ރިޔާދު، ސައުދީ އަރަބިއްޔާ (އޭޕްރީލް 30) - ކްރިސްޓިއާނޯ ރޮނާލްޑޯގެ ގޯލާ އެކު، 2-0 އިން އަލް އަހްލީ ބަލިކޮށް އަލް ނަސްރުން ސައުދީ ޕްރޮފެޝަނަލް ލީގު (ޕްރޯ ލީގު)ގެ އެއް ވަނައިގައި ރަނގަޅު ލީޑެއް ނަަގައި، ލީގު ޗެމްޕިއަންކަންް ހޯދުމުގެ ކޮންޓްރޯލް ދަމަހައްޓައިފި އެެވެ.
ސައުދީ ޕްރޯ ލީގުގައި ބާކީ ހަތަރު މެޗު އޮތްއިރު، ރޭގެ ނަތީޖާ އަށް ފަހު އަލް ނަސްރުން ވަނީ އަަށް ޕޮއިންޓަށް ލީޑުފުޅާކޮށްފަ އެެވެ. އެއް ވަނައިގައި އަލް ނަސްރު އޮތީ 30 މެޗުން 79 ޕޮއިންޓާ އެކު އެވެ. ދެ ވަނައިގައި އޮތް އަލް ހިލާލް އަށް 29 މެޗުން 71 ޕޮއިންޓް ވަނީ ލިބިފަ އެވެ. އަދި، ތިން ވަނައިގައި އޮތް އަލް އަހްލީ އަށް އޮތީ 29 މެޗުން 66 ޕޮއިންޓް ލިބިފަ އެެވެ.
އަލް ނަސްރުގެ ދަނޑު، ރިޔާދުގެ އަލް އައްވަލް ޕާކުގައި ރޭ ކުޅުނު މެޗުގައި 75 ވަނަ މިނިޓާ ހަމައަށް ލަނޑެއް ފެނިފައިނުވެ އެވެ. އަލް ނަސްރުން 76 ވަނަ މިނިޓްގައި ރޮނާލްޑޯ ޖެހި ގޯލުން ލީޑުނެގި އެވެ. މިއީ، ޖޮއާއޯ ފެލިކްސް ނެގި ކޯނަރަކުން ރޮނާލްޑޯ ބޮލުން ޖެހި ގޯލެކެވެ. މިއީ، މި ފަހަރުގެ ސައުދީ ޕްރޯ ލީގުގައި ރޮނާލްޑޯގެ 25 ވަނަ ގޯލެވެެ. އަދި، ރޮނާލްޑޯ މި ވަނީ، އަނެއްކާ ވެސް ޖެހިޖެހިގެން ތިން ސީޒަނުގަައި މަދުވެގެން 25 ގޯލު ޖަހައިފަ އެވެ. މީގެ ކުރިން، ރޮނާލްޑޯ ވަނީ، 2010 އިން 2018އާ ހަމައަށް ހުރިހާ ސީޒަނެއްގައި މަދުވެގެން ލީގުގައި 25 ގޯލު ޖަހައިފަ އެވެ.
ރޮނާލްޑޯގެ ގޯލުން އިތުބާރު ހޯދައި، އަލް ނަސްރުން އެޓޭކް އިތުރަށް ވަރުގަދަކުރިއިރު، 90 ވަނަ މިނިޓްގައި ދެ ވަނަ ލަނޑު ޖެހި އެވެ. މި ލަނޑު ޖެހީ ބަޔާން މިއުނިކާއި ޕީއެސްޖީ އަދި ޔުވެންޓަސް އަށް ކުރިން ކުޅުނު ކިންގްސްލީ ކޯމަން އެވެ. މިއީ، ކޯނަރަކުން އަލް އަހްލީ އަށް ރަނގަޅަށް ޑިފެންސް ނުކުރެވުނު ބޯޅައެއް ހޯދައި ކޯމަން ޖެހި ގޯލެކެވެ.
މި މެޗާ އެކު، އަލް ނަސްެރުން މި ވަނީ ޖެހިޖެހިގެން 20 ވަނަ މެޗުން މޮޅުވެފަ އެވެ. އޭގެ ތެރެއިން 16 މެޗަކީ ސައުދީ ޕްރޯ ލީގުގެ މެޗުތަކެވެ.
