ބެންގަލޫރު (އޮގަސްޓް 31) - ކުރިއަށް އޮތް ފީފާ އިންޓަނޭޝަނަލް ބްރޭކުގައި، ދެކުނު އެމެރިކާ ފުޓްބޯޅައިގެ ވަރުގަދަ ދެ ބާރު ކަމަށްވާ އުރުގުއޭ އާއި ބްރެޒިލް ފަދަ ޓީމުތަކާ ދެކޮޅަށް އިންޑިއާ އިން ކުޅުމަކީ ކުޅުންތެރިންނަށް ލިބޭ ރަނުގެ ފުރުސަތެއް ކަމަށް އިންޑިއާ ގައުމީ ޓީމުގެ ކުރީގެ ކެޕްޓަން، ސުނިލް ޗެތުރީ ބުނެފި އެވެ.
ފީފާ އިން އަންނަ މަހު ގައުމީ ޓީމުތަކަށް ކަނޑައަޅާފައިވާ ބްރޭކް އޮތީ ސެޕްޓެމްބަރު މަހު، 21 އިން އޮކްޓޫބަރު 6 ގެ ނިޔަލަށެވެ. އިންޑިއާ އިން މި ބްރޭކުގައި ކުޅޭ ފުރަތަމަ މެޗުގައި، ސެޕްޓެމްބަރު މަހު، 26 ގައި ޕެނަމާއާ ކުޅޭނެ އެވެ. ދެ ވަނަ މެޗުގައި ބްރެޒިލާ ދެކޮޅަށް އޮކްޓޫބަރު މަހު ތިން ވަނަ ދުވަހު ކުޅުމަށް ފަހު، ތިން ވަނަ މެޗުގައި، އޭގެ ތިން ދުވަސް ފަހުން އުރުގުއޭއާ ކުޅޭނެ އެވެ.
ފީފާ ބްރޭކުގައި އިންޑިއާ އިން ކުޅެނީ ޕެނަމާ، ބްރެޒިލް އަދި އުރުގުއޭއާ ދެކޮޅަށް
ކުރިއަށް އޮތް ފީފާ ބްރޭކުގައި އިންޑިއާ އިން ޕެނަމާ، ބްރެޒިލް އަދި އުރުގުއޭއާ ދެކޮޅަށް އެކުވެރިކަމުގެ މެޗުތަކެއް ކުޅުމަށް ވަނީ ނިންމާފައި. އާސިއާން ކަޕް ދޫކޮށްލުމަށްފަހު އިންޑިއާ އިން މި މެޗުތައް ކުޅެނީ ދުނިޔޭގެ ވަރުގަދަ ޓީމުތަކާ ދެކޮޅަށް އަމިއްލަ ގައުމުގައި ވާދަވެރި މެޗުތަކެއް ކުޅުމުގެ މަގްސަދުގައި
"ސަޕޯޓަރެއްގެ ގޮތުގައި ހުންނަން ޖެލަސް ވޭ މި ފަދަ މެޗުތަކުގައި. އަހަރެންގެ 24-26 އަހަރުވީ ޕްރޮފެޝަނަލް ކެރިއަރުގައި ގާތްގަނޑަކަށް 20 އަހަރު ހޭދަކުރިން ގައުމީ ޓީމުގައި. މި ކަހަލަ ފުރުސަތެއް އަަހަންނަށް ނުއެއް ލިބޭ،" އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް) އަށް ދިން އިންޓަވިއުއެއްގައި ޗެތުރީ ބުންޏެވެ.
މިދިޔަ އަހަރު ދެ ވަނަ ފަހަރަށް ގައުމީ ޓީމުން ރިޓަޔާކުރި މިހާރު 42 އަހަރުގެ ޗެތުރީ ބުނީ، މިހާރު އޮތް އިންޑިއާ ގައުމީ ޓީމަށް އެންމެ މުހިންމު ކަމަކީ ގައުމީ ޓީމުގެ މެޗުތައް އަންނައިރު ފިޓްކޮށް، އެންމެ ރަނގަޅަށް ތައްޔާރުވެ ހުރުން ކަމަށެވެ. ގައުމީ ޓީމާ ދުރުގައި ހުރި ނަމަވެސް އަބަދުވެސް ޓީމަށް ކާމިޔާބަށް އެދޭ ކަމަށް ޗެތުރީ ވަނީ ބުނެފަ އެވެ.
"މިއީ އެ މީހުންގެ ވަގުތު. ވަރަށް ރަނގަޅު ޒުވާން ކުޅުންތެރިން އިންޑިއާ ގައުމީ ޓީމުގައި އެބަތިބި. އެންމެންނަށް ވެސް ފުރުސަތު ލިބޭނެ ކަމަށް މި ބަލަނީ. އަހަންނަށް 20 އަހަރު ކުރިން ލިބުނު ގޮތަށް،" ޗެތުރީ ބުންޏެވެ.
އިންޑިއާގެ ގައުމީ ޓީމުގެ ސިލެކްޝަން ހެދިއިރު، ބައެއް ކުޅުންތެރިންނަށް ފުރުސަތު ގެއްލުމުން އެ ކަމަށް ވަނީ ފާޑުކިޔުން އަމާޒުވެފަ އެވެ. ޗެތުރީ ބުނީ، ގައުމީ ޓީމުގެ ކޯޗުގެ ޕްލޭނަށް ފިޓްވާނެ ކުޅުންތެރިން ނެގުމަކީ އޭނާ އަށް އޮންނާނެ ޒިންމާއެއް ކަމަށާއި އެކަމަށް އިހުތިރާމް ކުރަން ޖެހޭނެ ކަމަށެވެ.
"ކޯޗު ޖަވާބު ދޭން ޖެހޭނީ އެ ކަމަށް. އެހެން އެންމެންނެކޭ އެއްގޮތަށް އަހަންނަކީ މިހާރު ސަޕޯޓަރެއް. ދެންމެ އަހަރެން މި އައީ 20 ވަރަކަށް މިނިޓަށް ޓްރެއިނިންގައި ބައިވެރިވެފައި. އަހަންނަށް މިހާރު 42 އަަހަރު. ރަނގަޅަށް ދުވެލެވެނީ ކިރިޔާ، އަހަރެން ވެސް ހާލުގައި މި ދަނީ،" ހިނިއައިސްފައި ހުރެ ޗެތުރީ ބުންޏެވެ.
އޭނާ ބުނީ، އިންޑިއާ ފުޓްބޯޅައިގައި ތަފާތު އެކި މައްސަލަތައް ނެތް އިރަކާ ދިމާނުވާ ކަމަށާއި އެންމެ މުހިންމު ކަމަކީ ޕޮޒިޓިވް ވިސްނުމެއްގައި މަސައްކަތް ކުރަން އިސްކަންދީގެން، އުންމީދުގައި ކުރިއަށްދާން ފުރުސަތުތައް ހޯދައިދިނުން ކަމަށެވެ.
