ރިޔާދު، ސައުދީ އަރަބިއްޔާ (މެއި 13) - ސައުދީ ޕްރޮފެޝަނަލް ލީގު (ޕްރޯ ލީގު)ގައި ރޭ ކުޅުނު މެޗުން އަލް ހިލާލުން ފަހު ވަގުތު ލަނޑު ޖަހައި، 1-1 އިން އެއްވަރުކުރުމުން، އަލް ނަސްރަށް މި މެޗުން ލީގު ޗެމްޕިއަންކަން ޔަގީންކުރުމުގެ ފުރުސަތު ގެއްލިއްޖެ އެވެ.
ޖުމްލަ އެކު، 18 ޓީމު ވާދަކުރާ ސައުދީ ޕްރޯ ލީގުގެ އެއް ވަނައިގައި އަލް ނަސްރު އޮތީ ދެ ވަނައިގައި އޮތް އަލް ހިލާލް އަށް ވުރެން އެއް މެޗު އިތުރަށް ކުޅެގެން ފަސް ޕޮއިންޓުގެ ލީޑަކާ އެކު އެވެ. އަލް ނަސްރަށް 33 މެޗުން 83 ޕޮއިންޓް ލިބިފައިވާއިރު، އަލް ހިލާލަށް 32 މެޗުން ވަނީ 78 ޕޮއިންޓް ލިބިފަ އެވެ.
އަލް ނަސްރުގެ ސްޓޭޑިއަމް އަލް އައްވަލް ޕާކުގައި ރޭ ކުޅުނު މެޗުގައި އަލް ހިލާލަށް ކުޅޭ ފްރާންސްގެ ފޯވާޑް، ކަރީމް ބެންޒެމާ ވަނީ ގޯލެއް ޖަހައިފަ އެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ނިންމީ، އޮފްސައިޑް ކަމަށެވެ.
އަލް ނަަސްރުން ވަނީ މެޗުގެ ފުރަަތަމަ 37 ވަނަ މިނިޓްގައި ލަނޑު ޖަހައިފަ އެވެ. އެ ޓީމަށް ލީޑުނަގައިދިނީ ކިންގްސްލީ ކޯމަން ތަނަވަސްކޮށްދިން ފުރުސަތެއްގައި ޑިފެންޑަރު، މުހައްމަދު ސިމަކަން އެވެ.
މި މެޗުގައި އަލް ނަސްރަށް ލަނޑު ޖަހައިދޭން ކޯމަން އަށް ލިބުނު ފުރުސަތެއްގައި ފޮނުވާލި ބޯޅައެއް ގޯލުގެ ދަނޑިއަށް އަމާޒުވިއިރު، އޭރިއާބޭރުން އަލް ނަސްރުގެ ތަރި، ކްރިސްޓިއާނޯ ރޮނާލްޑޯ ފޮނުވާލި ބޯޅައެއް އަލް ހިލާލްގެ ކީޕަރު، ޔާސީން ބޯނޯ ވަނީ މަތަކޮށްފަ އެވެ.
މެޗުގެ އިތުރުު ވަގުތުގެ އަށް ވަނަ މިނިޓްގައި، އަލް ހިލާލް އިން އެއްވަރުކުރި ގޯލަކީ، އަލް ނަސްރުގެ ގޯލްކީޕަރު، ބެންޓޯ އަތުން ބައިކޮޅަށް ވަން ގޯލެކެވެ. އެ ގޮތުން، އަލް ހިލާލުގެ ދިގު އެއްލުމެއް ދިފާއުކުރަން، އަލް ނަސްރުގެ ސްޕެއިން ޑިފެންޑަރު، އިނީގޯ މާޓީނޭޒްއާ އެކު، އެ ބޯޅަ ހުއްޓުވަން ބެންޓޯ މަސައްކަތްކުރި ވަގުުތު، އޭނާ އަތުގައި ޖެހިފައި، ބޯޅަ ވަނީ ގޯލަށެވެ. މި ލަނޑު ވަނީ، ރެފްރީ މެޗު ނިންމާލުމުގެ 10 ސިކުންތު ކުރިންނެވެ.
