އެމެރިކާގެ މިޝިގަން ސްޓޭޓްގެ ސެނެޓް ގޮނޑިއަށް ވާދަކުރައްވާ މުސްލިމް ޑިމޮކްރެޓް ކެންޑިޑޭޓް އަބްދުލް އަލް ސައްޔިދަކީ "ވަރަށް ނުބައި" ބޭފުޅެއްގެ ގޮތުގައި އެމެރިކާގެ ނައިބު ރައީސް ޖޭޑީ ވެންސް ސިފަކުރައްވައިފި އެވެ.
ޑެޓްރޮއިޓްގެ ސަރަހައްދެއްގައި ހުންނަ ޔަހޫދީ ފައްޅިއަކަށް މިދިޔަ މާޗު މަހު ދިން ހަމަލާއަކާ ގުޅިގެން އަލް ސައްޔިދު ދެއްކެވި ވާހަކަތަކަށް އިޝާރާތް ކުރައްވައި، އޭނާ ދަނީ ޓެރަރިޒަމް ދިފާއުކުރަމުން ކަމަށް ވެންސް ވަނީ ތުހުމަތު ކުރައްވާފަ އެވެ.
އޭގެ އިތުރުން، ޓެކްސަސްގެ ގަވަރުނަރު ކަމުގެ ދައުރަކަށް ވާދަވެރި އިންތިޚާބެއްގައި ކުރިމަތިލައްވައިގެން ހުންނެވި ރިޕަބްލިކަން ގަވަރުނަރު ގްރެގް އެބޮޓް ވަނީ، މުސްލިމުން އިސްވެ ތިބެ ހިންގަން ރާވާފައިވާ ތަރައްގީގެ މަޝްރޫއަކަށް ފާޑުވިދާޅުވެފަ އެވެ.
އަދި އެއީ "ޝަރީއާ ކޯޓުތައް" އުފެއްދުމަށް ކުރާ މަސައްކަތެއް ކަމަށް ސިފަކުރައްވައި، އެކަން ތަހުގީގު ކުރުމަށް އޭނާ ވަނީ ގޮވާލައްވާފަ އެވެ. ނަމަވެސް، އެ މަޝްރޫއު ހިންގާ ފަރާތްތަކުންނާއި އިންސާނީ ހައްގުތަކަށް މަސައްކަތް ކުރާ ޖަމާއަތްތަކުން ވަނީ އެ ތުހުމަތުތައް ދޮގުކޮށްފަ އެވެ.
ހަމަ އެހެންމެ، އާބާދީގެ އެއް އިންސައްތައަށް ވުރެ ވެސް މަދުން މުސްލިމުން ދިރިއުޅޭ އެލަބާމާ ސްޓޭޓްގެ ގަވަރުނަރު ކަމަށް ވާދަކުރައްވާ ރިޕަބްލިކަން ސެނެޓަރު ޓޮމީ ޓިއުބަވިލް ވަނީ، އިސްލާމްދީނަށް އިޝާރާތް ކުރައްވައި "ދުޝްމަނުން ތިބީ ދޮރާ ހަމައިގައި" ކަމަށް ވިދާޅުވެ އިންޒާރު ދެއްވާފަ އެވެ.
އެމެރިކާގައި ވެރިކަން ކުރާ ޕާޓީގެ ފަރާތްތަކުން މިފަދަ ބަސްމަގުތައް ބޭނުންކުރަމުން ދަނީ، ނޮވެމްބަރު ތިނެއްގައި ބާއްވާ މިޑްޓާމް އިންތިޚާބުގެ ބަހުސްގެ ތެރެއަށް މުސްލިމުންނާއި އިސްލާމްދީނުގެ މައުލޫއު ވެއްދުމުގެ މަގުސަދުގަ އެވެ. މި އިންތިޚާބަކީ ރައީސް ޑޮނަލްޑް ޓްރަމްޕްގެ ރިޕަބްލިކަން ޕާޓީގެ އަތުން ކޮންގްރެސްގެ ކޮންޓްރޯލް އަތުލުމަށް ޑިމޮކްރެޓުން ކުރާ މަސައްކަތުގެ ނަތީޖާ ފެންނާނެ މުހިންމު އިންތިޚާބެކެވެ.
ފާޑުކިޔާ ފަރާތްތަކުން ބުނާ ގޮތުގައި މިފަދަ ވާހަކަތަކަކީ ބޭއިންސާފުން މުސްލިމުންނަށް އަމާޒުކޮށް ދައްކާ ވާހަކަތަކެކެވެ. ނަމަވެސް ރިޕަބްލިކަން ޕާޓީން ބުނަމުން ދަނީ، އެ ބޭފުޅުން ފާޅުކުރައްވަނީ ސަލާމަތީ ކަންކަމާއި، ހަރުކަށި ފިކުރާއި، އަދި އާންމު ދިރިއުޅުމުގެ ތެރެއަށް ދީން ވަންނަ މިންވަރާ މެދު ހުރި ހަގީގީ ކަންބޮޑުވުންތައް ކަމަށެވެ.
