ލަންޑަން (ސެޕްޓެމްބަރު 5) - އިނގިރޭސި ޕްރިމިއާ ލީގުގައި މިރޭ އަލެކްސަންޑަ އިސާކްގެ ދެ ލަނޑުން 2-0 އިން އިޕްސްވިޗް ޓައުން ބަލިކޮށް ލިވަޕޫލުން މި ފަހަރުގެ ސީޒަނުގައި ފުރަތަމަ މޮޅު ހޯދައިފި އެވެ.
އާ ކޯޗު އަންޑޯނީ އިރައޯލާގެ ކޯޗުކަމުގައި ލިވަޕޫލުން ކުޅުނު ފުރަތަމަ ދެ މެޗުގައި މި ފަހަރުގެ ސީޒަނުގައި ލިވަޕޫލުން ވަނީ ލީގުގައި އެއްވަރުވެފަ އެވެ. އެއީ، ފުރަތަމަ މެޗުގައި ރަށުންބޭރުގައި ނިއުކާސަލް ޔުނައިޓެޑާ ދެކޮޅަށް 2-2 އިން އެއްވަރުވި މެޗާއި އަމިއްލަ ދަނޑުގައި 2-2 އިން ނޮޓިންހަމް ފޮރެސްޓާ އެއްވަރުވި މެޗެެވެ.
އިޕްސްވިޗްގެ ދަނޑު ޕޯޓްމަން ރޯޑުގައި ކުޅުނު މެޗުގައި ލިވަޕޫލުން ދެ ލަނޑު ޖެހީ ވެސް ފުރަތަމަ ނުވަ މިނިޓް ތެރޭގަ އެވެ. އިސާކް، ފުރަތަމަ ލަނޑު ޖެހީ ހަ ވަނަ މިނިޓްގަ އެވެ. މިއީ، އިޕްސްވިޗް ޑިފެންސް ފަހަތުން ލިބުނު ބޯޅައެއް ކޮންޓްރޯލް ކުރުމަށް ފަހު، އިސާކް ޖެހި ގޯލެކެވެ. އަދި، ފުރަތަމަ ލަނޑު ޖެހިތާ ތިން މިނިޓް ފަހުން، އިސާކް ވަނީ ދެ ވަނަ ލަނޑު ޖަހައިފަ އެވެ. އިސާކް، ދެ ލަނޑު ޖަހަން ވެސް ފުރުސަތު ތަނަވަސްކޮށްދިނީ މި ފަހަރުގެ ޓްރާންސްފާ މާކެޓްގައި ލިވަޕޫލް ދޫކޮށްލާނެ ކަމަށް ބެލެވުނު ނެދަލެންޑްސްގެ ފޯވާޑް، ކޯޑީ ގަކްޕޯ އެވެ.
ފްލޯރިއަން ވާޓްޒް ދިން ބޯޅައަކުން އިސާކް ވަނީ ތިން ވަނަ ލަނޑެއް ވެސް ޖަހައިފަ އެވެ. އެކަމަކު، މި ލަނޑު ޖެހިއިރު، އިސާކް އޮފްސަައިޑްގައި ހުރުމުން، ގޯލު ބަލައިނުގަންނާތީވެ، ހެޓްރިކް ފުރިހަމަަ ނުކުރެވުނެވެ. އިސާކް ވަނީ މީގެ ކުރިން 2024 ވަނަ އަހަރު އިޕްސްވިޗް ދަނޑުގައި ނިއުކާސަލް އަށް ކުޅުނުއިރު ހެޓްރިކެއް ހަދައިފަ އެވެ. އިސާކް މި ވަނީ ލިވަޕޫލް މި ފަހަރުގެ ލީގުގެ ފުރަތަމަ ތިން މެޗުގައި ތިން ލަނޑު ޖަހައިފަ އެވެ.
ލިވަޕޫލްގެ ޑިފެންޑަރުން ވަނީ މި މެޗުގައި ގޯލެއް ވަނަނުދޭން ރަނގަޅަށް މަސައްކަތް ކޮށްފަ އެވެ. އަދި، ލިވަޕޫލްގެ ކީޕަރު އެލިސަން ބެކާއާ ހަމައަށް މާ ބޮޑު ނުރައްކާތެރި ހަމަލާއެއް ގޮސްފައިނުވެ އެވެ. މެޗުގެ ދެ ވަނަ ހާފުގައި ލިވަޕޫލުން ވަނީ ދާދި ފަހުން އެ ޓީމާ ގުޅުނު ފްރާންސްގެ ބްރެޑްލީ ބާކޮލާ ކުޅެން އަރުވައިފަ އެވެ.
ފުރަތަަމަ މެޗުގައި އަމިއްލަ ދަނޑުގައި ލީގުގައި ސަންޑަލެންޑް އަތުން އިޕްސްވިޗް މޮޅުވި ނަމަވެސް އޭގެ ފަހުން ކުޅުނު ދެ މެޗުން މި ވަނީ މެންޗެސްޓާ ޔުނައިޓެޑާއި ލިވަޕޫލް އަތުން ބަލިވެފަ އެވެ.
