ރިޔާދު، ސައުދީ އަރަބިއްޔާ (މެއި 4) - ސައުދީ ޕްރޮފެޝަނަލް ލީގު (ޕްރޯ ލީގު) ގައި ރޭ ކުޅުނު މެޗުން އަލް-ގަދްސިއާ އަތުން 3-1 އިން ބަލިވެ، އަލް-ނަސްރުން ދަމަހައްޓަމުން އައި މޮޅުވުމުގެ ރެކޯޑަށް 20 މެޗަށް ފަހު ނިމުން އަތުވެއްޖެ އެވެ.
އަލް-ގަދްސިއާގެ ދަނޑު، ޕްރިންސް ސައުދު ބިން ލަވާވީ ސްޓޭޑިއަމްގައި ރޭ ކުޅުނު މެޗުގެ 24 ވަނަ މިނިޓްގައި އަލް-ގަދްސިއާގެ މުހައްމަދު އަބޫ އަލް ޝަމާތު ވަނީ ލަނޑު ޖަހައި އެ ޓީމަށް ލީޑުނަގައިދީފަ އެވެ. އެކަމަކު، ފުރަތަމަ ހާފު ނިމުމުގެ ކުރިން، އަލް-ނަސްރުން ވަނީ އެއްވަަރުކޮށްފަ އެވެ. މެޗުގެ 39 ވަނަ މިނިޓްގައި މި ލަނޑު ޖެހީ މާސެލޯ ބްރޮޒޯވިޗް ދިން ބޯޅައަކުން ޖޮއާއޯ ފެލިކްސް ޖެހި ގޯލުންނެެވެ.
ދެ ވަނަ ހާފުގައި ކުޅެން އަރައި، 55 ވަނަ މިނިޓްގައި އަލް-ގަދްސިއާ އިން އިތުުރު ގޯލެއް ޖަހައި، އަލުން ލީޑުނެގި އެވެ. މި ލަނޑު އެ ޓީމަށް ޖަހައިދިނީ މުއްސަބް ފަހުދު އަލްޖުވޭރު އެވެ. އަލް-ނަސްރުން އެޓޭކަށް ޖެހި ނަތީޖާ ހަމަހަމަކުރެވޭތޯ މަސައްކަތް ކުރަމުން އަންނަނިކޮށް، ކައުންޓަ އެޓޭކުގައި އަލް-ގަދްސިއާ އިން ވަނީ އިތުރު ގޯލެއް ޖަހައިފަ އެވެ. މި ލަނޑު އެ ޓީމަށް ޖަހައިދިނީ ޖޫލިއަން ކިނޯނޭސް އެވެ.
މި މެޗުގައި އަލް-ނަސްރުގެ ތަރި، ކްރިސްޓިއާނޯ ރޮނާލްޑޯ އަށް ލިބުނު ފުރުސަތުތަކުގައި ގޯލެއް ޖެހޭގޮތެއްނުވި އެވެ.
މި ނަތީޖާއާ އެކު، ލީގުގެ އެއް ވަަނައިގައި އަލް-ނަސްރަށް ލީޑުފުޅާކުރަން ލިބުނު ފުރުސަތުގައި ބޭނުމެއް ހިފޭގޮތެއްނުވި އެވެ. އަލް-ނަސްރުން އެއް ވަނައިގައި އޮތީ 31 މެޗުން 79 ޕޮއިންޓާ އެކު އެވެ. ދެ ވަނައިގައި އޮތް އަލް-ހިލާލް އަށް 30 މެޗުން ވަނީ 74 ޕޮއިންޓް ލިބިފަ އެވެ. ތިން ވަަނައިގައި އޮތް އަލް-އަހްލީ އަށް ވަނީ 30 މެޗުން 69 ޕޮއިންޓް ލިބިފަ އެވެ. އަދި، ހަތަރެއްގައި އޮތް އަލް-ގަދްސިއާ އަށް ވަނީ 31 މެޗުން 68 ޕޮއިންޓް ލިބިފަ އެވެ.
