އިސްލާމީ ގައުމަކަށް ކާފަރު ގައުމެއްގެ ބޭކަނބަލަކު ޒިޔާރަތެއް ކުރެއްވި އެވެ. މިކަމަނާގެ ޒިޔާރަތުގެ ތެރެއިން އިސްލާމީ ގައުމުގެ އިއްޒަތްތެރި ބޭފުޅަކާ ސަލާމްކުރެއްވުމަށް އަތްދިއްކުރެއްވި އެވެ. އިސްލާމީ ގައުމުގެ ބޭފުޅާ އެކަމަނާއާ އަތާއަތްޖޯޑުކުރެއްވުމުން މަނާވެވަޑައިގަތެވެ. އެއީ އިސްލާމްދީނުގައި ހަރާންކަމެއްކަމުގައި ބަޔާންކުރައްވަމުންނެވެ. މި މަންޒަރު ބަލަން ހުރި މީހަކު ބުނި ތާރީހީ ބުނުމެއް ލިޔުންތެރިންގެ އަތްއަތްމަތީން ނަގުލުވަމުން މިއަދާ ހަމައަށް އައިސްފައިވެ އެވެ.
އޭނާ ބުނިކަމުގައިވެ އެވެ. "ކަލޭމެން މުސްލިމުންނާ މެދު އަހަރެން އަޖައިބުވެ އަންތަރީސްވަމެވެ. ހިލޭ އަންހެނުންނާ ސަލާމްކުރުމަކީ ހަރާންކަމެއް ކަމުގެ ހުއްޖަތުގައި އެކަމުން މަނާވެގަތުމަކީ ތަގުވާވެރިކަމާއި ދީންވެރިކަންކަމުގައި ކަލޭމެން އެބަހިތަމު އެވެ. ކަލޭމެންގެ ދީނުގައި ވައްކަމާއި ފޭރުމާއި މީސްތަކުންގެ ހައްގުތަކަށް އަރައިގަތުން އެއީވެސް ބޮޑުވެގެންވާ ހަރާން ކަންކަމެވެ. އެކަމަކު އެކަންކަން ކަލޭމެންގެ އިސްލާމީ ގައުމުތަކުގައި ފެތުރި އާންމުވެފައިވަނީ އަޖައިބުވާ ދަރަޖައަށެވެ."
"އަހަރެން ޔޫރަޕުން އިސްލާމްދީން ދުށީމެވެ. އެކަމަކު މުސްލިމުންނެއް ނުދެކެމެވެ. އެނބުރި އަރަބި ކަރައަށް އައުމުން މުސްލިމުން ދުށީމެވެ. އެކަމަކު އިސްލާމްދީނެއް ނުފެނުނެވެ." މިއީ މަޝްހޫރު އިސްލާމީ ފިލޯސަފަރު އަދި އިލްމުވެރިޔާ އިމާމް މުޙައްމަދު ޢަބްދޫގެ ބަސްފުޅެކެވެ. އޭނާ އެ ވިދާޅުވާ އެއްޗަކީ މުސްލިމުން ހަގީގީ އިސްލާމްދީނާ ދުރުހެލިވެފައިވާ މިންވަރެވެ. މުސްލިމުންގެ ގޮތުގައި ތިބެ އިސްލާމްދީން ގެނެސްދިން މަތިވެރި އަހްލާގާއި ރަށްވެހިކަމުގެ އަސާސްތައް އަހަރެމެން ދޫކޮށްލާފައިވާ މިންވަރެވެ. އަދި މުސްލިމުންނަށް ވުރެ ގައިރު މުސްލިމް ގައުމުތައް ކުރިއަރާފައިވާއިރު، އެބައިމީހުންގެ ތަރައްގީއާއި ތަހުޒީބުގެ އަސާސްތަކުގެ ގޮތުގައި ދަމަހައްޓަމުން އަންނަ ކަންކަމަކީ އަހަރެމެންގެ ދީން އަހަރެމެންނަށް މާބޮޑަށް ގޮވާ ބާރުއަޅާފައި ހުރި ކަންކަމުގަ އެވެ.
މުޙައްމަދު ޢަބްދޫއަށް ފެނިވަޑައި އެގަތީ މާކުރީގައި މަޝްހޫރު ޢިލްމުވެރިޔާ އަލްޢައްލާމާ އިބްނު ތައިމިއްޔާ ވިދާޅުވެފައިވާ ބަސްފުޅުގެ ހަގީގަތެވެ. "އަދުލުވެރި ދައުލަތަށް މާތް ﷲ ކާމިޔާބުދެއްވަ އެވެ. އެއީ ކާފަރު ދައުލަތެއް ވިޔަސްމެ އެވެ. އަނިޔާވެރި ދައުލަތަކަށް މާތް ﷲ ކާމިޔާބެއް ނުދެއްވަ އެވެ. އެއީ އިސްލާމީ ދައުލަތަކަށް ވިޔަސްމެ އެވެ."
ދިވެހިރާއްޖެ އިސްލާމްވިތާ އެތައް ސަތޭކަ އަހަރެއް ފާއިތުވެފައިވާއިރު، މިއަންނަ އާދީއްތަ ދުވަހު އަނެއްކާ ވެސް ކުލަގަދަކޮށް ރާއްޖެ އިސްލާމްވި ދުވަހުގެ ގޮތުގައި ދުވަހެއް ފާހަގަކުރާނެ އެވެ. މަށަކީ މުސްލިމެކެވެ. އަދި މި ލިޔުން ކިޔަމުން މިދާ ތިޔަ އިއްޒަތްތެރި ކިޔުންތެރިޔާއަކީވެސް މުސްލިމެކެވެ. އަހަރެމެން ދިވެހިންނަކީ މުސްލިމުންނެވެ. އެކަމަކު އަހަރެމެންގެ ތެރެއިން އަހަރެމެންގެ ދިވެހިރާއްޖެއިން ފެންނަމުންދަނީ އިސްލާމްދީންތޯ މިއީ މިއަހަރުގެ ރާއްޖެ އިސްލާމްވި ދުވަހާ ގުޅިގެން އަހަރެމެން ކޮންމެ މީހަކު އަމިއްލަ ނަފުސާ ކުރަން ރަނގަޅު ސުވާލެއްކަމުގައި އަހަންނަށް ފެނެ އެވެ.
2022 ވަނަ އަހަރުގެ ރާއްޖޭގެ ބޯހިމެނުން ދައްކާގޮތުން ރާއްޖޭގައި ވަޒީފާއަދާކުރާ ފަންސާސް އެކެއް އިންސައްތައަށްވުރެ ގިނަ މީހުން ތިބީ އެމީހުންގެ ތައުލީމީ ފެންވަރަށް ބަލާއިރު، ވަޒީފާއަދާކުރުމަށް އެމީހުންގެ ގާބިލުކަން ނެތް ވަޒީފާތަކުގަ އެވެ. މިހާރު މިއަހަރު ބަލައިފިއްޔާ މިއަދަދު އެޔަށްވުރެ މާމައްޗަށް އަރާނެކަން ވެސް ގައިމެވެ. ދައުލަތް ކުރިޔަށް ގެންދާން ސަރުކާރެއް ހިންގަން ތިބޭނީ މަގާމުތަކުގައި ތިބި މީހުންނާއި އެމީހުންގެ ދަށަށް ތިބި މުވައްޒަފުންނެވެ. ރާއްޖޭގައި ކިޔަވައިގެން ތިބި މީހުން ނެތީކީ ނޫނެވެ. ވަޒީފާ ބެހުމުގައި ވެސް ކޮރަޕްޝަން ބޮޑީ އެވެ.
އެ ވަޒީފާގައި ތިބި މީހުންގެ މުސާރަ ދީނީ ގޮތުން ހަލާލެއް ނުވާނެ އެވެ. އެޔަކީ ޝައްކެތް އޮތް ކަމެއް ނޫނެވެ. އަދި އެ މުސާރަ އެހެން ދީދީ އެއީ ހަމަ އެއްވެސް ކަމެއް ނޫންކަމަށް ދެކެގެން އަހަރެމެންގެ އިސްވެރިން އެތިބޭ ތިބުމަކީ ވެސް ހަމަ ހަރާން ތިބުމެކެވެ. އެ ފާފައަކީ ހަމައެކަނި ފާފައެއް ނޫނެވެ. ރައްޔިތު އެންމެންގެ ހައްގަށް އަރައިގެނެވިގެންދާ އަދި ޤިޔާމަތް ދުވަހު ރައްޔިތު އެންމެންގެ މާފު އެޔަށް ލިބިގެން މެނުވީ ސަލާމަތް ނުވެވޭނެ ދަރަޖައިގެ ދީނީގޮތުން ބޮޑު ކަމެކެވެ.
ރާއްޖޭގެ އިގުތިސާދު އޮތް ހާލަތު އެންމެންނަށް އެނގެ އެވެ. ސަރުކާރަށް ޑޮލަރު މާރުކުރަންޖެހޭ އަދަދު މައްޗަށް ޖެއްސިޔަސް އެކަން ކުރުމަށް ވިޔަފާރިވެރިންގެ ފަހަތުފަހަޔަށް ބުރަވެފައި އެތިބީ ވެސް ސަރުކާރުގެ އަމާނާތްތެރިކަން ސަރުކާރު ހިންގަން ތިބި މީހުންނަށް ސާބިތުކޮށް ނުދެވޭތީ އެވެ. މަގާމުތަކުގައި ތިބި އެތައް ބަޔެއްގެ މައްޗަށް ތުހުމަތުކުރެވުނު އަދި ކުރެވޭ ވައްކަމުގެ އެތައް މައްސަލައެއް އެހެރީ ހުއްޓިފަ އެވެ. އެޔެއް ބެލޭނެ ގޮތެއް ނެތެވެ.
މިއިން އެއްވެސް ކަމަކީ ދީނީ ކަމަކަށް ނުވަނީތޯ އެވެ؟ މިކަންކަން ހައްލުކުރުމަކީ އިސްލާމްދީން ގޮވާ ކަމެއްގެ ގޮތުގައި ނުވިސްނެނީތޯ އެވެ؟ އަދި މިއިން ކަމެއް ހައްލުކުރަން މަސައްކަތްކުރުން އެއީ ދީނަށް ދެވޭ ނަސްރެއްގެ ގޮތުގައި ނުވާނީތޯ އެވެ؟ އަޅުގަނޑު ހަމަ އަޖައިބުވެ އެވެ. މިހުރިހާ ކަމެއް މިހެން ހުއްޓައި، އިސްލާމްދީނަށް ނަސްރުދިނުމަށް އިސްލާމީ ބޯޑުތަކެއް މަގުތަކުގައި ހަރުކުރުން އެއީ މާބޮޑު މުހިންމުކަމަކަށްވީމަ އެވެ. ދަރާ ހުސްވެ ބިކާރީވެފައި އޮތް ބައިތުލް މާލުން އެކަމަށް ހަރަދުކުރާން ގައުމުގެ ވެރިން ނިންމީމަ އެވެ.
މިހާތަނަށް ކަންހިނގާފައިވާ ގޮތަށްބަލާއިރު، ސަރުކާރުގެ އެތައް މުއައްސަސާތަކަކާއި ބޭކާރު މުވައްޒަފުންތައް ތިބިއިރުވެސް، އެއިން ތަނަކާއި ބަޔަކާ މިކަން ބެއްސުމުގެ ބަދަލުގައި، މި މަޝްރޫއު ހިންގާނެކަމަށް ބެލެވެނީ އަމިއްލަ ކުންފުންޏަކާ ހަވާލުކޮށްގެންނެވެ. އެކަން ނިމޭއިރު، އެ ބޯޑުތަކަށް ހަރަދުކުރާން ނުޖެހޭ ވަރަށް ދިވެހި ބައިތުލްމާލުން އެތައް ފައިސާއެއްގެ އިސްރާފު ހަރަދުވެގެންދާނެކަމުގައި ބެލެވެ އެވެ. ދިވެހިން ތިބެންވީ އިސްލާމްދީނަށް ނަސްރުދޭތީ އަތްޖަހަންށެވެ. ދީނުގެ ނަމުގައި ކުރާ ކަމެއް ވީމާ އެކަމަށް އެއްޗެއް ބުނަން ތިބެންވީ ބިރުންނެވެ.
މުސްލިމުން ދުނިޔޭގެ އެހެން ބާރުތައް ޖެހިލުންވާ ފަދަ ބޮޑު ބާރެއްކަމުގައިވެ އިސްލާމީ ތަހުޒީބާއި ތަމައްދުން ދުނިޔެއަށް ތައާރަފުކުރީ ބޯޑު ހަރުކޮށްގެންނެއް ނޫނެވެ. އޭގެ ބަދަލުގައި އަހަރެމެންގެ ކާބަފައިން އެކަން ކުރީ ފުރިހަމަ މާނައިގައި އަދުލުވެރި އިންސާފުވެރި ދައުލަތެއްގެ މިސާލު ދުނިޔެއަށް ދައްކައިދީގެންނެވެ. އުފަން ދަރި ވައްކަންކުރިޔަސް އަތް ކެނޑުމުގެ ހަމަހަމަ އުސޫލު ދުނިޔެއަށް ސާބިތުކޮށްދީގެންނެވެ. އެވާހަކަ ބޯޑެއްގައި ލިޔެގެންނެއް ނޫނެވެ.
މިދަންނަވާ އެއްޗެއްގެ މިސާލެއް ދަންނަވާނަމަވެ. އެންމެ ގިނަ މީހުން ވަޒީފާ އަދާކުރުމަށް ދާ އެއްތަނަކީ ވެލާނާގެ އެވެ. އެގޭގެ ދޮރުކޮޅުމަތީގައްޔާއި، ކައިރި މަގުތަކުގައި ބޯޑުތަކެއް ހަރުކުރެވިދާނެ އެވެ. އެ ބޯޑުތަކުގައި އޮންނަންވީ މާތް ނަބިއްޔާގެ މިދަންނަވާ ހަދީސްފުޅެވެ.
"އަމާނާތްތެރިކަން ގެއްލިގެން ހިނގައްޖެނަމަ ދެން ތިޔަބައިމީހުން ގިޔާމަތް ދުވަހަށް އިންތިޒާރުކުރާށެވެ! ދެންނެވުނެވެ. އެކަން ގެއްލިގެން ދާނީ ކިހިނަކުން ހެއްޔެވެ؟ ހަދީސްކުރެއްވި އެވެ. ކަންކަން އެކަންކަމަށް ގާބިލުނޫން މީހުންނާ ހަވާލުވެއްޖެނަމަ ދެން ގިޔާމަތަށް އިންތިޒާރުކުރާށެވެ!"
މި ބޯޑު ބެހެއްޓީމާ އެންމެންވެސް މި ބޯޑު ކިޔާނެވެ. އެކަމަކު 2022 ވަނަ އަހަރުގެ ބޯ ހިމެނުން ދެއްކި ގޮތަށް ވަޒީފާ އަދާކުރާ މީހުންގެ ފަންސާސް އެއް އިންސައްތަ އެއީ ކަންކަމުގެ އަހުލުވެރިން ކަމުގައި މި ބޯޑު ބެހެއްޓުމަކުން ނުވާނެ އެވެ. އެކަން ކުރެވޭނީ މަގާމަށް ކުފޫ ހަމަ ނޫން މީހުން މަގާމުތަކުން ވަކިކޮށްގެންނެވެ. މަގާމުތައް ހައްގުވާ މީހުންނަށް މަގާމުތައް ދީގެންނެވެ. ބައިތުލްމާލުން ކުރާ އިސްރާފުތައް ހުއްޓާލައިގެންނެވެ.
އިސްލާމްވިތާ ނުވަސަތޭކަ އެތައް އަހަރެއް ވެފައިވާކަމަށް ބުނާ ދިވެހިރާއްޖެއިން ފެންނަންވީ އިސްލާމީ ބޯޑުތަކެއް ނޫނެވެ. އިސްލާމްދީނެވެ. އެދީން ގެނެސްދިން ފުރިހަމަ މަންހަޖެވެ. އެކަން އެހެންވީމާ އެނގޭނެ އެވެ. މީހުންގެ ޝަކުވާ ހުއްޓޭނެ އެވެ. އެންމެންގެ މޫނުމަތީން އުފާވެރިކަން ފެންނާނެ އެވެ.
