ސްރީލަންކާގެ އެންމެ ފަހުގެ ސިންހަޅަ ރަސްގެފާނުގެ ގަނޑުވަރުގައި ހުރި، އެތައް ގަރުނެއްވީ ހިލައެއް ވަގަށް ނެގުމުގައި އެހީތެރިވި ކަމުގެ ތުހުމަތުގައި، އެ ގައުމުގެ ކުރީގެ ވަޒީރަކު އޮގަސްޓް 18 ވަނަ ދުވަހު ހައްޔަރުކޮށްފި ކަމަށް އެ ގައުމުގެ ކޮރަޕްޝަނާ ދެކޮޅަށް މަސައްކަތްކުރާ އިދާރާއިން ބުނެފި އެވެ.
ކެހެލިޔާ ރަމްބުކްވެލާ ހައްޔަރުކުރީ، 1739 ވަނަ އަހަރާ ހަމައަށް ރަސްކަން ކުރެއްވި ރަސްގެފާނު، ވީރާ ޕަރަކްރަމާ ނަރެންދްރަސިންހަގެ ގަނޑުވަރުގެ ދޮރުމަތީގައި ފިޔަވަޅު އަޅާ ތަނެއްގެ ގޮތުގައި ބޭނުންކުރި، "މޫންސްޓޯން" ގެ ނަމުން މަޝްހޫރު ބަރު، ކަނޑައިނަގައިގެން ހަދާފައިވާ ވަށް ގްރެނައިޓް ހިލައެއް ވަގަށް ނެގި މައްސަލައިގަ އެވެ.
ކޮމިޝަން ޓު އިންވެސްޓިގޭޓް އެލިގޭޝަންސް އޮފް ބްރައިބަރީ އޯ ކޮރަޕްޝަން (ސީ.އައި.އޭ.ބީ.އޯ.ސީ) އިން ބުނި ގޮތުގައި، 2022 ވަނަ އަހަރުގެ ޑިސެމްބަރު މަހުގެ ތެރޭގައި ތާރީހީ ގޮތުން އަގުބޮޑު އެ ހިލަ އެތަނުން ނެގުމުގައި ރަމްބުކްވެލާ ބައިވެރިވެފައިވާ ކަމަށާއި، އަދި އެ ދުވަސްވަރު ފުލުހުން ހިންގި ތަހުގީގަށް އޭނާ ހުރަސްއަޅާފައިވާ ކަމަށެވެ.
ސީ.އައި.އޭ.ބީ.އޯ.ސީ އިން ބުނީ، ރަމްބުކްވެލާ ވަޒީރުކަމުގެ މަގާމުގައި ހުންނެވި ދުވަސްވަރު، އެ ވައްކަން ކުރުމަށް ރޭވުމާއި އެކަމަށް އެހީތެރިވެދީފައިވެ އެވެ.
މީގެ އިތުރުން، ރަމްބުކްވެލާގެ އަމިއްލަ ވިޔަފާރިއެއްގައި މަސައްކަތް ކުރުމަށް ދައުލަތުގެ ފައިސާ ބޭނުންކޮށްގެން ހަ މީހަކު ވަޒީފާގައި ބޭތިއްބި މައްސަލައިގައި ވެސް އޭނާގެ މައްޗަށް ދައުވާ އުފުލާފައިވާ ކަމަށް އެ ކޮމިޝަނުން ބުނެ އެވެ.
ރަމްބުކްވެލާ ހައްޔަރުކޮށްފައި މިވަނީ، އޭނާ ސިއްހީ ވަޒީރުގެ މަގާމުގައި ހުންނެވިއިރު، ސަރުކާރުގެ ހޮސްޕިޓަލްތަކަށް ފޭކު ބޭސް ގަތް މައްސަލައެއްގައި ކޯޓުގައި ޝަރީއަތް ހިނގަމުންދާ ދަނޑިވަޅެއްގަ އެވެ.
މި ބޭހުގެ މަކަރުވެރި މުއާމަލާތާ ގުޅިގެން ސިއްހީ ވުޒާރާގެ އިސް އެހެން ބައެއް ވެރިންގެ މައްޗަށް ވެސް ވަނީ ދައުވާ އުފުލާފަ އެވެ.
ސްރީލަންކާ ބަނގުރޫޓުވިކަން އިއުލާނުކޮށް، 2022 ވަނަ އަހަރުގެ އޭޕްރީލް މަހު އެ ގައުމުގެ 46 ބިލިއަން އެމެރިކާ ޑޮލަރުގެ ބޭރުގެ ދަރަނި ނުދެއްކި، ބޭހުގެ ތަދުމަޑުކަމެއް ކުރިމަތިވި ދުވަސްވަރު ސިއްހީ ވަޒީރަކަށް ހުންނެވީ ރަމްބުކްވެލާ އެވެ.
