އަންނަ މަހު ޖަޕާނުގެ އައިޗީ-ނަގޯޔާގައި ފަށާ އޭޝިއަން ގޭމްސް އަށް ރާއްޖޭގެ ގައުމީ ޓޭބަލް ޓެނިސް (ޓީޓީ) ޓީމުގެ ސްކޮޑު އެކުލަވާލައި ޕްރެކްޓިސްތައް ކުރިއަށް އެބަދެ އެވެ.
އަންނަ މަހު 19 އިން އޮކްޓޫބަރު 4 އަށް ޗަޕާނުގައި ކުރިއަށްދާ އޭޝިއަން ގޭމްސްގައި، ރާއްޖޭން ވާދަކުރާ ގައުމީ ޓީޓީ ޓީމުގެ ސްކޮޑުގައި ހިމެނެނީ، ހަތަރު ފިރިހެން ކުޅުންތެރިންނާއި ހަތަރު އަންހެން ކުޅުންތެރިންނެވެ.
އެ ގޮތުން، ސްކޮޑުގައި ހިމެނޭ އަންހެން ކުޅުންތެރިންނަކީ، ގައުމީ ޓީޓީ ޗެމްޕިއަންކަން ދާދި ފަހުން ހޯދި ފާތިމަތު ދީމާ އަލީ އާއި ފައިނަލުގައި އޭނާއާ ދެކޮޅަށް ކުޅުނު އައިޝަތު ރަފާ ނާޒިމްގެ އިތުރުން ގައުމީ މުބާރާތުގައި ކާމިޔާބީތަކެއް ހޯދި އައިޝަތު އަލްސާ ނާފިޒު އާއި މިޝްކާ މުހައްމަދު އިބްރާހިމް އެވެ.
ފިރިހެން ކުޅުންތެރިންގެ ތެރޭގައި ހިމެނެނީ، ރާއްޖޭގެ އެންމެ ކާމިޔާބު ފިރިހެން ޓީޓީ ކުޅުންތެރިޔާ، މޫސާ މުންސިފް އަހުމަދުގެ އިތުރުން ގައުމީ ޓީޓީ ޗެމްޕިއަންކަން ދިފާއުކުރި މުހައްމަދު ޝައްފާން އިސްމާއިލް އަދި މީގެ ކުރިން ގައުމީ ޗެމްޕިއަންކަން ހޯދާފައިވާ އަހްޔާރު އަހުމަދު ހާލިދު އަދި އަރަމުން އަންނަ ކުޅުންތެރިޔާ، މުހައްމަދު ހަލަފް ރާފިއު އެވެ.
ގައުމީ ޓީޓީ ޓީމުގެ ކޯޗަކަށް ހުރި، އިރާނުގެ، މަހްދީ ހޯޝްމަރަމް އެއްބަސްވުން ހަމަވެ، އޭނާ ދިއުމާ އެކު، ޓީޓީ އެސޯސިއޭޝަން އޮފް މޯލްޑިވްސް (ޓީޓީއޭއެމް) އިން ގެނައި، ނައިޖީރިއާގެ ކޯޗު، އަޑެޑޮކުން އޮމޮނީޔީގެ ބެލުމުގެ ދަށުން ޓީޓީ ޓީމު އަންނަނީ ފަަރިތަކުރުންތައް ކުރިއަށްގެންދަމުންނެވެ.
އޭޝިއަން ގޭމްސްގައި، ފެނިގެންދާނެ ރާއްޖޭގެ ކޮންޓިންޖެންޓުގެ ޖުމްލަ އަދަދަކީ 81 މެމްބަރުން ކަމަށް މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ވަނީ ބުނެފަ އެވެ.
އޮލިމްޕިކް ކޮމިޓީ (އެމްއޯސީ) އިން "އަދަދު ސްޕޯޓްސް" އަށް ބުނީ، އޭޝިއަން ގޭމްސްގައި ރާއްޖޭން ހަތް ކުޅިވަރަކުން ވާދަކުރާނެ ކަމަށެވެ. އެއީ، ޓީޓީގެ އިތުރުން، އެތުލެޓިކްސް، ބެޑްމިންޓަން، ބީޗްވޮލީބޯޅަ، ސްވިމިން، ޝޫޓިން އަދި ސާފިން އެވެ. އޭޝިއަން ގޭމްސް އަށް ރާއްޖޭގެ ކޮންޓިންޖެންޓްގެ ޗެފް ޑި މިޝަން އަކީ، މޯލްޑިވްސް ޕޫލް ބިލިއާޑް އެސޯސިއޭޝަންގެ ރައީސް، އަހުމަދު ނާސިފް އެވެ. އޭނާ އަކީ މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ހިންގާ ކޮމިޓީގެ މެމްބަރެއް ވެސް މެ އެވެ.
ރާއްޖޭގެ ސްވިމިން ޓީމުގެ އެކޮމަޑޭޝަން ހަމަޖެހިފައިވަނީ، އެ އެތުލީޓުންގެ އިވެންޓް ވެސް ކުރިއަށްދާ ސިޓީ ކަމަށްވާ ޓޯކިޔޯގަ އެވެ. ރާއްޖޭގެ ބާކީ ކުޅިވަރުތަކުގެ އެތުލީޓުން ނަގޯޔާގައި ތިބޭ ގޮތަށް ހަމަޖެހިފައިވާއިރު، ސާފިން ޓީމު ތިބޭނީ މެއިން އެކޮމަޑޭޝަނަށް ވުރެން 1 ގަޑިއިރާއި 30 މިނިޓުން ދެވޭ ދުރުމިނުގަ އެވެ. އަދި، ޝޫޓިން ޓީމު ތިބޭނީ މެއިން އެކޮމަޑޭޝަނާ ބަލާއިރު ބައިގަޑިއިރެއްހާއިރުން ދެވޭ ދުރުމިނުގަ އެވެ.
މޯލްޑިވްސް އޮލިމްޕިކް ކޮމިޓީން ވަނީ އޭޝިއަން ގޭމްސް އަށް ދާ ކޮންޓިންޖެންޓުގެ މެމްބަރުންނާ އެކު މައުލޫމާތު ހިއްސާކުރުމުގެ ބައްދަލުވުމެއް ވެސް ދާދި ފަހުން ބާއްވައިފަ އެވެ.
ޖަޕާނުގައި ބާއްވާ އޭޝިއަން ގޭމްސްގައި ބައިވެރިވާ އެތުލީޓުންގެ އަދަދު އިތުރުވުމާ ގުޅިގެން، ބައެއް ޑެލިގޭޝަންތައް ބޭތިއްބުމަށް ކްރޫސް ޝިޕެއް ބޭނުންކުރުމަށް ވަނީ ނިންމާފައި. ރާއްޖޭން ހަތް ކުޅިވަރަކުން ވާދަކުރާ މި މުބާރާތުގައި، އެތުލީޓުންނާއި އޮފިޝަލުން ހިމެނޭހެން 17،000 އާ ގާތްކުރާ އަދަދަކަށް މީހުން ބައިވެރިވާނެ ކަމަށް ބެލެވޭ
އޭޝިއަން ގޭމްސް އަކީ އޮލިމްޕިކްސް އަށް ފަހު ބޭއްވޭ އެންމެ ބޮޑު ކުޅިވަރު ހަރަކާތެވެ. އެންމެ ފަހުން، އޭޝިއަން ގޭމްސް އޮތީ 2023 ވަނަ އަހަރު ޗައިނާގެ ހަންޒޫގަ އެވެ.
