ރެން، ފްރާންސް (އޮގަސްޓް 24) - މި ފަހަރުގެ ޓްރާންސްފާ މާކެޓްގައި ބާސެލޯނާ ދޫކޮށް ޕީއެސްޖީ އަށް ބަދަލުވި ސްޕެއިންގެ ފޯވާޑް، ފެރާން ޓޮރޭސް ޖެހި ދެ ގޯލާ އެކު، 2-2 އިން ރެންއާ އެއްވަރުކޮށް ޕީއެސްޖީ ބަލިނުވެ ސަލާމަތްވެއްޖެ އެވެ.
މި ފަހަރުގެ ސީޒަން ފެށިއިރު، ޔުއެފާ ސުޕަ ކަޕްގެ ޗެމްޕިއަންކަން އެސްޓަން ވިލާ ބަލިކޮށް ހޯދި ޕީއެސްޖީ ވަނީ ފްރެންޗް ސުޕަ ކަޕް ފައިނަލުގައި ލޯންސް އަތުން ބަލިވެފަ އެވެ. ފްރެންޗް ލީގުގެ އާ ސީޒަނުގެ ފުރަތަމަ މެޗުގައި ރޭ ރެން ދަނޑުގައި ފުރަތަަމަ ހާފު ނިމުނުއިރު، ޕީއެސްޖީ އޮތީ ދެ ގޯލު ފަހަތުގަ އެވެ. ނަތީޖާ ބަދަލުކުރަން ޕީއެސްޖީން ކުރި މަސައްަކަތުގައި އެ ޓީމުގެ ކޯޗު، ލުއިސް އެންރީކޭ ވަނީ ދެ ވަނަ ހާފަށް ފެރާން ކުޅެން އަރުވައިފަ އެވެ.
ޕީއެސްޖީގެ ފަރާތުން ދަށް ކުޅުމެއް ފެނުނު މި މެޗުގައި ރެން އިން ވަނީ ނުވަ ވަނަ މިނިޓްގައި ލީޑުނަގައިފަ އެވެ. މި ލަނޑު ޖެހީ، ސެބަސްޓިއަން ޒީމާންސްކީ އެވެ. މިދިޔަ ސީޒަނުގައި ފްރެންޗް ލީގުގެ ހަ ވަނައިގައި ނިންމި ރެން އިން ވަނީ މެޗުގެ 38 ވަނަ މިނިޓްގައި ދެ ވަނަ ލަނޑު ޖަަހައި ލީޑުފުޅާކޮށްފަ އެވެ. މި ލަނޑު ޖެހީ އެސްޓެބާން ލެޕޯލް އެވެ.
ދެ ވަނަ ހާފަށް ޕީއެސްޖީން ފެރާން ކުޅެން އެރުވީ އޮސްމާން ޑެމްބެލޭގެ ބަދަލުގަ އެވެ. ފެރާން، ފުރަތަމަ ލަނޑު ޖެހީ 71 ވަނަ މިނިޓްގަ އެވެ. މި ލަނޑު ޖަހަން ފުރުސަތު ތަނަވަސްކޮށްދިނީ ފަބިއަން ރުއިޒް އެވެ. އަދި، މެޗުުގެ 82 ވަނަ މިނިޓްގައި، ޕީއެސްޖީ އަށް އެއްވަަރުކޮށްދިން ލަނޑު ފެރާން ކާމިޔާބުކުރީ ވެސް ފަބިއަން ރުއިޒް ދިން ބޯޅައަކުންނެވެ.
އެމެރިކާ، މެކްސިކޯ އަދި ކެނަޑާގައި ޖޫން/ޖުލައިގައި ކުރިއަށްދިޔަ ފީފާ ވޯލްޑް ކަޕްގެ ޗެމްޕިއަންކަން ސްޕެއިނުން ހޯދިިއިރު، ފައިނަލް މެޗުގައި އާޖެންޓީނާ ކޮޅަށް ސްޕެއިންގެ ހަމައެކަނި ލަނޑު އިތުރު ވަގުތުގެ ދެ ވަނަ ހާފުގައި ކާމިޔާބުކުރީ ފެރާން އެވެ. ކުރިން މެންޗެސްޓާ ސިޓީ އާއި ވެލެންސިއާ އަށް ވެސް ކުޅުނު ފެރާން، ޕީއެސްޖީ އަށް ބަދަލުވި ޑީލް 55 މިލިއަން ޑޮލަރަށް އަރަ އެވެ.
ޕީއެސްޖީން ފެރާން ގަތީ އެ ޓީމަށް ކުޅެމުންދިޔަ ޕޯޗުގަލްގެ ފޯވާޑް، ގޮންޒާލޯ ރާމޯސް، އިޓަލީގެ އޭސީ މިލާނަށް ދިއުމުންނެވެ. ޕީއެސްޖީން މަސައްކަތް ފަށާފައި މި ވަނީ، ޖެހިޖެހިގެން ހަ ވަނަ ފަހަރަށް ފްރެންޗް ލީގުގެ ޗެމްޕިއަންކަން ހޯދުމަށެވެ.
