ލަންޑަން (އޮގަސްޓް 29) - އިނގިރޭސި ޕްރިމިއާ ލީގުގައި މިރޭ ރަޔާން ޗާކީ އާއި އާލިން ބްރައުޓް ހާލަންޑްގެ ލަނޑުތަކާ އެކު 4-1 އިން މެންޗެސްޓާ ސިޓީން ކްރިސްޓަލް ޕެލަސް އަތުން މޮޅުވެއްޖެ އެވެ.
ދިހަ އަހަރަށް ފަހު ޕެޕް ގާޑިއޯލާ، ސިޓީގެ ކޯޗުކަން ދޫކޮށްލުމުން އެ މަގާމާ ހަވާލުވި އެންޒޯ މަރެސްކާ ފުރަތަަމަ އިރުޝާދުދިން ރަސްމީ މެޗުން އެފްއޭ ޗެރިޓީ ޝީލްޑް މެޗުގައި އާސެނަލް އަތުން ބަލިވި ނަމަވެސް، އިނގިރޭސި ޕްރިމިއާ ލީގުގެ އާ ސީޒަނުގައި ސިޓީން ކުޅުނު ދެ މެޗުން ވެސް މި ވަނީ މޮޅުވެފަ އެވެ. ފުރަތަމަ މެޗުގައި އަމިއްލަ ދަނޑުގައި ފަހަތުން އަރައި، ފަހު ވަގުތު 2-1 އިން ބޯންމައުތު އަތުން މޮޅުވި އެވެ.
ޕެލަސްގެ ސެލްހަސްޓް ޕާކުގައި ކުޅުނު މެޗުގައި، ސިޓީގެ ފޯވާޑް، ހާލަންޑް ވަނީ 17 ވަނަ މިނިޓްގައި ސިޓީ އަށް ލީޑުނަގައިދީފަ އެވެ. މިއީ، ސިޓީގެ އަންޓުއާން ސެމެންޔޯ ނެގި ހުރަހަކަށް ފުންމައިގެން އަރައި ބޮލުން ގޯލަށް ބޯޅަ ފޮނުވާލައިގެން ހާލަންޑް ޖެހި ގޯލެކެވެ. މިއީ، މި ފަހަރުގެ ލީގުގައި ހާލަންޑް ޖެހި ފުރަތަމަ ލަނޑެވެ.
ސިޓީގެ އެލިއަޓް އެންޑަސަން ޖެހި ބޯޅައެއް ޕެލަސްގެ ކީޕަރު ޑީން ހެންޑަސަން ވަނީ މަތަކޮށްފަ އެވެ. ސިޓީ އަށް ދެ ވަނަ ލަނޑެއް ޖަހައިދޭން ފިލް ފޯޑެން އަށް ރަނގަޅު ދެ ފުރުސަތެއް ލިބުނެވެ. އެ ގޮތުން، އެންޑަސަން ދިން ބޯޅައަކުން އޭރިއާތެރޭގައި ހުސްކޮށް ހުރެފައި ފޯޑެން ޖެހި ބޯޅަ ހުރަސްދަނޑިމަތިން ދިޔައިރު، ސިޓީގެ ޗާކީ ނެގި ހުަރަހަކަށް އަރައި ފޯޑެން އަށް ރަނގަޅަށް ބޯޅަ ފޮނުވާލެވޭ ގޮތެއްނުވި އެވެ.
ޕެލަސް އަށް އެއްވަރުކޮށްދޭން އެ ޓީމުގެ ނޯވޭ ފޯވާޑް، ޖޯގެން ސްޓްރޭންޑް ލާސަން ބޮލުން ފޮނުވާލި ބޯޅައެއް ދަނޑިކައިރިން ދިޔައިރު، އެ ޓީމުގެ ފުލްބެކް، ޓައިރިކް މިޓްޗެލް ހުސްކޮށް ހުރެ ބޮލުން ފޮނުވާލި ބޯޅަ ދިޔައީ ދަނޑިކައިރިން ބޭރުންނެވެ.
ދެ ވަނަ ހާފުގެ ކުޅުން ފެށިގެން އަށް މިނިޓް ތެރޭ ސިޓީން ދެ ވަނަ ލަނޑު ޖެހި އެވެ. ސިޓީ އަށް ލީޑުފުޅާކޮށްދިން ލަނޑު ޖެހީ ފޯޑެން ދިން ބޯޅައަކުން ޗާކީ އެވެ. ޕެލަސްގެ އޭރިއާތެރެއިން ތިން ކުޅުންތެރިން ކައިރިން ދެމިގަތުމަށް ފަހު، ޗާކީ ވަނީ ތިރިތިރިން ގޯލަށް ބޯޅަ ފޮނުވާލައިފަ އެވެ.
ސިޓީން ލީޑުފުޅާކުރިތާ ދެ މިނިޓެއްހާއިރު ފަހުން ޕެލަސް އިން ލަނޑެއް ޖަހައި ފަރަގުކުޑަކުރި އެވެ. މިއީ، ޕެލަސްގެ ސްޕެއިން މިޑްފީލްޑަރު، ޔެރެމީ ޕީނޯ ފޮނުވާލި ހިލޭ ޖެހުމަކުން ގޯލުގެ ދަނޑީގައި ޖެހިފައި ސިޓީގެ ކީޕަރު، ޖިއަންލުއިޖީ ޑޮނަރުންމާ ގައިގައި ޖެހިފައި ވަން ގޯލެކެވެ.
ޕެލަސް އިން އުންމީދެއް ހޯދައިގެން ރަނގަޅަށް އެޓޭކަށް ޖެހިނުލެވެނީސް ސިޓީން ވަނީ ތިން ވަނަ ލަނޑެއް ޖަހައި، އަނެއްކާ ވެސް ލީޑުފުޅާކޮށްފަ އެވެ. މެޗުގެ 58 ވަނަ މިނިޓްގައި ޗާކީ އޭރިއާބޭރުން ފޮނުވާލި ބޯޅައެއް ވަނީ ގޯލުގެ މަތީ ކަނަށް އަމާޒުވެފަ އެވެ.
މެޗުގެ 85 ވަނަ މިނިޓްގައި ސިޓީގެ ހަތަރު ވަނަ ލަނޑު ޖެހީ ހާލަންޑް އެވެ. މިއީ، ޕެލަސްގެ ތިން ޑިފެންޑަރުން ކައިރިން ހުސްކޮށްލާފައި ފޯޑެން ދިން ބޯޅައަކުން ހާލަންޑް ޖެހި ގޯލެކެވެ.
ޕެލަސް އިން މި ވަނީ އާ ކޯޗު ޕިއޭ ސާޖްގެ އިރުޝާދުގެ ދަށުން އެ ޓީމު ކުޅުނު ފުރަތަަމަ ދެ މެޗުން ވެސް ބަލިވެފަ އެވެ.
