އީރާނުގައި ބޭއްވި ކައިވެނި ހަފުލާއަކަށް އަމާޒުވި ނުރައްކާތެރި ހަމަލާއަކީ އެމެރިކާގެ ހަތިޔާރަކުން ސީދާ އެ ތަނަށް ދީފައިވާ ހަމަލާއެއް ކަމަށް ރޮއިޓާސްގެ ތަހުލީލަކުން ދެއްކުމާ ގުޅިގެން، އެ މައްސަލަ އެމެރިކާ އިން ބަލަމުންދާ ކަމަށް އެ ގައުމުގެ ނައިބު ރައީސް ޖޭޑީ ވެންސް ވިދާޅުވެއްޖެ އެވެ.
ހަތިޔާރުގެ މާހިރުން، ރޮއިޓާސް އިން ކަށަވަރުކޮށްފައިވާ ފޮޓޯތަކާއި ވީޑިއޯތައް ދިރާސާކުރުމަށްފަހު ބުރާސްފަތި ދުވަހު ނެރުނު ތަހުލީލަކުން ދައްކާ ގޮތުގައި، މިދިޔަ އަންގާރަ ދުވަހު އީރާނުގެ ދެކުނުގައި ބޭއްވި ކައިވެނި ހަފުލާއެއް ފުނޑުފުނޑުކޮށްލި ގޮވުމަކީ އެމެރިކާގެ ހަތިޔާރަކުން ސީދާ އެ ތަނަށް އެރި ހަމަލާއެކެވެ. މިއީ އެހެން އަމާޒަކަށް ފޮނުވާލި ހަމަލާއެއް ކަސިޔާރުވެގެން ދިމާވި ހާދިސާއެއް ނޫން ކަމަށް ވެސް އެ ތަހުލީލުން ދައްކަ އެވެ.
މި ހާދިސާގެ ޒިންމާ އެމެރިކާ އިން އަދި ރަސްމީކޮށް އުފުލާފައެއް ނުވެ އެވެ. ނޮވެމްބަރު މަހު ބާއްވާ މުހިންމު މިޑްޓާމް އިންތިހާބާ ދިމާކޮށް، ރައީސް ޑޮނަލްޑް ޓްރަމްޕްގެ މަގުބޫލުކަމަށް މި ހަނގުރާމައިގެ ސަބަބުން ނޭދެވޭ އަސަރު ކުރަމުންދާތީ، ހަނގުރާމަ ހުއްޓާލުމަށް އެމެރިކާ ސަރުކާރަށް އަމާޒުވާ ފިއްތުންތައް ވަނީ އިތުރުވެފަ އެވެ.
އީރާނުގެ ދައުލަތުގެ ޓީވީން ބުރާސްފަތި ދުވަހު ބުނި ގޮތުގައި، ކައިވެނި ހަފުލާ ކުރިއަށްދިޔަ ގެއަށް އަމާޒުވި ހަމަލާގައި ޒަހަމްވި 22 އަހަރުގެ އަންހެނަކު ހޮސްޕިޓަލުގައި ފަރުވާދެމުން ދަނިކޮށް ވަނީ މަރުވެފަ އެވެ. މިއާއެކު މި ހަމަލާގައި މަރުވި މީހުންގެ އަދަދު ފަހަކަށް އަރާފައިވާއިރު، 70 އެއްހާ މީހުން ޒަހަމްވެފައިވާ ކަމަށް އީރާނުގެ އޮފިޝަލުން ވިދާޅުވެ އެވެ.
އަންގާރަ ދުވަހުގެ ރޭ އެމެރިކާ އިން ދިން ވަރުގަދަ ވައިގެ ހަމަލާތައް އަމާޒުވި ހޯރްމޫޒް ކަނޑުއޮޅީގެ އައްސޭރިފަށުގައި އޮންނަ ސިރިކް ކައުންޓީގެ ކުހެސްތަކް އަވަށުގެ ބޭރުގައި، މި ހާދިސާގައި މަރުވި މީހުންގެ ޖަނާޒާގައި ބައިވެރިވުމަށް ބުރާސްފަތި ދުވަހުގެ ހަވީރު ގިނަ އަދަދެއްގެ ބަޔަކު ވަނީ އެއްވެފަ އެވެ.
