މެންޗެސްޓާ ސިޓީ (ސެޕްޓެމްބަރު 2) - މެންޗެސްޓާ ސިޓީ ކަހަލަ ބޮޑު ޓީމަކަށް އަބަދުވެސް ކުޅޭހިތްވި ކަމަށް އެ ޓީމާ ދާދި ފަހުން ގުޅުނު ޗެލްސީގެ ކުރީގެ މިޑްފީލްޑަރު، އާޖެންޓީނާގެ އެންޒޯ ފެނާންޑޭޒް ބުނެފި އެވެ.
އުމުރުން 25 އަހަރުގެ އެންޒޯ، ސިޓީ އަށް ބަދަލުވާނީ، 169 މިލިއަން ޑޮލަރުގެ ފީ އަކަށެވެ. ބީބީސީން ރިޕޯޓްކުރާ ގޮތުގައި، މިއީ، މިދިޔަ ސީޒަން ފެށުމުގެ ކުރިން، ލިވަޕޫލުން ނިއުކާސަލް ޔުނައިޓެޑްގެ އަލެކްސަންޑަ އިސާކް ގަންނަން ހަރަދުކުރި ވަރުގެ މިންވަރެކެވެ. އެހެން ކަމުން، އިސާކް އާއި އެންޒޯގެ ޑީލަކީ ޕްރިމިއާ ލީގުގެ ޖޮއިންޓް ރެކޯޑެކެވެ.
ރެކޯޑް އަގަކަށް ޗެލްސީގެ އެންޒޯ ގަންނަން ސިޓީން އެއްބަސްވުމަކަށް
ޗެލްސީގެ އާޖެންޓީނާ މިޑްފީލްޑަރު އެންޒޯ ފެނާންޑޭސް، އިނގިރޭސި ރެކޯޑް ފީއެއް ކަމަށްވާ 169 މިލިއަން ޑޮލަރަށް މެންޗެސްޓާ ސިޓީއަށް ބަދަލުވާން އެއްބަސްވެއްޖެއެވެ. ސިޓީގެ ކޯޗު އެންޒޯ މަރެސްކާގެ އެދުމުގެ މަތިން ގެންނަ މި ކުޅުންތެރިޔާއާއެކު، އެ ކްލަބުން މި ފަހަރުގެ ޓްރާންސްފާ މާކެޓުގައި މިޑްފީލްޑަރުން ގަތުމަށް ބޮޑު ހޭދައެއް ކުރުމަށް ވަނީ ނިންމާފައެވެ.
ސިޓީއާ އެކު، ފަސް އަހަރުގެ ކޮންޓްރެކްޓެއްގައި ސޮއިކުރުމަށް ފަހު، އެ ކްލަބްގެ މީޑިއާ އަށް ދިން އިންޓަވިއުއެއްގައި އެންޒޯ ބުނެފައިވަނީ، ސިޓީ އަށް ބަދަލުވެވުނީތީވެ ވަރަށް އުފާކުރާ ކަމަށެވެ.
"އަހަރެން އަބަދުވެސް ދެކުނު ހުވަފެނެއް އެއީ ސިޓީ ކަހަލަ ބޮޑު ޓީމަކާ ގުޅުމަކީ. މި ފުރުސަތު ލިބުނީތީވެ ވަރަށް އުފާކުރަން. މިއީ އަހަންނާއި އަހަރެންގެ އާއިލާ އަށް ވަރަށް ޖަޒުބާތީ ވަގުތުތަކެއް. އުމުރުން 25 އަހަރުގަައި މި ވަރުގެ ނިންމުމެއް ނިންމައި ފުޓްބޯޅަ ކެރިއަރުގައި ދެކުނު ހުވަފެނެއް ހަގީގަތަކަށް ހެދުމާ ދިމާލަށް ދިއުމަކީ،" 2022 ވަނަ އަހަރުގެ ވޯލްޑް ކަޕްގެ އެންމެ މޮޅު ޒުވާން ކުޅުންތެރިޔާގެ މަގާމު ހޯދުމަށް ފަހު، ރެކޯޑް އަގަކަށް ޗެލްސީ އަށް އެ ފަހަރު ބަދަލުވި އެންޒޯ ބުންޏެވެ.
ގަތަރުގައި 2022 ވަަނަ އަހަރު ބޭއްވި ވޯލްޑް ކަޕްގެ ޗެމްޕިއަންކަން އާޖެންޓީނާ އިން ހޯދިއިރު، އެ މުބާރާތުގެ އެންމެ މޮޅު ޒުވާން ކުޅުންތެރިޔާ، އެންޒޯ، އެ މުބާރާތަށް ފަހު، ދެން އައި، ޖެނުއަރީ ޓްރާންސްފާ މާކެޓްގައި، ބެންފީކާ ދޫކޮށް ޗެލްސީ އަށް ސޮއިކުރީ ބޮޑު އަގުގަ އެވެ. އެ ގޮތުން، އެންޒޯގެ ސޮއި ހޯދަން ޗެލްސީންް 130 މިލިއަން ޑޮލަރު ދެއްކި އެވެ. އެއީ، އޭރުގެ ޓްރާންސްފާ ރެކޯޑެވެ.
އެންޒޯ އަކީ ދުނިޔޭގެ ފުޓްބޯޅަ ޓްރާންސްފާގައި، 100 މިލިއަން ޑޮލަރަށް ވުރެން މަތީ އަގަކަށް ދެ ފަހަރު ޓްރާންސްފާ ބާޒާރުގައި ވިކުނު ހަމައެކަނި ކުޅުންތެރިޔާ އެވެ. އެންޒޯ ބުނީ، ސިޓީގެ ކާމިޔާބީ އާއި އެ ކްލަބްގެ ލެވަލް އެ ޓީމާ އެކު ހޭދަކުރި މަދު ވަގުތުކޮޅެއްގެ ތެރޭގައި ފެނިފައިވާ ކަމަށެވެ.
"ވަރަށް ގިނަ ކާމިޔާބީ އެކުގައި ހޯދަން ބޭނުން،" އެންޒޯ ބުންޏެވެ.
ސިޓީ އަށް އެންޒޯ ގެންނަން އެންމެ ބޮޑަށް ބާރު އެޅީ ކުރިން ޗެލްސީގައި ހުރުމަށް ފަހު މިހާރު ސިޓީގެ ކޯޗުކަމާ ހަވާލުވެ ހުރި އެންޒޯ މަރެސްކާ އެވެ.
ޗެލްސީއާ އެކު، ޔުއެފާ ކޮންފަރެންސް ލީގާއި ފީފާ ކްލަބް ވޯލްޑް ކަޕް ކާމިޔާބުުުކުރި އެންޒޯ ވަނީ އެ ޓީމަށް ކުޅެދިން 170 މެޗުން 31 ލަނޑު ޖަހައި، 30 ލަނޑު ޖަހަން ފުރުސަތު ހޯދައިދީފަ އެވެ.
