ސްރީލަންކާގެ ހަރުކަށި ހާމުދުރު ގަލަގޮޑައައްތޭ ޏާނަސާރާ އަށް ދީފައި އޮތް ރިޔާސީ އާފޫއާންމު ބާތިލްކޮށް، އެނބުރި ޖަލަށް ދާންޖެހުމުން ވީނުވީއެއް ނޭނގި އޭނާ ގެއްލިއްޖެ އެވެ.
ޏާނަސާރާ އަށް 2019 ވަނަ އަހަރު ދީފައިވާ ރިޔާސީ އަފޫއާންމު ސުޕްރީމް ކޯޓުން ބާތިލުކުރުމާ ގުޅިގެން ޖަލު ހުކުމުގެ ބާކީބައި ފުރިހަމަކުރުމަށް އޭނާ ހޯދުމުގެ މަސައްކަތް ވަނީ ފަށައިފަ އެވެ. އެ ހާމުދުރުގެ ފައްޅިއަށް ޖަލުގެ އޮފިސަރުން ގޮސް، އޭނާ އަނބުރާ ޖަލަށް ގެންދިއުމަށް މަސައްކަތްކުރުމުން އެހެން ހާމުދުރުން ބުނީ އޭނާ ވީތަނެއް ނޭނގޭ ބުނެފައިވާ ކަމަށް ލަންކާގެ ބައެއް ނޫސްތަކުން ރިޕޯޓުކޮށްފައިވެ އެވެ.
ކުރީގެ ރައީސް މައިތުރިޕާލާ ސިރިސޭނާ 2019 ގެ މެއި މަހު އޭނާއަށް ރިޔާސީ މައާފެއް ދެއްވީ ހަ އަހަރުގެ ޖަލު ހުކުމަކުން އެންމެ ނުވަ މަސް ދުވަސް ހޭދަކުރުމަށްފަހު އެވެ. ނަމަވެސް، އެ ރިޔާސީ މައާފަކީ ގާނޫނާ ހިލާފު އަދި އާންމު އިތުބާރާއި އަދުލުއިންސާފުގެ ހަމަތަކާ ހިލާފަށް ދީފައިވާ އެއްޗެއްކަމަށް ކަނޑައަޅައި ސުޕްރީމް ކޯޓުގެ ތިން ފަނޑިޔާރުންގެ ބެންޗުން ވަނީ އެ ނިންމުން ބާތިލުކޮށްފައެވެ.
ކޯޓުގެ ހުރުމަތް ކެނޑުމުގެ ކުށުގައި 2018 ވަނަ އަހަރު ޏާނަސާރާއަށް މި ހުކުމް އިއްވާފައިވަނީ 2010 ވަނަ އަހަރު ގެއްލުނު ނޫސްވެރިޔާ އަދި ކުރެހުންތެރިޔާ ޕްރަގީތު އެކްނަލިގޮޑާގެ އަނބިކަނބަލުން ސަންޔާ އެކްނަލިގޮޑާއަށް ބިރުދެއްކި މައްސަލައިގައެވެ.
އެ ހާދިސާ ހިނގާފައިވަނީ ޕްރަގީތު ވަގަށް ނެގި ކަމަށް ތުހުމަތުކުރެވޭ އަސްކަރީ އިންޓެލިޖެންސް އޮފިސަރުންގެ ދިފާއުގައި ވާހަކަދެއްކުމަށް ޏާނަސާރާ ކޯޓުގެ އަޑުއެހުމެއް މެދުކަނޑާލުމަށްފަހު ވަދެގަތް ވަގުތުގަ އެވެ.
ސްރީލަންކާގެ ތާރީހުގައި ހާމުދުރެއްގެ މައްޗަށް ކުށް ސާބިތުވެ ޖަލު ހުކުމެއް އައުމަކީ ވަރަށް މަދުން ނޫނީ ނުވާ ކަމެކެވެ. ރާޖަޕަކްސަ އާއި އޭނާގެ ކޮއްކޮ ގޮތާބަޔާ ރާޖަޕަކްސަގެ ވަރުގަދަ ސަޕޯޓަރެއް ކަމަށްވާ ޏާނަސާރާގެ މައްޗަށް އިސްލާމްދީނަށް ފުރައްސާރަކޮށް ދީނީ ނަފުރަތު އުފެއްދި މައްސަލައިގައި 2025 ވަނަ އަހަރު ވެސް ވަނީ ނުވަ މަސް ދުވަހުގެ ޖަލު ހުކުމެއް އިއްވާފައެވެ.
