ރިޔާދު، ސައުދީ އަރަބިއްޔާ (އޮގަސްޓް 31) - ސައުދީ ޕްރޮފެޝަނަލް ލީގު (ޕްރޯ ލީގު)ގެ އަލް ހިލާލްއާ އެކު ހަދާފައިވާ އެއްބަސްވުން އުވާލި ފްރާންސް ގައުމީ ޓީމުގެ ކުރީގެ ފޯވާޑް، ކަރިމް ބެންޒެމާ، ފުޓްބޯޅައިން ރިޓަޔާކުރަން ވިސްނަމުން އަންނަ ކަމަށް ރިޕޯތްތައް ބުނެފި އެވެ.
އުމުރުން 38 އަހަރުގެ ބެންޒެމާ، 2023 ވަނަ އަހަރު ރެއާލް މެޑްރިޑް ދޫކޮށް، އެންމެ ފުރަތަމަ ބަދަލުވީ ސައުދީ ޕްރޯ ލީގުގެ އަލް އިއްތިހާދު އަށެވެ. އަދި، އަލް އިއްތިހާދުގެ އެއްބަސްވުން ނިމުމަކަށް ގެނެސް މި އަހަރުގެ ޖެނުއަރީ މަހު އަލް ހިލާލް އަށް ބަދަލުވި އެވެ. އެކަމަކު، އެ ޓީމުގައި މާ ގިނަ ދުވަހު މަޑުނުކޮށް، ބެންޒެމާ މި ވަނީ އަލް ހިލާލްގެ ކޮންޓްރެކްޓް އުވާލައިފަ އެވެ.
އަލް ހިލާލް އިން ވަނީ ޕްރިމިއާ ލީގުގެ އެސްޓަން ވިލާ އަށް ކުޅޭ އިނގިރޭސި ފޯވާޑް، އޮލީ ވަޓްކިންސް ސޮއިކޮށްފަ އެވެ. އަދި، އާސެނަލްގެ ގަބްރިއެލް މާޓިނެލީ ވެސް އެ ޓީމަށް ބަދަލުވުމާ ގާތުގައި އޮތްއިރު، ބެންޒެމާ ނިންމީ އެއްބަސްވުން އުވާލާށެވެ.
ރިޕޯޓްތައް ބުނާގޮތުން، ބެންޒެމާ ފުޓްބޯޅަ ކެރިއަރު ކުރިއަށްގެންދާނަމަ، ދެން ވެސް ފެނުން ގާތީ ސައުދީގެ ކްލަބަކުންނެވެ. އެކަމަކު، ފުޓްބޯޅައިން ރިޓަޔާކުރުމުގެ ވިސްނުމެއް ވެސް އޭނާ ގެންގުޅޭ ކަމަށް ރިޕޯޓްތައް ބުނެ އެވެ.
އަލްޖީރިއާ ދަރިކޮޅަށް ނިސްބަތްވާ ބެންޒެމާ، އަލް ހިލާލްގެ ކޮންޓްރެކްޓް އުވާލިއިރު، ބާކީ އަހަރެއް އެއްބަސްވުމުގައި އޮތެވެ. މީގެ ކުރިން ބެލޮންޑިއޯ އެވޯޑް ވެސް ހޯދާފައިވާ ބެންޒެމާ، އަލް ހިލާލް އަށް ކުޅުނު 16 މެޗުން 10 ގޯލު ޖަހައި، ފަސް ލަނޑު ޖަހަން ފުރުސަތު ތަނަވަސްކޮށްދިނެވެ.
ލިޔޯން ދޫކޮށް، 33 މިލިއަން ޑޮލަރުގެ ފީ އަކަށް، 2009 ވަނަ އަހަރު، ރެއާލަށް ބަދަލުވި ބެންޒެމާ، ވަނީ ލިޔޯނަށް ކުޅުނުއިރު، ހަތަރު ފަހަރު އެ ޓީމާ އެކު، ލީގު ޗެމްޕިއަންކަން ހޯދައިފަ އެވެ. ރެއާލްގައި ހޭދަކުރި 14 އަހަރު ތެރޭ ބެންޒެމާ ވަނީ އެ ޓީމަށް ކުޅެދިން 648 މެޗުން 354 ގޯލު ޖަހައިފަ އެވެ. ބެންޒެމާ ވަނީ ރެއާލަށް ކުޅުނުއިރު ޖުމްލަ އެކު، 24 ތަށި އުފުލާލައިފަ އެވެ. އޭގެ ތެރޭގައި ފަސް ފަހަރު ޗެމްޕިއަންސް ލީގު ކާމިޔާބު ކުރުން ހިމެނެ އެވެ. އަދި އެ ޓީމުގައި ހުރެ، ފްރާންސް ފުޓްބޯލް އިން ހޮވާ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑް ހޯދި އެވެ.
