ރިޔާދު، ސައުދީ އަރަބިއްޔާ (ސެޕްޓެމްބަރު 8) - ސައުދީ ޕްރޮފެޝަނަލް ލީގު (ޕްރޯ ލީގު)ގެ އަލް ހިލާލްއާ އެކު ހަދާފައިވާ އެއްބަސްވުން އުވާލި ފްރާންސް ގައުމީ ޓީމުގެ ކުރީގެ ފޯވާޑް، ކަރިމް ބެންޒެމާ، އެ ލީގާ އެކު ހަދާފައި އޮތް ޑީލެއްގެ ސަބަބުން އެހެން ގައުމެއްގެ ކްލަބަކަށް ބަދަލުވުމުގައި ހުރަސްތަކެއް ކުރިމަތިވެއްޖެ އެވެ.
އުމުރުން 38 އަހަރުގެ ބެންޒެމާ، 2023 ވަނަ އަހަރު ރެއާލް މެޑްރިޑް ދޫކޮށް، އެންމެ ފުރަތަމަ ބަދަލުވީ ސައުދީ ޕްރޯ ލީގުގެ އަލް އިއްތިހާދު އަށެވެ. އަދި، އަލް އިއްތިހާދުގެ އެއްބަސްވުން ނިމުމަކަށް ގެނެސް މި އަހަރުގެ ޖެނުއަރީ މަހު އަލް ހިލާލް އަށް ބަދަލުވި އެވެ. އެކަމަކު، އެ ޓީމުގައި މާ ގިނަ ދުވަހު މަޑުނުކޮށް، ބެންޒެމާ މި ވަނީ އަލް ހިލާލްގެ ކޮންޓްރެކްޓް އުވާލައިފަ އެވެ.
މި ވަގުތު އެއްވެސް ކްލަބެއްގެ ކޮންޓްރެކްޓްގައި ނެތް ބެންޒެމާ ރިޓަޔާކުރަން ވިސްނަމުން އަންނަ ކަމަށް މީިޑިއާތަކުން ރިޕޯޓްކުރި އެވެ. އެކަމަކު، ދާދި ފަހުން ފްރާންސްގެ ނޫހަކުން ވަނީ ލިޔޯނަށް އެނބުރި ދިއުމަށްޓަކައި ބެންޒެމާ ވާހަކަ ދެއްކި ކަމަށް ރިޕޯޓްކޮށްފަ އެވެ. އަދި، ލިޔޯނަށް ކުޑަ އަގެއްގައި އެއް އަހަރުގެ އެއްބަސްވުމެއްގެ ދަށުން ކުޅެން ބެންޒެމާ އެއްބަސްވި އެވެ. އެހެން ނަމަވެސް، ސައުދީ ލީގާ އެކު ބެންޒެމާގެ އެއްބަސްވުމެއް އޮތުމުން އެ ޑީލް މަޑުޖެހުނީ އެވެ.
ސައުދީ ލީގުގެ އެމްބަސަޑަރެއްގެ ގޮތުގައި، ބެންޒެމާ ވަނީ އެ ލީގާ އެކު 2030 ގެ ނިޔަލަށް ޑީލެއް ހަދައިފަ އެވެ. އޭގެ ހިމަނާފައިވާ މާއްދާއެއްގައި ބުނެފައިވާ ގޮތުން، އެ އެއްބަސްވުން ހަމަވުމުގެ ކުރިން، ސައުދީ ޕްރޯ ލީގު ނޫން އެހެން ގައުމެއްގައި ބެންޒެމާ އަށް ކުޅެވޭނެ ގޮތެއް ނެތެވެ. އެއީ، އޭނާގެ އިމޭޖް ރައިޓްސް ކޮންޓްރެކްޓް އޮތީ ސައުދީ ޕްރޯ ލީގު އަތުގައި ކަމަށްވާތީ އެވެ.
ސައުދީ ޕްރޯ ލީގާ އެކު ބެންޒެމާގެ އެ ކޮންޓްރެކްޓް ހަމަވާއިރު، އޭނާ އަށް 43 އަހަރު ފުރޭނެ އެވެ. އެހެން ކަމުން، ކެރިއަރު ކުރިއަށްދާނަމަ، ބެންޒެމާ ދެން ވެސް ގުޅެން ޖެހެނީ ސައުދީ ޕްރޯ ލީގުގެ ކްލަބަކާ އެވެ. އެހެން ނޫން ނަމަ، ސައުދީ ޕްރޯ ލީގާ އެކު އެ އޮތް އެއްބަސްވުން އުވާލުމަށް ފަހު، އެހެން ގައުމެއްގެ ކްލަބަކަށް ބެންޒެމާ އަށް ބަދަލުވެވިދާނެ އެވެ.
އަލް ހިލާލް އިން ބެންޒެމާގެ ކޮންޓްރެކްޓް އުވާލުމަށް ފަހު، ގެނައީ އެސްޓަން ވިލާ އަށް ކުޅެމުން އައި އިނގިރޭސި ފޯވާޑް، އޮލީ ވަޓްކިންސް އެވެ. އޭނާގެ ސޮއި ހޯދަން އެ ކްލަބުން 70 މިލިއަން ޑޮލަރު އިންވެސްޓްކުރި އެވެ.
މީގެ ކުރިން ބެލޮންޑިއޯ އެވޯޑް ވެސް ހޯދާފައިވާ ބެންޒެމާ، އަލް ހިލާލް އަށް ކުޅުނު 16 މެޗުން 10 ގޯލު ޖަހައި، ފަސް ލަނޑު ޖަހަން ފުރުސަތު ތަނަވަސްކޮށްދިނެވެ.
ލިޔޯން ދޫކޮށް، 33 މިލިއަން ޑޮލަރުގެ ފީ އަކަށް، 2009 ވަނަ އަހަރު، ރެއާލަށް ބަދަލުވި ބެންޒެމާ، ވަނީ ލިޔޯނަށް ކުޅުނުއިރު، ހަތަރު ފަހަރު އެ ޓީމާ އެކު، ލީގު ޗެމްޕިއަންކަން ހޯދައިފަ އެވެ. ރެއާލްގައި ހޭދަކުރި 14 އަހަރު ތެރޭ ބެންޒެމާ ވަނީ އެ ޓީމަށް ކުޅެދިން 648 މެޗުން 354 ގޯލު ޖަހައިފަ އެވެ.
އެކާވީސް ވަނަ ގަރުނުގައި ފެނިގެންދިޔަ އެންމެ މޮޅު އެއް ފޯވާޑް، ބެންޒެމާ ވަނީ ރެއާލަށް ކުޅުނުއިރު ޖުމްލަ އެކު، 24 ތަށި އުފުލާލައިފަ އެވެ. އޭގެ ތެރޭގައި ފަސް ފަހަރު ޗެމްޕިއަންސް ލީގު ކާމިޔާބު ކުރުން ހިމެނެ އެވެ. އަދި އެ ޓީމުގައި ހުރެ، ފްރާންސް ފުޓްބޯލް އިން ހޮވާ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑް ހޯދި އެވެ.
