މެންޗެސްޓާ (އޮގަސްޓް 26) މެންޗެސްޓާ ސިޓީން ލިވަޕޫލަށް ކުޅެމުން އަންނަ ނެދަލެންޑްސްގެ ފޯވާޑް، ކޯޑީ ގަކްޕޯ ގަންނަން ޝައުގުވެރިވެއްޖެ އެވެ.
ކުރިން ޕީއެސްވީ އައިންދޯވަންގެ ކެޕްޓަންކަން ކުރި ގަކްޕޯ ހޯދަން މި ފަަހަރުގެ ޓްރާންސްފާ މާކެޓްގައި އެންމެ ބޮޑަށް މަސައްކަތްކުރަމުން އައީ ޓޮޓެންހަމް ހޮޓްސްޕާސް އިންނެވެ. އެކަމަކު، ސިޓީން ގަކްޕޯގެ ރޭހަށް ވަންނަން ނިންމީ، ދާދި ފަހުން ސިޓީ އަށް ކުޅޭ ބްރެޒިލްގެ ސަވީނިއޯ އާއި މިސްރުގެ އޮމަރު މާމޫޝް، ޓޮޓެންހަމް އަށް ބަދަލުވާން ނިންމުމުންނެވެ.
ލިވަޕޫލުން ބޮޑު އަގު ދީފައި ފްރާންސްގެ ޕީއެސްޖީ އަށް ކުޅޭ ބްރެޑްލީ ބާކޮލާ ގަންނަން ކުރާ މަސައްކަތުގެ ތެރެއިން، ޓްރާންސްފާ ބަޖެޓް ބޮޑުކުރަން ގަކްޕޯ ދޫކޮށްލާނެ ކަމަށް މީޑިއާތަކުން ރިޕޯޓްކޮށްފައިވެ އެވެ.
އެކަމަކު، ލިވަޕޫލުން ރަސްމީ ސިފައެއްގައި މި ފަހަރުގެ ޓްރާންސްފާގައި ގަކްޕޯ ދޫކޮށްލުމުގެ އެއްވެސް ވާހަކައެއް އަދި ދައްކާފައެއް ނުވެ އެވެ. އެކަމަކު، ނެދަލެންޑްސްގެ ބައެއް ނޫސްތަކުން މީގެ ކުރިން ރިޕޯޓްކުރި ގޮތުގައި، ޓޮޓެންހަމްގެ ކޯޗު، އިޓަލީގެ ރޮބާޓޯ ޑި ޒާބީއާ އެކު، ގަކްޕޯ ވަނީ އެ ޓީމަށް ދާން މަޝްވަރާތަކެއް ކޮށްފަ އެވެ.
މީގެ ތިން އަހަރު ކުރިން، ހަ އަހަރުގެ ކޮންޓްރެކްޓެއްގައި، ޕީއެސްވީ އައިންދޯވަން ދޫކޮށް، ލިވަޕޫލަށް ގަކްޕޯ ސޮއިކުރީ 50 މިލިއަން ޑޮލަރުގެ ޑީލެއްގަ އެވެ.
ގަކްޕޯ، އެންމެ ފަހުން، ލިވަޕޫލާ އެކު ސޮއިކުރި ކޮންޓްރެކްޓް އޮތީ 2030 ވަނަ އަހަރުގެ ޖޫން މަހުގެ ނިޔަލަށެވެ.
ލިވަޕޫލާ އެކު އިނގިރޭސި ޕްރިމިއާ ލީގުގެ ޗެމްޕިއަންކަން ހޯދާފައިވާ ގަކްޕޯ އަށް މިދިޔަ ސީޒަނުގައި އެ ޓީމުގެ ކޯޗަކަށް ހުރި އާނާ ސްލޮޓާ އެކު އެންމެ ރަނގަޅު ކުޅުމެއް ނުދެއްކި ފާޑުކިޔުން އަމާޒުވި ނަމަވެސް، އޭނާ އަކީ ލިވަޕޫލް ޓީމަށް މުހިންމު ކުޅުންތެރިއެކެވެ. މި ފަހަރުގެ ސީޒަނުގައި، ސްޕެއިނުގެ ކޯޗު، އަންޑޯނީ އިރައޯލާގެ ކޯޗުކަމުަގައި ލިވަޕޫލުން ކުޅުނު ފުރަތަމަ މެޗުގައި، ރަށުންބޭރުގައި ނިއުކާސަލް ޔުނައިޓެޑާ ދެކޮޅަށް ލިވަޕޫލްގެ ފުރަތަމަ ލަނޑު ޖެހީ ވެސް ގަކްޕޯ އެވެ.
ލިވަޕޫލަށް މިހާތަނަށް ކުޅެދިން 181 މެޗުން 51 ލަނޑު ޖެހި ގަކްޕޯ ވަނީ، 23 ލަނޑު ޖަހަން ފުރުސަތު ތަަނަވަސްކޮށްދީފަ އެވެ.
