ލިވަޕޫލް (ސެޕްޓެމްބަރު 4) - އިނގިރޭސި ޕްރިމިއާ ލީގުގެ އާ ސީޒަނުގައި ފުރަތަމަ ދެ މެޗު ކުޅުނުއިރު، ލިވަޕޫލަށް މޮޅެއް ނުލިބުމަކީ ކަންބޮޑުވުމެއް ކަމަށް ވިޔަސް އެއީ އަވަސް އަރުވާލައިގެން ކަންތައްތަކެއް ކުރަން ޖެހޭ ސަބަބެއް ނޫން ކަމަށް ސްޕެއިނުގެ ކޯޗު، އަންޑޯނީ އިރައޯލާ ބުނެފި އެވެ.
ބޯންމައުތަށް ކުރިން ކޯޗުކޮށްދިން އިރައޯލާ، ލިވަޕޫލާ ހަވާލުވީ ދެ އަހަރުގެ ކޮންޓްރެކްޓެއްގަ އެވެ. މި ފަހަރުގެ ސީޒަނުގައި ލިވަޕޫލުން ކުޅުނު ދެ މެޗުގައި ވެސް ބަލިނުވެ ސަލާމަތްވީ ފަހު ވަގުތު އެވެ. އެ ގޮތުން، ފުރަތަމަ ރަށުންބޭރުގައި ނިއުކާސަލް ޔުނައިޓެޑާ ކުޅެެގެން، އިތުރު ވަގުތުގެ ތެރޭގައި ޖެހި ޕެނަލްޓީން 2-2 އިން އެއްވަރުކުރި އެެވެ. އޭގެ ފަހުން، ނޮޓިންހަމް ފޮރެސްޓާ އަމިއްލަ ދަނޑުގައި ކުޅެގެން ވެސް ފަހު ވަގުތު ލަނޑު ޖަހައި، 2-2 އިން ވީ އެއްވަަރެވެ.
އިރައޯލާ ބުނީ ފުރަތަމަ ދެ މެޗު ކުޅުނުއިރު، އަސްލު ބޭނުންވާ ހިސާބަކީ މޮޅެއް ހޯދައިގެން ތިބުން ކަމަށެވެ. މޮޅެއް ނުވެ އޮތުމަކީ ކަންބޮޑުވުން ހުންނާނެ ކަމެއް ކަމަށް ވެސް އިރައޯލާ ވަނީ ބުނެފަ އެވެ.
"އެންމެ ފުރަތަަމަ ދެ މެޗު އަބަދުވެސް އުނދަގޫވާނެކަން އެނގޭ. އެކަމަކު، މިހާރު އަހަރެން މި ހުރީ ކުރިއަށް ވުރެން ހަމަޖެހިގެން. ޓްރާންސްފާ މާކެޓް އެ އޮތީ ބަންދުވެފައި. އަހަރެމެންނަށް އެބަ އެނގޭ މިހާރު މިތިބި ހިސާބު. އަހަރެމެންނަށް އެނގޭ ކުރަން ޖެހޭ މަސައްކަތާއި ކުޅުން ދައްކައިގެންކަން ކުރިއަށްދެވޭނީ،" އިރައޯލާ ބުންޏެވެ.
ލީގުގައި މިރޭ ލިވަޕޫލުން ނުކުންނާނީ ރަށުންބޭރުގައި އިޕްސްވިޗް ޓައުންއާ ދެކޮޅަށެވެ. އެ ޓީމު ވަނީ އެންމެ ފަހުން ކުޅުނު މެޗުގައި ރަށުންބޭރުގައި މެންޗެސްޓާ ޔުނައިޓެޑް އަތުން 5-2 އިން ބަލިވެފަ އެވެ. އިޕްސްވިޗުން ވަނީ އަމިއްލަ ދަނޑުގައި މި ސީޒަނުގައި ކުުޅުނު ދެ މެޗުން، ޕްރިމިއާ ލީގުގައި ސަންޑަލެންޑް އަތުން އަދި ލީގު ކަޕްގައި ލެސްޓާ ސިޓީ އަތުން މޮޅުވެފަ އެވެ.
"އިޕްސްވިޗް ވަނީ ފުރަތަމަ މެޗުން އަމިއްލަ ދަނޑުގައި މޮޅުވެފައި. ދެން، އެންމެ ފަހުން ކުޅުނު މެޗުގައި އިޕްސްވިޗުން ރަނގަޅަށް ކުޅެ، ޔުނައިޓެޑުން 2-1 އިން ލީޑުނެގި ހިސާބުން މެޗު އިތުރަށް ހުޅުވިގެންދިޔައީ. މިއީ، އަހަރެމެން ތައްޔާރުވެ ތިބެގެން ރަނގަޅަށް ކުޅެން ޖެހޭނެ މެޗެއް،" މިރޭ، އިޕްސްވިޗް ދަނޑުގައި އެ ޓީމާ ކުޅޭ މެޗާ ބެހޭގޮތުން، އިރައޯލާ ބުންޏެވެ.
ލިވަޕޫލުން ޓްރާންސްފާގެ ފަހު ކޮޅުގައި ގެނައި، ފްރާންސްގެ ވިންގް، ބްރެޑްލީ ބާކޮލާ އަންނަނީ ޓީމުގެ ޓްރެއިނިންތަކުގައި ބައިވެރިވަމުން ކަމަށާއި އިޕްސްވިޗް މެޗުގައި ފެނުމުގެ ފުރުސަތު އެބައޮތް ކަމަށް އިރައޯލާ ވަނީ ބުނެފަ އެވެ.
ލިވަޕޫލާއި އިޕްސްވިޗް ކުޅޭ މެޗު ފަށާނީ މިރޭ 12 ޖަހާއިރު އެވެ.
