ސްރީލަންކާގެ ސުޕްރީމް ކޯޓުން އެ ގައުމުގެ ބުދުދީނުގެ ހަރުކަށި ހާމުދުރު، ގަލަގޮޑައައްތޭ ޏާނަސާރާ އަށް ކުރިން ދީފައިވާ ރިޔާސީ އަފޫއާންމު ބާތިލުކޮށް، އޭނާގެ ޖަލު ހުކުމުގެ ބާކީ ބައި ފުރިހަމަކުރުމަށް އަމުރުކޮށްފި އެވެ.
މި ނިންމުމަކީ ގެއްލިފައިވާ ސިޔާސީ ކުރެހުންތެރިއެއްގެ އަނބިކަނބަލުންނަށް ބިރުދެއްކި މައްސަލައިގައި އޭނާގެ މައްޗަށް އިއްވާފައިވާ ހަ އަހަރުގެ ޖަލު ހުކުމާ ގުޅިގެން ނިންމި ނިންމުމެކެވެ.
ހާމުދުރު ޏާނަސާރާގެ މައްޗަށް 2018 ވަނަ އަހަރު ހަ އަހަރުގެ ޖަލު ހުކުމެއް އިއްވީ ކޯޓުގެ ހުރުމަތް ކެނޑުމާއި، 2010 ވަނަ އަހަރު ގެއްލުނު ނޫސްވެރިޔާ އަދި ކުރެހުންތެރިޔާ ޕްރަގީތު އެކްނަލިގޮޑާގެ އަނބިކަނބަލުން ސަންޔާ އެކްނަލިގޮޑާ އަށް ބިރުދެއްކި ކަމަށް ސާބިތުވުމާ ގުޅިގެންނެވެ. އެ ހާދިސާ ހިނގާފައިވަނީ ޕްރަގީތު ވަގަށް ނެގި ކަމަށް ތުހުމަތު ކުރެވޭ އަސްކަރީ އިންޓެލިޖެންސް އޮފިސަރުންގެ ދިފާއުގައި ވާހަކަ ދެއްކުމަށް ޏާނަސާރާ ކޯޓުގެ އަޑުއެހުމެއް މެދުކަނޑާލައި ވަދެގަތް ވަގުތުގައެވެ.
މި ހުކުމް ތަންފީޒު ކުރަމުން ދަނިކޮށް، އަހަރެއް ނުވަނީސް އޭރުގެ ރައީސް މައިތުރިޕާލާ ސިރިސޭނާ ވަނީ ޏާނަސާރާ އަށް ރިޔާސީ މައާފު ދެއްވައި މިނިވަންކޮށްފަ އެވެ. ނަމަވެސް ސުޕްރީމް ކޯޓުން މިހާރު ވަނީ އެ ނިންމުމަކީ ގާނޫނާ ހިލާފު ނިންމުމެއް ކަމަށް ކަނޑައަޅައި، އޭނާ އަނބުރާ ޖަލަށް ގެންދިއުމަށް އަމުރުކޮށްފައެވެ.
ގެއްލިފައިވާ ކުރެހުންތެރިޔާ ޕްރަގީތު އެކްނަލިގޮޑާ އަކީ އޭނާގެ ކުރެހުންތަކުގައި މީޑިއާގެ މިނިވަންކަމާއި، ސިޔާސީ ބާރުވެރިކަމާއި، އިޖުތިމާއީ ބަލިކަށިކަމުގެ މައްޗަށް އަލިއަޅުވާލި ފަރާތެކެވެ. އޭނާގެ މަސައްކަތްތައް ބޮޑަށް އަމާޒުވެފައިވަނީ ކުރީގެ ރައީސް މަހިންދަ ރާޖަޕަކްސަގެ ސަރުކާރަށެވެ. ރާޖަޕަކްސަ އަކީ 2009 ވަނަ އަހަރު ލޭ އޮހޮރުވުން ބޮޑު ދާހިލީ ހަނގުރާމައަކަށް ފަހު ތަމަޅަ ހަނގުރާމަވެރިން ބަލިކުރި ގައުމީ ބަތަލެއްގެ ގޮތުގައި އެ ގައުމުގެ ގިނަ ބަޔަކު ދެކޭ ބޭފުޅެކެވެ.
ޕްރަގީތު ގެއްލުނު ފަހުން މިއަދާ ހަމައަށް ވެސް އޭނާގެ އެއްވެސް ހަބަރެއް ވެފައެއް ނުވެ އެވެ. އޭނާގެ އަނބިކަނބަލުން ސަންޔާ ވަނީ ފާއިތުވި އަހަރުތަކުގައި އޭނާގެ ފިރިމީހާ އަށް ވީގޮތް ހޯދުމަށް ބޮޑު ކެމްޕޭނެއް ހިންގާފަ އެވެ. އަދި މި މައްސަލަ ތަހުގީގު ކުރުމުގައި ކަމާބެހޭ ފަރާތްތަކުން އިހުމާލުވަމުންދާ ކަމަށް އޭނާ ތުހުމަތު ކުރެއެވެ.
ބޯދު ބާލާ ސޭނާ ނުވަތަ ބުދު ދީނުގެ ބާރުގެ ލަޝްކަރުގެ ނަމުގައި ހިންގާ ޖަމާއަތުގެ ވެރިޔާ ޏާނަސާރާ އަކީ ރާޖަޕަކްސަ އާއި އޭނާގެ ކޮއްކޮ ގޮތާބަޔާ ރާޖަޕަކްސަގެ ވަރުގަދަ ސަޕޯޓަރެކެވެ. ޏާނަސާރާގެ މައްޗަށް 2025 ވަނަ އަހަރު ވެސް ވަނީ އިސްލާމްދީނަށް ފުރައްސާރަކޮށް ދީނީ ނަފުރަތު އުފެއްދި މައްސަލައިގައި ނުވަ މަސް ދުވަހުގެ ޖަލު ހުކުމެއް އިއްވާފައެވެ.
ސްރީލަންކާގެ ތާރީހަށް ބަލާއިރު، ބުދު ދީނުގެ ހާމުދުރުންގެ މައްޗަށް ކުށް ސާބިތުވެ ޖަލު ހުކުމެއް އައުމަކީ ވަރަށް މަދުން ނޫނީ ނުވާ ކަމެކެވެ.
