ރިޔާދު (އޭޕްރީލް 7) - އިޓަލީގެ ގައުމީ ފުޓްބޯޅަ ޓީމުގެ ކޯޗަކަށް ވުމަށް އޮފާއެއް ލިބުނު ކަމުގައި ވިޔަސް އޭނާގެ ވިސްނުމަކީ ސައުދީ ޕްރޮފެޝަނަލް ލީގު (ޕްރޯ ލީގު)ގެ އަލް ހިލާލްގެ ކޯޗެއްގެ ގޮތުގައި މަޑުކުރުން ކަމަަށް އެ ޓީމާ މިދިޔަ އަހަރު ހަވާލުވި މަޝްހޫރު ކޯޗު، އިޓަލީގެެ ސިމޯން އިންޒާގީ ބުނެފި އެވެ.
ކުރިން އޭސީ މިލާނަށް ކުޅުނު މަޝްހޫރު ފޯވާޑް ފިލީޕޯ އިންޒާގީގެ ކޮއްކޮ، އިންޒާގީ ކުރިން ކޯޗުކޮށްދިން އިންޓައާ ހަވާލުވީ، 2021 ވަނަ އަހަރުގެ ޖޫން މަހު، ދެ އަހަރުގެ ކޮންޓްރެކްޓެއްގަ އެވެ. ކުރިން ލާޒިއޯ އަށް ގިނަ އަހަރުތަކެއް ކޯޗުކޮށްދިން އިންޒާގީ ވަނީ، 2023 ވަނަ އަހަރުގެ ސެޕްޓެމްބަރު މަހު، މިދިޔަ އަހަރުގެ ނިޔަލަށް އޮތް އެއްބަސްވުމެއްގައި އިންޓައާ އެކު، ސޮއިކޮށްފަ އެވެ. އެއީ، 2023 ވަނަ އަަހަރުގެ ޗެމްޕިއަންސް ލީގުގެ ފައިނަލުން މެންޗެސްޓާ ސިޓީ އަތުން އިންޓަ ބަލިވިތާ ދެތިން މަސް ފަހުންނެވެ. އިންޒާގީގެ ކޯޗުކަމުގައި، މި ދިޔަ އަހަރުގެ ޗެމްޕިއަންސް ލީގުގެ ފައިނަލުން އިންޓަ ވަނީ ޕީއެސްޖީ އަތުން 5-0 އިން ބަލިވެފަ އެވެ. އެއީ، މިހާތަނަށް ޗެމްޕިއަންސް ލީގުގެ ފައިނަލުގައި އެންމެ ފަރަގު ބޮޑު ނަތީޖާ އެވެ. އޭގެ ފަހުން، އެމެރިކާގައި ފެށި ކްލަބް ވޯލްޑް ކަޕްގެ ކުރިން، އިންޒާގީ ވަނީ އަލް ހިލާލްއާ ހަވާލުވެފަ އެވެ.
އިންޒާގީ ބުނީ އަލް ހިލާލަށް ބަދަލުވެ، އޭނާ އަށް ގިނަ އަދަދެއްގެ ފައިސާ ލިބޭ ކަމަށާއި އެކަމަކު، އެއީ ހުރިހާ ކަމެއް ނޫން ކަމަށެވެ.
"ގިނަ ފައިސާ ހޯދުމަކީ ހިތްހަމަޖެހޭ ކަމެއް. އެކަމަކު، ކުރިން ވެސް އަހަންނަށް ލިބުނީ ހަމަޖެހިލައިގެން އުޅެވޭ ވަރުގެ އާމްދަނީ އެއް. ވަރަށް ހިތްފަސޭހަކަމާ އެކު ސައުދީ އަރަބިއްޔާގައި މި އުޅެނީ، އިޓަލީ މަތިން މިސް އެއް ނުވޭ،" އިންޒާގީ ބުންޏެވެ.
ޖެހިޖެހިގެން ތިން ވަނަ ފީފާ ވޯލްޑް ކަޕުން އިޓަލީ އަށް ފުރުސަތު ނުލިބި، އެންމެ ފަހުން އެ ޓީމަށް ކޯޗުކޮށްދިން ޖެނާރޯ ގަޓޫސޯ ވަނީ އަމިއްލަ އަށް މަގާމުން ވަކިވެފަ އެވެ. އިޓަލީގެ ކޯޗުކަން ހަވާލުުކުރާނެ ކަމަށް ބެލެވޭ ކޯޗުންގެ ލިސްޓުގައި އިންޒާގީ ވެސް ހިމެނެ އެވެ. އެކަމަކު، އޭނާ ވަނީ އެ އޮފާ އަޔަސް ނުނަގާނެ ކަަމަށް ބުނެފަ އެވެ.
"އިޓަލީ ގައުމީ ޓީމު؟ އަބަދުވެސް ވިސްނަން ޖެހޭ ކަމެއް. އެކަމަކު، މި ވަގުތު އަހަރެން މި ހުރީ ރަނގަޅު ތަނެއްގައި، އެބައޮތް އިހުތިރާމް ކުރަން ޖެހޭ ކޮންޓްރެކްޓެއް ވެސް،" އިންޒާގީ ބުންޏެވެ.
އިންޒާގީގެ އިތުރުން، އިޓަލީ ފުޓްބޯޅަ ފެޑެރޭޝަން، އެފްއައިޖީސީން އަންނަނީ ކުރިން އިޓަލީ އަށް ކޯޗުކޮށްދިން ގިނަ ކޯޗުންނާ ވެސް ވާހަަކަަ ދައްކަމުންނެވެ. އޭގެ ތެރޭގައި، ނަޕޯލީއާ ހަވާލުވެހުރި އެންޓޯނިއޯ ކޮންޓޭ ވެސް ހިމެނެ އެވެ.
