ލަންޑަން (ސެޕްޓެމްބަރު 2) - މަނާބޭހުގެ މައްސަލައެއްގައި ތާށިވެފައި ހުރުމަށް ފަހު ދާދި ފަހުން ކުޅުމުގެ ފުރުސަތު ލިބުނު ޔޫކްރެއިންގެ ތަރި، މިހައިލޯ މުޑްރިކް، ލޯން އެއްބަސްވުމެއްގެ ދަށުން ޓޮޓެންހަމް ހޮޓްސްޕާސް އަށް ބަދަލުވެއްޖެ އެވެ.
މުޑްރިކް، 25، ގެ ސަސްޕެންޝަންގެ މައްސަލައިގައި ހައްލެއް ލިބި، 21 މަސް ދުވަސް ފަހުން، އަލުން ކުޅުމުގެ ތެރެއަށް އަންނަން ފުރުސަތު ފަހިވީ މި މަހު ކުރީކޮޅުގަ އެވެ. މުޑްރިކް މަނާބޭހެއް ބޭނުންކުރި މައްސަލަ ދިގުލައިދާތީވެ، އޭނާ ވަނީ މި އަހަރު ކުރީކޮޅުގައި، އެކަމަށް ހައްލެއް ހޯދަން، ކުޅިވަރުގެ އެންމެ މަތީ ކޯޓު، ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އަށް ހުށަހަޅައިފަ އެވެ. ކާސް އިން ރަނގަޅަށް މައްސަލަ ނުފަށަނީސް، އިނގިރޭސި އެފްއޭ އިން ނިންމާފައިވަނީ، މުޑްރިކްގެ މައްސަަލަ މިހާރު ނިމިފައިވާ ކަމަށެވެ. އެއީ، މި މައްސަލައިގައި މުޑްރިކް އަށް އަންނަން ޖެހޭ ވަރުގެ އަދަބަކާ އެއްވަރުގެ މުއްދަތެއް ކުޅުމާ ދުރުގައި އޭނާ މިހާތަނަށް ވެސް ހުރެފައިވާތީ އެވެ.
21 މަސް ދުވަސް ފަހުން މުޑްރިކް އަށް ފުޓްބޯޅަ ކުޅެން ފުރުސަތު
މަނާބޭހުގެ މައްސަލައެއްގައި ހަތަރު އަހަރަށް ސަސްޕެންޑްކުރި ޗެލްސީގެ މުޑްރިކް، 21 މަސް ދުވަހު ކުޅުމާ ދުރުގައި ހުރުމަށްފަހު އަލުން ކުޅުމުގެ ފުރުސަތު ލިބިއްޖެ. މި ފުރުސަތު އޭނާ އަށް ލިބުނީ ސަސްޕެންޝަންގެ މައްސަލަ ކޯޓަށް ހުށަހަޅާފައިވަނިކޮށް، އޭނާ މިހާތަނަށް ހުރި މުއްދަތަކީ އަދަބަކަށް ފުދޭ މުއްދަތެއް ކަމަށް އިނގިރޭސި އެފްއޭއިން ނިންމުމާ ގުޅިގެން
ޗެލްސީގެ ޕްރީ ސީޒަން ބައެއްް މެޗުތަކުގައި ކުޅުނު ނަމަވެސް، ސީޒަން ފެށި ފަހުން މުޑްރިކްގެ ބޭނުން އެ ޓީމުން ނުކުރެ އެވެ. އެއާ އެކު، ގަވާއިދުން ކުޅެން ލިބޭ ޓީމަކާ ގުޅެން މުޑްރިކް ނިންމައިގެން ހުއްޓައި ޓޮޓެންހަމް އިން ވަނީ އޮފާކޮށްފަ އެވެ. ޓޮޓެންހަމްގެ ކޯޗަކަށް ހުރި އިޓަލީގެ ރޮބާޓޯ ޑި ޒާބީއާ އެކު، މުޑްރިކް ވަނީ ކުރިން ޔޫކްރެއިންގެ ޝަހުތަރު ޑޮނެސްކްގައި މަސައްކަތްކޮށްފަ އެވެ.
ޓޮޓެންހަމްގެ މީޑިއާ އަށް ދިން އިންޓަވިއުއެއްގައި މުޑްރިކް ބުނީ، އެ ކްލަބާ އެކު މަސައްކަތް ފަށައި، އަލުން ޑި ޒާބީގެ ކޯޗުކަމުގައި ކުޅެން ކެތްމަދުވެފައި ހުރި ކަމަށެވެ. ޓޮޓެންހަމްގެ ސަޕޯޓަރުން ޝައުގުވެރިވާނެ ކަހަލަ ކުޅުމެއް ދައްކަން މަސައްކަތްކުރާނެ ކަމަށް މުޑްރިކް ވަނީ ބުނެފަ އެވެ.
މުޑްރިކްގެ އިތުރުން ޗެލްސީގެ ޑިފެންޑަރު، ޓޮސިން އަޑަރަބިއޯޔޯ ވެސް ވަނީ ޓްރާންސްފާގެ ފަހު ދުވަހު ޓޮޓެންހަމް އަށް ބަދަލުވެފަ އެވެ. ޓޮޓެންހަމް އިން ޓޮސިން ގަތީ ނުވަ މިލިއަން ޑޮލަރަށެވެ. މުޑްރިކްގެ އެއްބަސްވުން ދާއިމީ ކުރާނަަމަ، ޓޮޓެންހަމް އިން 88 މިލިއަން ޑޮލަރުގެ ޓްރާންސްފާ ފީއެއް ދައްކަން ޖެހޭނެ އެވެ.
އާސެނަލްގެ ޑީލެއް، 2023 ވަނަ އަހަރު، ހައިޖެކްކުރުމަށް ފަހު، ޗެލްސީން މުޑްރިކްގެ ސޮއި ހޯދީ ޔޫކްރެއިންގެ ޝަހުތަރު ޑޮނެސްކަށް 100 މިލިއަން ޑޮލަރު ދައްކައިފަ އެވެ. ޗެލްސީ އަށް ކުޅުނު 73 މެޗުން މުޑްރިކަށް ޖެހުނީ އެންމެ 10 ގޯލެވެ. ސަސްޕެންޝަންގައި ހުރި ނަމަވެސް، ޗެލްސީން އަންނަނީ ބަރާބަރަށް މުޑްރިކްގެ މުސާރަ ދެމުންނެވެ. އެއީ، އަހަރަކަށް ގާތްގަނޑަކަށް ހަތް މިލިއަން ޑޮލަރެވެ.
