އިސްލާމްދީނާ ފުށުއަރާ ގާނޫނެއް އުފަން ނުކުރެވޭފަދަ ނިޒާމެއް ގާއިމުކުރަން ރައްޔިތުންގެ މަޖިލީހުގެ މި އަހަރުގެ ހުށަހަޅުއްވާނެ ކަމަށް މުހައްމަދު މުއިއްޒު މިއަދު ވިދާޅުވެއްޖެ އެވެ.
ހއ. އުތީމުގައި ބޭއްވި ގައުމީ ދުވަހުގެ ޖަލްސާގައި މުއިއްޒު ވިދާޅުވީ ރާއްޖޭގައި އިސްލާމްދީނާ ފުށުއަރާ އަދި އިސްލާމްދީނާ ހިލާފު ގާނޫނެއް އުފަން ނުކުރެވޭނެފަދަ ނިޒާމެއް ގާއިމުކުރަން ރައްޔިތުންގެ މަޖިލީހަށް ހުށަހަޅުއްވާނީ މި އަހަރުގެ ތިންވަނަ ދައުރުގައި ކަމަށެވެ.
"ދިވެހިރާއްޖޭގައި މާތްވެގެންވާ އިސްލާމްދީނާ ފުށުއަރާ، ނުވަތަ އިސްލާމްދީނާ ހިލާފު އެއްވެސް ގާނޫނެއް އުފަން ނުކުރެވޭނެ ފަދަ، ހަރުދަނާ ބަދަހި ނިޒާމެއް، އުސޫލީ ގޮތުންނާއި، ނިޒާމީ ގޮތުން ކަށަވަރުކުރަން،" މުއިއްޒު ވިދާޅުވި އެވެ.
އެމަނިކުފާނު މިހެން ވިދާޅުވި ނަމަވެސް 2008 ވަނަ އަހަރު އަމަލުކުަރަން ފެށި ފެހި ގާނޫނުއަސާސީގެ 10 ވަނަ މާއްދާގެ ށ. ގައި ވަރަށް ސާފުކޮށް އެފަދަ ގާނޫނެއް ނުހެދޭނެ ކަމަށް ބަޔާންކޮށްފައިވެ އެވެ.
"އެހެންވީމާ، އެފަދަ ނިޒާމެއް ގާއިމުކުރުމަށް ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރަށް އިރާދަކުރެއްވިއްޔާ ހުށަހަޅާނެ ކަމުގެ ފުރިހަމަ ޔަގީންކަން ދިވެހިރާއްޖޭގެ ލޮބުވެތި އެންމެހައި ރައްޔިތުންނަށް މިއަދު އަޅުގަނޑު އަރުވަން."
މުއިއްޒު ވިދާޅުވީ ގާނޫނުއަސާސީ ބުނާގޮތުން ރާއްޖޭގައި އިސްލާމްދީނާ ހިލާފު ގާނޫނެއް ނުހެދުނަސް، ރާއްޖޭގައި ހެދޭ ގާނޫނުތަކާއި އުސޫލުތަކާއި ގަވާއިދުތައް އިސްލާމްދީނުގެ އިންތަކާއި މިންތަކުގެ ތެރޭގައިކަން ކަށަވަރު ކުރެވޭނެ ހަރުދަނާ ނިޒާމެއް ނެތް ކަމަށެވެ.
"އަޅުގަނޑުވެސް އެއްބަސް، ދިވެހިރާއްޖޭގެ ގާނޫނުއަސާސީ ބުނާގޮތުން ރާއްޖޭގައި އިސްލާމްދީނާ ހިލާފު ގާނޫނެއް ނުހެދޭނެ. ރާއްޖޭގައި ހެދޭ ގާނޫނުތަކާއި، އުސޫލުތަކާއި، ގަވާއިދުތައް ހުންނަންވާނީ މާތްވެގެންވާ އިސްލާމްދީނުގެ އިންތަކާއި މިންތަކުގެ ތެރޭގައި. މިއީ މިކަން ލިޔެކިޔުމުން ފެންނަން އޮތްގޮތް. ސުވާލަކީ މިކަން ކަށަވަރުކުރެވޭނެ ހަރުދަނާ ނިޒާމެއް އެބައޮތްތޯ. އެފަދަ ނިޒާމީ ބަދަލު އޮނިގަނޑެއް އަޅުގަނޑުމެންގެ އުސޫލުތަކުގެ ތެރޭގައި އެބައޮތްތޯ. ޖަވާބު ވަރަށް ކުރު. ނެތް،" މުއިއްޒު ވިދާޅުވި އެވެ.
އިސްލާމްދީނާ ދުރު ސިޔާސަތު ތަންފީޒުކުރާ ކޮންމެފަހަރަކު ރާއްޖޭގެ މިނިވަންކަން އޮތީ ގެއްލިފައި ނުވަތަ ނުރައްކަލަކަށް ހުށަހެޅިފައިކަން ފާހަގަކުރައްވާ މުއިއްޒު ވިދާޅުވީ އިސްލާމްދީން ހިމާޔަތް ކުރެވޭނެ ނިޒާމެއް ގައުމުގައި ގާއިމުވެފައި އޮތުން ކޮންމެހެން މުހިންމު ކަމަށެވެ.
މުއިއްޒު ވިދާޅުވީ ގައުމީ ދުވަސް ހިތްވަރުދެނީ ދިވެހިންގެ ކިބައިގައި އިހުގައި ހުރި ރީތި މާތް އަހްލާގީ ސިފަތައް އިއާދަކޮށް، ގައުމީ ވިސްނުމާއި ގައުމީ ރޫހުން ހިތްތަކަށް ހަމަޖެހުން ގެނެސް، އެއް ރޫއްހެގައި އެއް އަމާޒެއްގައި ގުޅިގެން ދެމިތިބެ، ބައިބައިވުންތަކާ ދުރުހެލިވެ، ދިވެހީންގެ ރާއްޖެ އަކީ ދިވެހީންނަށްޓަކައި އުފާވެރި ހިމޭން މަންޒިލެއްގެ ގޮތުގައި ދެމެހެއްޓުމަށް ކަމަށެވެ.
ބޭރުގެ ބާރުތަކުގެ ތެރޭގައި ދިވެހީން ގިރިގެން ގޮސްގެން ނުވާނެކަމަށާއި، ދިވެހީން ތިބެން ވާނީ، ދިވެހީންގެ ދީނުގައި، ގައުމީ ސިޔާދަތާއި ގައުމުގެ މިނިވަންކަމާ އެކީގައިކަމަށް އެމަނިކުފާނު ވިދާޅުވި އެވެ.
ގައުމީ ދުވަހުގެ ޖަލްސާގައި މުއިއްޒު ވަނީ ، ޝަރަފުވެރިކަމުގެ ގައުމީ އިނާމާއި، ހިތްވަރުދިނުމުގެ ގައުމީ އިނާމު ލިބިވަޑައިގެންނެވި ބޭފުޅުންނަށް ޝަރަފާއި އިނާމު ދެއްވާފަ އެވެ.
