ގިނަ ދަރިވަރުން އަބަދުވެސް ތިބެނީ މަޢުލޫމާތު ހޯދުމަށް ދަހިވެތިވެފައެވެ. ޚާއްޞަކޮށް ތާރީޚީ އަދި އިޖްތިމާޢީގޮތުން ކުރާ ކަންކަން ދެނެގަތުމަށް ވަރަށް ޝައުގުހުރެ އެވެ. ރާއްޖެ އިސްލާމްވުމަކީ ދިވެހި ތާރީޚްގައި ހިނގާފައިވާ ވަރަށް މުހިންމު ކަމެއްކަން ދަރިވަރުންނަށް ސްކޫލް ފެންވަރުގައި ބުނެދެވެން ވަނޭކަމަށް އަޅުގަނޑުގަބޫލުކުރަމެވެ. އެހެންނަމަވެސް ރާއްޖެ އިސްލާމް ވީކަމަށް ފާހަގާ ކުރާދުވަސް މުދައްރިސުންނަށް އެނގިލައްވަވާ ބާވައޭ ހިތަށްއަރައެވެ. ސްކޫލްތަކުގައި ދަރިވަރުންނަށް އެދެވޭގޮތަކަށް ބުނެދެވިގެން ނުދެ އެވެ. މި ކަމުގެ ނަތީޖާއެއްގެ ގޮތުން ދަރިވަރުންގެ ތެރެއިން މި ދުވަހަ ބެހޭ މައުލޫމާތު އެނގެނީ މަދު ކުއްޖަކަށެވެ.
ދަރިވަރުންނަށް ރާއްޖެ އިސްލާމްވީ ދުވަސް ބުނެދިނުމުގައި ބުނެދޭންވާނީ އިސްލާމް ދީނުގެ މާތްކަމާ އިސްލާމުންގެ ހެޔޮ ރަނގަޅު އަމަލުތަކުގެ ވާހަކައަށް ބިނާކޮށެވެ. އަދި އިސްލާމް ދީނަކީ އެންމެ އިންސާފުވެރި ހުރިހާ އެންމެނަކީ ހަމަހަމަ ބައެއްކަމަށް ދެކޭ ދީންކަމަށް ބުނެދެވެންވާނެއެވެ. އެއަށް ފަހު ރާއްޖޭގެ ކުރީގެ ހާދިސާ ތައް ދަރިވަރުންގެ އުމުރާ ގުޅޭގޮތަށް ބުނެދީ ރާއްޖޭގެ އޭރުގެ މީހުންގެ ދިރިއުޅުމާ އަޅުކަންކޮށް އުޅެމުން ދިޔައީ ބުދަށާ، އިރާ ހަނދު އަދި މިނޫންވެސް ބައެއް ތަކެއްޗަށްކަން ބުނެލަ ދިނުން ރަނގަޅުކަމަށް ދެކެމެވެ. ރާއްޖެ އިސްލާމް ވުމުގެ ކުރިން ދިވެހި ރާއްޖެއަށް އެރި ރަންނަމާރިއޭ ކިޔުނު ކަނޑުފުރޭތައިގެ ވާހަކަ ކިޔާދީ އަދި ރަންނަމާރި އަރާރެއަށް އަންހެންކުއްޖަކު ޤުރްބާން ކުރަން ގެންދަން ޖެހޭކަން ބުނެދެވޭނެ އެވެ.
އޭރު ދިވެހިން ތިބީ ވަރަށް ބިރުވެރިކަމެއްގެ ތެރޭގައިކަން ބުނެދީއެބިރުވެރި ރަންނަމާރި ފުރޭތައިން ސަލާމަތްވެވޭނޭ ގޮތެއްނެތިފައިކަން ބުނެދިނުން ރަނގަޅުކަމަށް ދެކެމެވެ. މި ބިރުވެރިކަމުގައި ދިވެހިން ތިއްބާ މަޣްރިބުކަރައިގެ ބޭކަލެއްކަމުގައިވާ އަބުލް ބަރަކާތު ޔޫސުފުލް ބަރުބަރީ އޭކިޔުނު ބޭކަލުކު ދިވެހިރާއްޖެއަށް ވަޑައިގެންނެވި އެވެ. ދިވެހިންނަށް އޭރު ދިމާވެގެން އުޅޭ ރަންނަމާރީގެ ކަންތައް ރަސްގެފާނު އޮޅުންފިލުއްވަވައި ދެއްވެވި އެވެ. ޤުރްބާން ކުރަން ގެންދާ އަންހެން ކުއްޖާގެ ބަދަލުގައި އެތަނަށް ވަޑައިގެންނެވީ އަބުލްބަރަކަތު ޔޫސުފުލް ބަރިބަރީކަން އަދި އަބުލްބަރަކާތު ޔޫސުފުލް ބަރުބަރީ ކުރެއްވެވިކަމަކީ އެތަނުގައި ޤުރްއާން ވިދާޅުވުންކަމަށް ބުނެދެވޭނެއެވެ. ޤުރްއާނުގެ އަޑުއިވި ރަންނަމާރި ފައިބައިގެން ދިޔައީކަމަށް ބުނެވޭކަމަށް ބުނެދެވޭނެ އެވެ.
ރާއްޖެ އިސްލާމްވީ އިރު ރާއްޖޭގައި ހުންނެވީ ސްރީތިރިބަވަނަ އާދީއްތަ މަހާރަދުންނޭ ކިޔުނު ރަސްކަލެއްކަން ބުނެދެވޭނެއެވެ.އަދި މިރަސްގެފާނު އިސްލާމް ވެ ވަޑައިގަތުމުން އައްސުލްތާން މުހައްމަދު ބުނި އަބްދުﷲ ސިރީބަވަނާއާދީއްތަ މަހާރަދުންނަށް ނަންފުޅު ބަދަލުކުރެވުނުކަން ވެސް ބުނެދެވެނެ އެވެ. އަދި ދިވެހިން މިރަސްގެފާނަށް ދަރުމަވަންތަ ރަސްގެފާނުގެ ނަމުން ނަންދިންކަން ބުނެދީ މިރަސްގެފާނުގެ ނަން ހިމެނޭހެން މިސްކިތެއްބިނާކޮށްފައިވާކަން ބުނެދޭން ވާނެ އެވެ. ބުނެވޭގޮތުން އެއީ ރާއްޖޭގައި ހުރި އެންމެ ދުވަސްވީ މިސްކިތްކަން ބުނެދެވެން ވާނެ އެވެ.
ރާއްޖެ އިސްލާމްވީ މީލާދީގޮތުން 1153 ވަނަ އަހަރުކަމަށާ މުޅިރާއްޖެ އިސްލާމް ދީނަށް ބަދަލުވާން އަހަރުތަކެއްވީކަން ބުނެދެވެން ވާނެއެވެ. އަދި މިއަދާއި ޖެހެންދެން އިސްލާމް ދީންގައި ދިވެހިން ސާބިތުވެ ތިބިގޮތަށް ހުރިހާދަރިވަރުން އިސްލާމީ އާދަކަކާދައާއި އިސްލަމީ ހުކުމްތަކަށް ތަބާވާން ޖެހޭނެކަންބުނެދީ ނަސޭހަތްދެވެންވާނެ އެވެ.
