އަންނަ މަހު ޖަޕާނުގެ އައިޗީ-ނަގޯޔާގައި ފަށާ އޭޝިއަން ގޭމްސް އަށް އަންނަ ގައުމުތަކުގެ ޑެލިގޭޝަންގެ ތެރެއިން ބަޔަކު، ޖަޕާންގެ ޑޮކްގައި އެ މުއްދަތުގައި ބާއްވާ އިޓަލީގެ ކްރޫސް ޝިޕް، ކޮސްޓާ ސެރޭނާގައި ވެސް މަޑުކުރަން ޖެހޭނެ ކަމަށް އޭޝިއަން ގޭމްސްގެ އޮގަނައިޒަރުން ބުނެފި އެވެ.
އަންނަ މަހު 19 އިން އޮކްޓޫބަރު 4 އަށް ޗަޕާނުގައި ކުރިއަށްދާ އޭޝިއަން ގޭމްސްގައި، އައިޗީ އާއި ނަގޯޔާގެ އިތުރުން ޓޯކިޔޯގައި ވެސް ބައެއް އެތުލީޓުންނާއި އޮފިޝަލުންގެ އެކޮމަޑޭޝަން ވަނީ ހަމަޖައްސައިފަ އެވެ.
އޭޝިއަން ގޭމްސްގައި ރާއްޖޭން ހަތް ކުޅިވަރަކުން ވާދަކުރާނެ ކަމަށް މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ވަނީ ބުނެފަ އެވެ. އެއީ، އެތުލެޓިކްސް، ބެޑްމިންޓަން، ބީޗްވޮލީބޯޅަ، ޓޭބަލް ޓެނިސް، ސްވިމިން، ޝޫޓިން އަދި ސާފިން އެވެ.
ގޭމްސްގައި ހަރަކާތްތެރިވާ ރާއްޖޭގެ ކޮންޓިންޖެންޓްގެ ޖުމްލަ އަދަދަކީ، 81 އެވެ. ރާއްޖޭގެ ސްވިމިން ޓީމުގެ އެކޮމަޑޭޝަން ހަމަޖެހިފައިވަނީ، އެ އެތުލީޓުންގެ އިވެންޓް ވެސް ކުރިއަށްދާ ސިޓީ ކަމަށްވާ ޓޯކިޔޯގަ އެވެ. ރާއްޖޭގެ ބާކީ ކުޅިވަރުތަކުގެ އެތުލީޓުން ނަގޯޔާގައި ތިބޭ ގޮތަށް ހަމަޖެހިފައިވާއިރު، ސާފިން ޓީމު ތިބޭނީ މެއިން އެކޮމަޑޭޝަނަށް ވުރެން 1 ގަޑިއިރާއި 30 މިނިޓުން ދެވޭ ދުރުމިނުގަ އެވެ. އަދި، ޝޫޓިން ޓީމު ތިބޭނީ މެއިން އެކޮމަޑޭޝަނާ ބަލާއިރު ބައިގަޑިއިރެއްހާއިރުން ދެވޭ ދުރުމިނުގަ އެވެ.
އޭޝިއަން ގޭމްސް އަށް އެކި ގައުމުތަކުން 15000 އެތުލީޓުންނާއި އޮފިޝަލުން ޖަޕާނަށް ދާނެ ކަމަށް ކުރިން ވަނީ ބެލެވިފަ އެވެ. އެކަމަކު، ފަހުން އޭޝިއަން ގޭމްސްގައި ހިމެނި ކުޅިވަރުތަކާ އެކު، އޮލިމްޕިކް ކައުންސިލް އޮފް އޭޝިއާ (އޯސީއޭ) އިން ބުނެފައިވަނީ، އޭޝިއަން ގޭމްސްގައި އެތުލީޓުންނާއި އޮފިޝަލުން ހިމެނޭހެން އެކި ގައުމުތަކުން ބައިވެރިވާ މެމްބަރުންގެ އަދަދު 17000 އާ ގާތްކުރާނެ ކަމަށެވެ.
އައިޗީ-ނަގޯޔާ އޭޝިއަން ގޭމްސް އޮލިމްޕިކް ކޮމިޓީ އާއި އޮލިމްޕިކް ކައުންސިލް އޮފް އޭޝިއާ އިން ނެރުނު ޖޮއިންޓް ސްޓޭޓްމަންޓެއްގައި ބުނެފައިވަނީ، އެކޮމަޑޭޝަނާ ގުޅޭގޮތުން މީޑިއާގައި ދައުުރުވާ ނުރަނގަޅު މައުލޫމާތު ހިމެނޭ ކަންކަން ސާފުކޮށްދޭން ބޭނުންވާ ކަމަށެވެ. އެ ގޮތުން، ގޭމްސްގެ އެންޓްރީ ހަދަން ކަނޑައަޅާފައިވާ ސުންގަނޑީގެ ކުރިން ފޮނުވާފައިވާ ހުރިހާ ފަރާތަކަށް އެންމެ ރަނގަޅު އެކޮމަޑޭޝަން ހަމަޖައްސާފައިވާ ކަމަށް ވެސް ވަނީ މައުލޫމާތު ދީފަ އެވެ.
އެކަމަކު، އޮގަނައިޒިން ކޮމިޓީގެ ބައެއް މެމްބަރުން އަންނަނީ ލިބިފައިވާ ބަޖެޓްގެ ތެރެއިން ހުރިހާ ކަމެއް ހަމަޖައްސަން ދަތިތަކެއް ހުރި ކަމަށް ބުނެފަ އެވެ. އަދި، ބައެއް ކަހަލަ ކަންކަން އަމިއްލަ އަށް ހަމަޖައްސަން ޖެހުމަކީ ވެސް އެކަށީގެންވާ ކަމެއް ކަމަށާއި އެހެން ނަމަވެސް ޖުމްލަކޮށް، ރަނގަޅު ގޭމްސް އެއް ހޯސްޓް ކުރުމަށް އަމާޒުހިފާފައިވާ ކަމަށެވެ.
މި ފަަހަރުގެ އޭޝިއަން ގޭމްސްގައި، އޮލިމްޕިކްސް ގޮތަށް ހުރިހާ އެތުލީޓުންނާއި އޮފިޝަލުންނަށް އެތުލީޓްސް ވިލޭޖެއް ހަމަޖެހިފައިނުވާއިރު، ވަގުތީ އެކޮމަޑޭޝަންތަކެއް ވެސް ބޭނުންކުރަަން ޖެހޭނެ އެވެ. އެ ގޮތުން، 4000 ނޫނީ 5000 ވަރަކަށް އެތުލީޓުންނާއި އޮފިޝަލުންގެ އެކޮމަޑޭޝަން، ޖަޕާންގައި އެ މުއްދަތުގައި ބާއްވާ އިޓަލީގެ ކްރޫސް ޝިޕް، ކޮސްޓާ ސެރޭނާގައި ވަނީ ހަމަޖައްސައިފަ އެވެ.
މީގެ އިތުރުން، 2000 ވަރަކަށް އެތުލީޓުންނާއި އޮފިޝަލުން ޝިޕިން ކޮންޓެއިނާ ސްޓައިލުގެ ހަޓްތަކުގައި ވެސް އެކޮމަޑޭޓްކުރަން ޖެހޭނެ އެވެ.
