގެން މޮޅުވެފަ އެވެ. މެޗުގެ ސެޓުތައް ދިޔައީ، 6-3 7-6 (7-2) 5-7 6-2 އިންނެވެ. މެޗުގެ އެންމެ މުހިންމު ވަގުުތުގައި، ޝެލްޓަންގެ ކިބައިގައި ޕްރެޝަރު މެޗުތަކުގެ ތަޖުރިބާ މަދުވުމުގެ ފައިދާ، ޒްވެރެވް ވަނީ ނަގައިފަ އެވެ. އަދި، މި އަހަރުގެ ފްރެންޗް އޯޕަން ފައިނަލުގައި ދެއްކި ފޯމު ޒްވެރެވް ވަނީ ތަކުރާރުކޮށްފަ އެވެ.
އިޓަލީގެ ޖަނިކް ސިނާ އާއި ސްޕެއިނުގެ ކާލޯސް އަލްކަރާޒް، 2024 އިން ފެށިގެން ގްރޭންޑް ސްލޭމް މުބާރާތްތަކުގެ ތަށި ހޯދާފައިވާއިރު، އެ ދެ ކުޅުންތެރިންނަށް އަނިޔާ އާއި ފޯމު ދަށްވުމުގެ މައްސަލަ ދިމާވުމުގެ ފައިދާ ޒްވެރެވް މި ވަނީ ރަނގަޅަށް ނަގައިފަ އެވެ.
ފައިނަލުގައި ޒްވެރެވްއާ ދެކޮޅަށް ކުޅުނު ޝެލްޓަން ވަނީ، ޔޫއެސް އޯޕަން ކުއާޓާ ފައިނަލުގައި މިދިޔަ އަހަރުގެ ޔޫއެސް އޯޕަންގެ ޗެމްޕިއަން، އަލްކަރާޒް ބަލިކޮށްފަ އެވެ. މިއީ، އަލްކަރާޒްގެ އަތުގެ ކުޑަ ހުޅަށް ލިބުނު އަނިޔާ އަކުން ރިކަވާވެގެން ހަތަރު މަސް ތެރޭ ކުޅުނު ފުރަތަމަ ގްރޭންޑް ސްލޭމް މުބާރާތެވެ.
ޝެލްޓަން، މި ފަހަރުގެ ޔޫއެސް އޯޕަންގައި އަމާޒުހިފައިގެން ހުރީ ތާރީހީ ކާމިޔާބަކަށެވެ. އެއީ، ތޭވީސް އަހަރު ތެރޭ ޔޫއެސް އޯޕަންގައި ފުރަތަމަ ފަހަރަށް އެމެރިކާ އަށް ނިސްބަތްވާ ކުޅުންތެރިއަކު ތަށި ހޯދުމަށެވެ. އެންމެ ފަހުން، 2003 ވަނަ އަހަރު އެމެރިކާގެ އެންޑީ ރޮޑިކް، ޔޫއެސް އޯޕަން ތަށި ހޯދިއިރު، ޝެލްޓަން އަށް އެއް އަހަރު ވެސް ނުފުރެ އެވެ. އެކަމަކު، ޝެލްޓަން އަށް ވެސް އެކަން ކާމިޔާބު ކުރެވޭ ގޮތެއް މި ފަހަރު ނުވި އެވެ.
ޒްވެރެވް ވަނީ ޔޫއެސް އޯޕަންގެ ކާމިޔާބާ އެކު، ދުނިޔޭގެ ރޭންކިންގައި އެއް ވަނައިގައި އޮތް ސިނާއާ ދެމެދުގެ ޕޮއިންޓުގެ ފަރަގުކުޑަކޮށްފަ އެވެ. ޔޫއެސް އޯޕަން ފެށުމުގެ ކުރިން، ދުނިޔޭގެ ރޭންކިން އެއް ވަނައިގައި އޮތް ސިނާ އަށް 12،800 ޕޮއިންޓް ލިބިފައިވާއިރު، ދެ ވަނައިގައި އޮތް ޒްވެރެވް އަށް ވަނީ 7790 ޕޮއިންޓް ލިބިފަ އެވެ. އަދި، ތިން ވަނައިގައި އޮތް އަލްކަރާޒަށް ވަނީ 7160 ޕޮއިންޓް ލިބިފަ އެެވެ. ޔޫއެސް އޯޕަންގެ ކާމިޔާބާ އެކު، ޒްވެރެވް އާއި ސިނާގެ ޕޮއިންޓުގެ ފަރަގު، 2000 ޕޮއިންޓަށް ކުޑަވާނެ އެވެ.
