ސްރީ ލަންކާގެ ސަރުކާރަށް މަތިންދާބޯޓެއް ގަންނަން އުޅުމުގައި ހިންގި ކަމަށް ބުނާ ކޮރަޕްޝަންގެ މައްސަލައެއްގައި އެ ގައުމުގެ ކުރީގެ ރައީސް މަހިންދަ ރާޖަޕަކްސަގެ ދަރިކަލުން ނަމާލް ރާޖަޕަކްސަ މިއަދު ހައްޔަރުކޮށްފި އެވެ.
ނަމާލް ހައްޔަރު ކުރީ ކޮރަޕްޝަނުގެ މައްސަލަތައް ބަލަން އޮންނަ މުސްތަގިއްލު ކޮމިޝަނުންނެވެ. މިއަދުގެ ވަގުތެއްގައި އޭނާގެ ބަންދުގެ މުއްދަތު އިތުރު ކުރަން ކޯޓަކަށް ގެންދާނެ ކަމަށް އެ ކޮމިޝަނުން ބުންޏެވެ.
ނަމާލް ހައްޔަރު ކުރީ އެއާބަސްއާއެކު 2013 ވަނަ އަހަރު ހެދި 2.3 ބިލިއަން ޑޮލަރުގެ އެއްބަސްވުމެއްގެ މައްސަލައިގަ އެވެ. ނަމަވެސް އޭގެ ފަހުން 2016 ވަނަ އަހަރު ސަރުކާރު ބަދަލުވި ފަހުން އެ އެއްބަސްވުން ވަނީ ބާތިލްކޮށްފަ އެވެ.
އެ ޕްރޮޖެކްޓުގައި ސޮއި ކުރީ ރިޝްވަތުގެ ގޮތުގައި އެއާބަސް އިން ސްރީ ލަންކާގެ ބައެއް އޮފިޝަލުންނަށް ފައިސާ ހަމަޖައްސައިގެންނެވެ. ފައިސާ ލިބިވަޑައިގެންނެވި ބޭފުޅުންގެ ތެރޭގައި ނަމާލްގެ އިތުރުން ބައްޕާފުޅު އަދި އެއިރުގެ ރައީސް މަހިންދަ ވެސް ހިމެނިވަޑައިގަންނަވާ ކަމަށް ތުހުމަތު ކުރެވެ އެވެ.
ކޮރަޕްޝަންގެ ތުހުމަތުތައް ރާޖަޕަކްސަގެ އާއިލާއިން ދޮގު ކުރެ އެވެ. ނަމަވެސް، މަހިންދައަށް އޭނާގެ އަތުން ބައި މިލިއަނެއްހާ ޑޮލަރު ދީފައިވާނެ ކަމަށް ސްރީ ލަންކަން އެއާލައިންސްގެ ކުރީގެ ޗީފް އެގްޒެކެޓިވް ކަޕީލާ ޗަންދްރަސޭނާ މިދިޔަ މާޗް މަހު ވަނީ ވިދާޅުވެފަ އެވެ.
ޗަންދްރަސޭނާގެ އިއުތިރާފަށްފަހު ދެ ވަނަ ފަހަރަކަށް ހައްޔަރު ކުރުމުގެ ކުރިން މެއި މަހުގެ ތެރޭގައި އޭނާ ވަނީ މަރުވެފައި އޮއްވާ ފެނިފަ އެވެ. އޭނާ މަރުވީ އާއިލީ މީހެއްގެ ގޭގައި ހުއްޓަ އެވެ. ޗަންދްރަސޭނާ މަރުވި ސަބަބު މިހާތަނަށް ހާމަކޮށްފައެއް ނުވެ އެވެ.
އެއާބަސްއާއެކު ސްރީ ލަންކާއިން އެއްބަސްވުމެއް ހެދީ 10 މަތިންދާބޯޓު ގަތުމަށެވެ. އެ އެއްބަސްވުމުގައި ސޮއި ކުރުމަށްޓަކައި ރިޝްވަތުގެ ގޮތުގައި ގާތްގަނޑަކަށް 16 މިލިއަން ޑޮލަރު ދިނުމަށް އެއާބަސް އިން އެއްބަސްވިކަން އެމެރިކާ، ފްރާންސް އަދި އިނގިރޭސިވިލާތުން ކުރި ތަހުގީގަކުން ވަނީ ހާމަވެފަ އެވެ.
އެކަންތައްގަނޑު ފަޅާއެރީ، ރިޝްވަތުގެ ގޮތުގައި އެއާބަސް އިން ދޭން އެއްބަސްވި 16 މިލިއަން ޑޮލަރުގެ ތެރެއިން 1.7 މިލިއަން ޑޮލަރު ޗަންދްރަސޭނާއަށް ލިބުނު ފަހުންނެވެ.
