އަންނަ މަހު ޖަޕާނުގެ އައިޗީ-ނަގޯޔާގައި ފަށާ އޭޝިއަން ގޭމްސްގައި ވާދަކުރާ ރާއްޖޭގެ ގައުމީ އެތުލެޓިކްސް ޓިމުގެ ސްކޮޑުގައި ހިމެނޭ އެތުލީޓުންގެ ނަން އިއުލާނުކޮށްފި އެވެ.
އަންނަ މަހު 19 އިން އޮކްޓޫބަރު 4 އަށް ކުރިއަށްދާ އޭޝިއަން ގޭމްސްގައި އެތުލެޓިކްސް އިން ރާއްޖެ ތަމްސީލްކުރަނީ، އާދަމް ރިއްފަތު، ހަސަން ސާއިދު، ހުސެއިން ޒީކް ސުއާދު، ޒުއިޒު މުހައްމަދު ސުއާދު، އިބާދުﷲ އާދަމް އަދި އިބްރާހިމް ނާހިލް ނިޒާރު އެވެ. މީގެ ތެރޭގައި، ރާއްޖޭގެ އިތުރުން، ރާއްޖޭން ބޭރުގައި ޓްރެއިނިން ހަދަމުން އަންނަ އެތުލީޓުން ހިމެނެ އެވެ.
އެތުލެޓިކްސްގައި ރާއްޖޭން ވާދަކުރަން ހަމަޖެހިފައިވާ އިވެންޓްތަކަކީ، އިބާދުﷲ އާއި ސާއިދު، 100 މީޓަރު ދުވުމުގައި، ނާހިލް އާއި ޒުއިޒު 200 މީޓަރު ދުވުމުގައި އަދި ޒީކް އާއި ރިއްފަތު 400 މީޓަރު ދުވުމުގަ އެވެ. މީގެ އިތުރުން، ރިލޭ ދެ އިވެންޓެއްގައި ވާދަކުރަން ވަނީ ނިންމައިފަ އެވެ. އެއީ، ހަތަރެއް ގުނަ 100 މީޓަރާއި ހަތަރެއް ގުނަ 400 މީޓަރު ރޭހުގަ އެވެ.
އެތުލެޓިކްސް އެސޯސިއޭޝަން (މޯލްޑިވްސް އެތުލެޓިކްްސް)ގެ ޖެނެރަލް ސެކްރެޓަރީ، އަހުމަދު މުންތަގިމް (މުންތޭ)، "އަދަދު ސްޕޯޓްސް" އަށް ވިދާޅުވީ، އޭޝިއަން ގޭމްސް އަށް ފިރިހެން ޓީމު ފޮނުވަން ނިންމުމަކީ، އެސޯސިއޭޝަނުން އަންނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ތައްޔާރުކުރަމުން އަންނަ ޕްލޭންގެ ތެރެއިން ކުރިއަށްދިޔަ ކަމެއް ކަމަށެވެ.
އެ ގޮތުން، ދާދި ފަހުން ސްކޮޓްލެންޑްގެ ގްލާސްގޯގަައި ކުރިއަށްދިޔަ، ކޮމަންވެލްތު ގޭމްސް އަށް ސްކޮޑެއް ނެގުމުގައި ބޮޑަށް ބަލާފައިވަނީ، އަންހެން ރިލޭ ޓީމަށް ފުރުސަތު ލިބޭ ގޮތަށް ކަމަށާއި މި ފަހަރުގެ އޭޝިއަން ގޭމްސްގައި ފިރިހެން ޓީމު ބޭނުންކުރަން ވިސްނީ ކަމަށް މުންތަގިމް ފާހަގަކުރެއްވި އެވެ.
"ގާތްގާތުގައި ދެ ގޭމްސް (ކޮމަންވެލްތު ގޭމްސް އާއި އޭޝިއަން ގޭމްސް) އޮތީމަ، އެސޯސިއޭޝަނުން ނިންމީ ދެ ރިލޭ ޓީމުގެ ކަންކަން ބެލުމަށް މި ފުރުސަތުގެ ބޭނުންކުރަން. އެއީ، އަންނަ އަހަރުގެ އައިއޯއައިޖީގެ ކަންކަން ޕްލޭން ކުރަމުންގެންދާތީއާ އެކު،" މުންތަގިމް ވިދާޅުވި އެވެ.
މި އަހަރުގެ މިހާތަނަށް ބެލިޔަސް، ރާއްޖޭގެ އަންހެން އަދި ފިރިހެން އެތުލީޓުން ވަނީ ބަައިނަލްއަގުވާމީ އެކި މުބާރާތްތަކުގައި ވާދަކޮށްފަ އެވެ. އޭގެ ތެރޭގައި ސީނިއާ މުބާރާތްތަކާއި އުމުރުފުރާ މުބާރާތްތައް ވެސް ހިމެނެ އެވެ.
އޭޝިއަން ގޭމްސްގައި ރާއްޖޭން ހަތް ކުޅިވަރަކުން ވާދަކުރާނެ ކަމަށް މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ވަނީ ބުނެފަ އެވެ. އެއީ، އެތުލެޓިކްސް، ބެޑްމިންޓަން، ބީޗްވޮލީބޯޅަ، ޓޭބަލް ޓެނިސް، ސްވިމިން، ޝޫޓިން އަދި ސާފިން އެވެ.
